ބަސް ދަތުރުގެ ޝެޑިއުލަށް ބަދަލެއް
9 ޖުލައި 2022 | ހޮނިހިރު 16:473 ރޫޓެއްގެ ޝެޑިއުލަށް ވަނީ ބަދަލު ގެނެސްފައި
އެމްޓީސީސީގެ ބަސްތައް
މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން މާލެ ސަރަހައްދުގައި ދެމުން އަންނަ ބަހުގެ ޚިދުމަތުގެ ޝެޑިއުލަށް ބަދަލު ގެނެސްފިއެވެ.
މިދިޔަ ހުކުރު ދުވަހުން ފެށިގެން އެ ކުންފުނިން ބަދަލު ގެނެސްފައިވަނި މާލެ އާއި ހުޅުމާލެ ފުރަތަމަ ފިޔަވައްސާއި ދެމެދު ދަތުރު ކުރާ 2 ރޫޓެއްގެ ޝެޑިއުލް އަށެވެ. އެއީ މާލެ ވެސްޓް ޕާކްއާއި ހުޅުމާލެ ފުރަތަމަ ފިޔަވައްސާއި، ކާނިވަލްއާއި ހުޅުމާލެ ފުރަތަމަ ފިޔަވަހީގެ ދަތުރުތަކެވެ.
އެ ކުންފުނިން ވަނީ މި 2 ރޫޓުގެ ބަސް ދަތުރުތައް އިތުރުކޮށްފައެވެ. އެގޮތުން، މިހާރު މި 2 ރޫޓޫގައި ދަންވަރު 12:15 އާ ހަމައަށް ދަތުރުތައް އޮންނާނެ ކަމަށް އެމްޓީސީސީން ބުންޏެވެ.
މި ބަދަލާއެކު ދަންވަރު 12:00 ގައި ޑިއުޓީ ނިންމާލުމަށްފަހު ދަތުރު ކުރަން ބޭނުންވާ ފަރާތްތަކަށް އެ އިންތިޒާމް ހަމަޖެހިފައިވާނެ ކަމަށް އެމްޓީސީސީން ބުންޏެވެ.
މާލެ އާއި ހުޅުމާލޭގެ ދަތުރުތަކުގެ އިތުރުން ހުޅުމާލެ ދެވެނަ ފިޔަވަހިން އެއަރޕޯޓަށް ކުރާ ދަތުރުތަކަށް ވެސް އެމްޓީސީސީން ވަނީ ބަދަލުތައް ގެނެސްފައެވެ. އެގޮތުން، ކުރިން 1 ގަޑިއިރުން ދަތުރުތައް އޮންނައިރު މިހާރު ކޮންމެ 30 މިނެޓަުން ދަތުރުތައް އޮންނާނެ ކަމަށް އެ ކުންފުނިން ބުންޏެވެ. މިއީ ދެވަނަ ފިޔަވަހިން އެއަރޕޯޓަށް ވަޒީފާއަށް ދާ ފަރާތްތަކާއި ފުރުމަށް އެއަރޕޯޓަށް ދާ ފަރާތްތަކަށް ލިބޭނެ ލުޔެއް ކަމަށް އެމްޓީސީސީން ބުންޏެވެ.
އެ ކުންފުނިން ބުނީ އަބަދުވެސް މަސައްކަތް ކުރަނީ ރައްޔިތުން އެދޭފަދަ ލުއިފަސޭހަ، ހިތްހަމަޖެހޭ އަދި ރައްކާތެރި ހިދުމަތެއް ފޯރުކޮށްދިނުމަށް ކަމަށާއި ބަސް ދަތުރުތަކުގެ ވަގުތު އިތުރުކުރުމުން ގިނަ ބަޔަކަށް އޭގެ ލުއި ލިބޭނެ ކަމަށެވެ. އަދި މި ބަދަލާއެކު އޮޕަރޭޓް ކުރާ ބަހުގެ އަދަދު އިތުރުވާނެ ކަމަށްވެސް އެމްޓީސީސީން ބުންޏެވެ.
