ބްރެޒިލްގެ ސައު ޕައުލޯ އާއެކު ސޮއި ކޮށްފައިވާ އެއްބަސްވުން އުވާލަން، ކޮލަމްބިއާގެ ކެޕްޓަން ހަމޭސް ރޮޑްރިގޭޒް ނިންމައިފި އެވެ.

އުމުރުން 33 އަހަރުގެ ކުޅުންތެރިޔާ ސައު ޕައުލޯ އަށް ބަދަލުވީ މިދިޔަ އަހަރު އެވެ. އެ ކުލަބާ އެކު އޭނާ ސޮއި ކުރީ ދެ އަހަރު ދުވަހުގެ އެއްބަސްވުމެއްގަ އެވެ. އެ އެއްބަަސްވުމުގެ މުއްދަތު ހަމަވާނީ 2025 ވަނަ އަހަރުގެ ޖޫން މަހުގެ ނިޔަލަށެވެ.

ނަމަވެސް ދާދި ފަހުން ނިމުނު ދެކުނު އެމެރިކާ ސަރަހައްދުގެ ފުޓުބޯޅަ މުބާރާތް (ކޮޕާ އެމެރިކާ)ގައި މޮޅު ކުޅުމެއް ދައްކާފައިވާ ރޮޑްރިގޭޒް ވަނީ، ބާކީ އެއް އަހަރު އޮއްވާ އެ ކުލަބާ އެކު ހަދާފައިވާ އެއްބަސްވުން އުވާލަން ނިންމައިފަ އެވެ. އެ ނިންމުން ނިންމީ، ސައު ޕައުލޯ އާއި ރޮޑްރިގޭޒްއާ ދެމެދު ކުރިއަށް ގެންދިޔަ މަޝްވަރާތަކަށްފަހު، ދެ ފަރާތް ވެސް އެއްބަސްވާ ގޮތެއްގެ މަތީންނެވެ.

ދެކުނު އެމެރިކާަ ފުޓުބޯޅަ މުބާރާތުގެ އެންމެ މޮޅު ކުޅުންތެރިޔާގެ މަގާމު ހޯދާފައިވާަ ރޮޑްރިގޭޒް ބޭނުން ވަނީ، އަލުން އެނބުރި ޔޫރަޕުގެ ފުޓުބޯޅަ އަށް ބަދަލުވާން ކަމަށް ރިޕޯޓުތައް ބުނެ އެވެ. އެހެންކަމުން ހިލޭ ޓްރާަންސްފާއެއްގައި އޭނާ ޔޫރަޕުގެ ކުލަބަކަށް އަލުން ބަދަލުވުމަކީ ގާތް ކަމެއް ކަމަށް ރިޕޯޓުތައް ބުނެ އެވެ.

ޕޯޓޯ، މޮނާކޯ، ރެއާލް މެޑްރިޑް، ބަޔާން މިއުނިކް އަދި އެވަޓަން އަށް ކުޅެފައިވާ ރޮޑްރިގޭޒް ވަނީ ހުނަރުވެރި އެޓޭކިން މިޑްފީލްޑަރެކެވެ.