ސައްޙަ ނޫން ފޯމު ހުށަހެޅުމުން ކުރާ ޖޫރިމަނާގެ އަދަބު މުރާޖާ ކުރަން ޕާޓީތަކުން އެދޭ
ސައްހަ ނޫން ކޮންމެ ފޯމަކަށް ޕާޓީ 10،000 ރުފިޔާ އިން ޖޫރިމަނާ ކުރާނެ
އިލެކްޝަންސް ކޮމިޝަން- އޮޅުވާލައިގެން ސިޔާސީ ޕާޓީތަކަށް މީހުން ވެއްދުން އިތުރުވެފައިވޭ
ސައްޙަ ނޫން ފޯމު ހުށައެޅުމުން ކުރާ ޖޫރިމަނާގެ އަދަބު މުރާޖާ ކުރަން ޕާޓީތަކުން އެދޭކަމަށް އިލެކްޝަންސް ކޮމިޝަން (އީސީ) އިން ބުނެފިއެވެ.
ރާއްޖޭގެ ސިޔާސީ ޕާޓީތަކުން ރަޖިސްޓްރީ ކުރުމަށް ހުށަހަޅާ ފޯމުތަކުގެ ތެރެއިން ސައްޙަ ނޫން ކޮންމެ ފޯމަކަށް 10،000 ރުފިޔާއިން ޖޫރިމަނާ ކުރަން އިލެކްޝަންސް ކޮމިޝަނުން ނިންމީ 1 ޖޫން 2022 ގައެވެ.
އޭރު އީސީން ބުނެފައިވަނީ ސައްހަ ނޫން ކޮންމެ ފޯމަކަށް ޕާޓީ 10،000 ރުފިޔާ އިން ޖޫރިމަނާ ކުރާއިރު، ފުރަތަމަ ފަހަރު ރަޖިސްޓްރާ 5،000 ރުފިޔާއިން ޖޫރިމަނާ ކުރާނެ ކަމަށެވެ. އަދި ދެފަހަރަށް ވުރެ ގިނައިން އެކަން ތަކުރާރު ކޮށްފިނަމަ ކޮންމެ ފަހަރަކު ރަޖިސްޓްރާ ވެސް 10،000 ރުފިޔާއިން ޖޫރިމަނާ ކުރަން ނިންމާފައިވާ ކަމަށް އީސީން ވަނީ ބުނެފައެވެ.
ޖޫރިމަނާ ކުރަން އީސީން ނިންމީ ސައްޙަ ނޫން ފޯމު ހުށަހެޅުން ހުއްޓުވުމަށެވެ. އަދި އެ ބަދަލުން ވެސް އެކަށީގެންވާ ހައްލެއް ނުލިބޭނަމަ ފޯމުގައި ސޮއި ކުރާ ކޮންމެ ހެކިވެރިޔަކުވެސް 5،000 ރުފިޔާއިން ޖޫރިމަނާ ކުރަން ނިންމާފައިވާ ކަމަށް އީސީން އެންގިއެވެ. އެގޮތަށް އަމަލު ކުރަން ނިންމާފައިވަނީ މިދިޔަ އަހަރުގެ އޮކްޓޯބަރު މަހުން ފެށިގެންނެވެ.
އީސީން މައުލޫމާތުދޭ ގޮތުގައި އެ ނިންމުމާއެކު، މިހާރު ސައްޙަ ނޫން ފޯމު ހުށައަޅާ މިންވަރު ވަނީ ބޮޑުތަނުން މަދުވެފައެވެ. އެގޮތުން ކުރިން 50 ވަރަކަށް މައްސަލަ ދުވާލެއްގެ މައްޗަށް ހުށަހެޅޭއިރު، މިހާރު އެ އަދަދު 5ށް ދަށްވެފައިވާކަމަށް އީސީން މައުލޫމާތު ދެއެވެ.
އެހެންނަމަވެސް، ޖޫރިމަނާގެ އަދަބު މިހާރު އޮތް ވަރަށްވުރެ ކުޑަ ކުރުމަށް ޕާޓީތަކުން ވަނީ އެދިފައެވެ. އެ ނިންމުން މުރާޖައާކުރުމަށް ބައެއް ސިޔާސީ ޕާޓީތަކުން އެދިފައިވާއިރު، އީސީން މިހާރު ގެންދަނީ އެކަމާ ގުޅޭ މަޝްވަރާތައްވެސް ކަމާބެހޭ ފަރާތްތަކާއެކު ކުރަމުންނެވެ.
އިލެކްޝަންސް ކޮމިޝަނަށް ސައްޙަ ނޫން ފޯމުތައް ހުށަހަޅާ ކަމުގެ ޝަކުވާތައް ވަނީ ވަރަށް ބޮޑަށް އިތުރުވެފައެވެ. އެގޮތުން، ބައެއް މީހުންނަށް ނޭނގި އެމީހުންގެ ފޯމުތައް އީސީއަށް ހުށަހަޅައި ޕާޓީތަކުގެ ދަފްތަރުގައި ޖައްސާ ކަމަށް ވެސް ގިނަ ފަރާތްތަކުން ދަނީ ބުނަމުންނެވެ. ގިނަ ފަހަރަށް މިގޮތަށް ސައްޙަ ނޫން ފޯމުތައް ހުށަހަޅަނީ ޕާޓީގައި 10،000 މެމްބަރުން ހަމަ ކުރުމަށެވެ.
އެއީ ޤާނޫނުގައި ބުނާ ގޮތުގައި ދައުލަތުގެ ބަޖެޓުން ފައިސާ ދޭން ޖެހޭނީ އެ އަދަދު ހަމަވާ ޕާޓީތަކަށް ކަމަށް ވާތީއެވެ.
އީސީން މީގެ ކުރިން ވެސް ސައްޙަ ނޫން ފޯމުތައް ހުށަހެޅުމުން ޕާޓީތައް ޖޫރިމަނާ ކުރިއެވެ. އޭރު ސައްހަ ނޫން ފޯމު ހުށަހަޅާނަމަ ކޮންމެ ފޯމަކަށް 5000 ރުފިޔާގެ ޖޫރިމަނާއެއް ކުރިއެވެ. ނަމަވެސް ސިޔާސީ ޕާޓީތަކަށް އުފުލަން ޖެހޭ ބުރަ ކުޑަ ކުރުމަށް ޖޫރިމަނާ ނުކުރަން ނިންމިއެވެ.
