ޝިންޒޯ އަބޭގެ ހަށިކޮޅު، ޓޯކިޔޯގައި ހުންނަ އޭނާގެ ގެކޮޅަށް ގެންދެވިއްޖެ

ކެމްޕެއިން ހަރަކާތެއްގައި ހުންނަވަނިކޮން ހުކުރު ދުވަހު ބަޑިޖަހައި އަވަހާރަކޮށްލެވުނު، ޖަޕާންގެ ކުރީގެ ބޮޑުވަޒީރު ޝިންޒޯ އަބޭގެ ހަށިކޮޅު، މޮޓޯކޭޑްގައި ޓޯކިޔޯގައި ހުންނަ އޭނާގެ އަމިއްލަ ގެކޮޅަށް ގެންދެވިއްޖެއެވެ. މޮޓޯކޭޑްގެ އެއްކާރުގައި އަނބިކަނބަލުންވެސް ދަތުރުކުރައްވާފައިވެއެވެ.

އަބޭ އަވަހާރަކޮށްލާފައިވަނީ ދެކުނުގެ ސިޓީ އެއްކަމަށްވާ ނާރާގައި ބޭއްވުނު ހަރަކާތަކަށް ވަޑައިގެން ހުންނަވަނިކޮންނެވެ. ހާދިސާ ތަހުގީގުކުރަމުންދާ ފުލުހުން ބުނެފައިވާގޮތުގައި އަބޭއަށް ހަމަލާ ދިން އުމުރުން 41 އަހަރުގެ ޓެސޫޔާ ޔަމަގާމީ ބުނެފައިވަނީ، އަބޭއަވަހާރަކޮށްލީ ވަކި ޖަމާއަތަކާ ގުޅުން އޮންނާތީ އެކަމާ ހިތްހަމަ ނުޖެހިގެން ކަމުގައެވެ. ހަމަލާދިނުމަށް އޭނާ ބޭނުންކޮށްފައިވަނީ އަމިއްލަޔަށް ހަދާފައިވާ ބަޑިއެއް ކަމަށް ވެއެވެ. އަދި ބަޑިޖެހުމަށްފަހު އޭނާ ފިލަން މަސައްކަތްކޮށްފައި ނުވާކަމަށްވެސް ފުލުހުން ބުނެފައިވެއެވެ.

ޝިންޒޯ އަބޭގެ ހަށިކޮޅު އުފުލި މޮޓޯކޭޑް، ގެކޮޅާ ގާތްކުރިއިރު އަބޭގެ ލިބަރަލް ޑިމޮކްރެޓިކް ޕާޓީގެ މެމްބަރުން ކަޅު ހެދުމުގައި، އަބޭއަށް އިހުތިރާމް އަދާ ކުރެއްވުމުގެ ގޮތުން ބަރިއަކަށް އެތުރިގެން ތިއްބެވެ. މިހާރުގެ ބޮޑުވަޒީރު ފުމީއޯ ކިޝީޑާއަކީވެސް އެލްޑީޕީގެ މެމްބަރަކަށް ވާއިރު، އޭނާ މެންދުރު ފަހުގެ ވަގުތެއްގައި ވަޑައިގަންނަވާނެކަމަށް ޚަބަރުލިބެއެވެ.

ޝިންޒޯ އަބޭއަށްޓަކައި ހޯމަ ދުވަހުގެ ރޭ ޖަޕާންގެ ސަގާފަތާ އެއްގޮތަށް ކުރެވޭ އަޅުކަމުގެ ޚާއްސަ ހަރަކާތެއް ބޭއްވުމަށް ވަނީ ހަމަޖެހިފައެވެ. އެއަށްފަހު އެމަނިކުފާނުގެ ޖަނާޒާ އޮންނާނީ އަންގާރަ ދުވަހުއެވެ.

ޝިންޒޯ އަބޭއަކީ ޖަޕާނުގައި އެންމެ ގިނަ ދުވަހު ބޮޑުވަޒީރުކަންކުރައްވާފައިވާ، އަދި ވަރަށް ގިނަ ބައެއްގެ ލޯބި ލިބިވަޑައިގެން ހުންނެވި ލީޑަރެކެވެ.

ޝިންޒޯ އަބޭ އަވަހާރަކޮށްލުމާ ގުޅިގެން ދުނިޔޭގެ ވަރަށް ގިނަ ލީޑަރުން ވަނީ ތައުޒިޔާގެ މެސެޖް ފޮނުއްވާފައެވެ.