ޤަތަރުގެ އަލް-ރައްޔާނަށް ކުޅެމުން އަންނަ ކޮލޮމްބިއާގެ މިޑްފީލްޑަރު ހަމޭސް ރޮޑްރިގޭޒް ރޯމާއަސް ގެންދަން އެ ޓީމުގެ ކޯޗު މޮރީނިއޯ ބޭނުންވާކަމަށް މީޑިއާ ރިޕޯޓުތައް ބުނެފިއެވެ.

އަލް-ރައްޔާނަށް ކުޅެމުން އަންނަ ރޮޑްރިގޭޒް އެ ޓީމު ދޫކޮށް ޔޫރަޕުގެ ކުލަބަކަށް އަލުން ބަދަލުވުމުގެ ޝައުގުވެރިކަން ގެން ގުޅޭ ކަމަށް ވެސް މީޑިއާތަކުގައި ރިޕޯޓުކޮށްފައިވެއެވެ. ރިޕޯޓުތައް ބުނާ ގޮތުގައި ރޮޑްރިގޭޒްއަކީ ރޯމާއަށް ގެންދަން މޮރީނިއޯ ބޭނުންވާ ކުޅުންތެރިއެކެވެ. އަދި އޭނާ ހޯދުމުގެ މަސައްކަތް ރޯމާއިން ކުރާނެ ކަމަށް ބެލެވޭ ކަމަށް ވެސް މީޑިއާތަކުގައި ވަނީ ރިޕޯޓުކޮށްފައެވެ.

ރޯމާގެ ކޯޗުކަމާ މޮރީނިއޯ ހަވާލުވީ 2021 ވަނަ އަހަރުއެވެ. އޭނާ ވަނީ އެ ޓީމާ ހަވާލުވެ އިޓާލިއަން ލީގުގެ 6 ވަނަ މަގާމުގައި ސީޒަން ނިންމާލާފައެވެ. މީގެ އިތުރުން އޭނާ ވަނީ ރޯމާ އާއެކު 22-2021 ވަނަ އަހަރުގެ ޔުއެފާ ޔޫރޮޕާ ކޮންފަރެންސް ލީގު ކާމިޔާބުކޮށް ތާރީޚުން ވެސް ޖާގަ ހޯދާފައެވެ. އެއީ އެ މުބާރާތް ކާމިޔާބުކުރި ފުރަތަމަ ކޯޗުގެ ޝަރަފާއި، ޔޫރަޕުގެ މުބާރާތެއް ތަފާތު ހަތަރު ކުލަބާކާއެކު ހޯދި ފުރަތަމަ ކޯޗުގެ ޝަރަފެވެ.

އުމުރުން 31 އަހަރުގެ ރޮޑްރިގޭޒް ވަނީ މީގެ ކުރިން ބޮޑެތި ކުލަބުތަކަށް ކުޅެފައެވެ. އެގޮތުން އޭނާ ވަނީ ސްޕެއިންގެ ގަދަ އެއް ބާރު ރެއާލް މެޑްރިޑާއި، ޖަރުމަނު ލީގުގެ ގަދަ ބާރު ބަޔަން މިއުނިކަށް ވެސް ކުޅެފައެވެ. އަލް-ރައްޔާން އަށް ބަދަލުވުމުގެ ކުރިން އޭނާ ހުރީ އެވަރޓަންގައެވެ. ރޮޑްރިގޭޒް އަކީ ކޮލޮމްބިއާގެ ޤައުމީ ޓީމުގައި ވެސް ހިމެނޭ ކުޅުންތެރިއެކެވެ. އޭނާ ވަނީ ޤައުމީ ޓީމާއެކު 86 މެޗު ކުޅެ 24 ލަނޑު ޖަހާފައެވެ.