އިގިރޭސި ބޮޑުވަޒީރުގެ މަގާމަށް އިތުރު ބޭފުޅަކު ކުރިމަތިލައްވައިފި
9 ޖުލައި 2022 | ހޮނިހިރު 07:21އިގިރޭސި ބޮޑުވަޒީރު ބޮރިސް ޖޯންސަން އިސްތިއުފާދެއްވާފައިވަނީ ސަރުކާރުގެ ފަންސާހަކަށް އިސް މެމްބަރުން ވަކިވެވަޑައިގަތުމުން
ކެމީ ބެޑެނޮކް - އިގިރޭސި ވިލާތުގެ ބޮޑުވަޒީރު ކަމަށް ކުރިމަތިލައްވާނެކަން އިއުލާނުކުރައްވާފައިވޭ
އިގިރޭސިވިލާތުގެ ހުސްވެފައިވާ ބޮޑުވަޒީރުގެ މަގާމަށް ކުރިމަތިލައްވަން ގަސްތުކުރައްވާކަން އިތުރު ބޭފުޅަކު އިއުލާންކުރައްވައިފިއެވެ. އެބޭފުޅަކީ ކޮންޒަރވޭޓިވް ޕާޓީގެ އެމްޕީ، އިގިރޭސި ސަރުކާރުގެ ކުރީގެ އިކުއަލިޓީސް މިނިސްޓަރ ކެމީ ބެޑެނޮކްއެވެ. "ދަ ޓައިމްސް"އަށް ދެއްވި "އޮޕީނިއަން އާޓިކަލް" އެއްގައި ބެޑެނޮކް ވިދާޅުވީ، އޭނާ ބޭނުންފުޅުވަނީ ކުޑަ ނަމަވެސް ވަރުގަދަ ސަރުކާރެއް ކަމަށާއި، އަދި ފޯކަސްކުރައްވަން ބޭނުންފުޅުވަނީ ތެދު ހާމަކުރެއްވުމާއެކު އެންމެ ޒަރޫރީ ކަންކަން އިތުރަށް ފުރިހަމަ ކުރެއްވުމަށް ކަމުގައެވެ.
އުމުރުފުޅުން 42 އަހަރުގެ ކެމީ ބެޑެނޮކްއަކީ "ސެފްރަން ވޯލްޑަން" ކިޔާ ދާއިރާއިން ހޮވިވަޑައިގެންނެވި މެމްބަރެވެ. އޭނާވެސް މަގާމުން އިސްތިއުފާދެއްވާފައިވަނީ މިދިޔަ ހަފުތާގައި، ބޮޑުވަޒީރު ބޮރިސް ޖޯންސަންގެ އިސްތިއުފާއަށް ގޮވާލައި މެމްބަރުން ކުރި އިހުތިޖާޖުގެތެރެއިންނެވެ. ބެޑެނޮކް އިތުރަށް ވިދާޅުވީ، ހޮވިވަޑައިގެންފިނަމަ ޓެކްސް ކުޑަކުރައްވާނެކަމަށާއި، ހަމަ އެއާއެކު ޚަރަދުތައް ކުރުމުގައި ހިފެހެއްޓުންތެރިކަން ގެންގުޅުއްވާނެ ކަމަށެވެ.
ބޮޑުވަޒީރުގެ މަގާމަށް ކުރިމަތިލައްވަން ގަސްދުކުރައްވާކަން މިހާތަނަށް ހާމަކުރެއްވި އެންމެ އިސް އެއް ބޭފުޅަކީ ކުރީގެ ޗާންސެލަރ ރިޝީ ސުނަކްއެވެ. އޭނާވަނީ ހުކުރު ދުވަހު އެކަން އިއުލާންކުރައްވާފައެވެ. ދެން ކުރިމަތިލައްވާނެކަމަށް ބެލެވޭ އެހެން ބޭފުޅުންގެ ތެރޭގައި; ކުރީގެ ހެލްތު ސެކްރެޓަރީ ސާޖިދު ޖާވީދު، މިހާރުގެ ޑިފެންސް ސެކްރެޓަރީ ބެން ވޮލަސް، އަދި ކުރީގެ ފޮރިން ސެކްރެޓަރީ ޖެރެމީ ހަންޓް ހިމެނި ވަޑައިގަންވައެވެ.
ސަރުކާރުގެ ފަންސާހަކަށް އިސް ބޭފުޅުން އެކުއެކީހެން އިސްތިއުފާދެއްވުމާ ގުޅިގެން ބޮޑުވަޒީރު ބޮރިސް ޖޯންސަން އިސްތިއުފާދެއްވާފައިވަނީ ބުރާސްފަތި ދުވަހު، މަޖްބޫރުވެ ވަޑައިގެންނެވެ. ނަމަވެސް އައު ބޭފުޅަކު ހޮވިވަޑައިގަންނަވަންދެން މަޑުކުރައްވާނެ ކަމަށް ވިދާޅުވެފައިވެއެވެ.
އަންނަ ސެޕްޓެމްބަރ މަސް ފެށެންވާއިރަށް އައު ބޮޑުވަޒީރަކު އައްޔަންކުރެވޭނެ ކަމަށް ދަނީ ބެލެވެމުންނެވެ.
