ދުނިޔޭގެ އިގްތިސާދު ރިސެޝަނަކަށް ނުދާނެއޭ ބުނަން ދަތި: އައިއެމްއެފް

މިހާރު ދުނިޔޭގެ އިގްތިސާދު އޮތް ހާލަތަށް ބަލައި ރިސެޝަނަކަށް ނުދާނެއޭ ބުނަން ދަތި ކަމަށް އިންޓަނޭޝަނަލް މަނިޓަރީ ފަންޑް (އައިއެމްއެފް) އިން ބުނެފިއެވެ.

ބުދަ ދުވަހު ރޮއިޓަރސްއާ ވާހަކަދައްކަވަމުން އައިއެމްއެފްގެ މެނޭޖިން ޑިރެކްޓަރު ކްރިސްޓަލީނާ ޖޯރޖީވާ ވިދާޅުވީ ދުނިޔޭގެ އިގްތިސާދު މިއަހަރު އެކަނިވެސް 3 ފަހަރު މަތިން 3.6 އިންސައްތައަށް ވެއްޓިފައިވާ ކަމަށެވެ. މީގެ އަސްލު އަދަދުތައް މިހާރު އައިއެމްއެފްގެ އިކޮނޮމިސްޓުން ބަލަމުންދާ ކަމަށް ވެސް އޭނާ ވިދާޅުވިއެވެ.

މިއަހަރުގެ ކުރިއަށް އޮތް ދުވަސްތަކާއި 2023 ގައި ދުނިޔޭގެ އިގްތިސާދު އޮންނާނެ ކަމަށް ލަފާކޮށް ހަދާ ރިޕޯޓް އައިއެމްއެފް އަށް އާއްމު ކުރެވޭނެ ކަމަށް ލަފާ ކުރެވެނީ މި ޖުލައި މަހުގެ ފަހުކޮޅުގައެވެ.

ކްރިސްޓަލީނާ ވިދާޅުވި ގޮތުގައި އޭޕްރިލް މަހުން ފެށިގެން ދުނިޔޭގެ އިގްތިސާދު ދަނީ ހީނަރުވަމުން ކަމަށެވެ. އެގޮތުން ދުނިޔޭގެ އެކި ޤައުމުތަކުގައި ތަކެތީގެ އަގު އުފުލުމާއި ޗައިނާ ފަދަ ބޮޑެތި އިގްތިސާދުތައް މަޑުޖެހުން ފަދަ ކަންކަން ހިމެނޭ ކަން އޭނާ ފާހަގަކުރެއްވިއެވެ.

ރޮއިޓަރސް އިން ކްރިސްޓަލީނާ އާ ދުނިޔޭގެ އިގްތިސާދު ރިސެޝަނަކަށް ގޮސްދާނެ ކަމަށް ސުވާލު ކުރުމުން އޭނާ ވިދާޅުވީ ގޮންޖެހުންތައް އިތުރުވެފައިވާ ކަމަށާއި ރިސެޝަނަކަށް ނުދާނެ ކަމަށް ނިންމޭކަށް ނެތް ކަމަށެވެ. އަދި 2022 ވަނަ އަހަރުގެ ކުރިއަށް އޮތް ދުވަސްތަކަކީ ދަތި ދުވަސްތަކަށް ވާނެ ކަމަށާއި 2023 އެއަށްވުރެ ދަތިވާނެ ކަމަށް ވެސް އޭނާ ވިދާޅުވިއެވެ.

ދުނިޔޭގެ އިގްތިސާދަށް އައި ލޮޅުމުގެ އެއް ސަބަބެއްގެ ގޮތުގައި ރަޝިއާ-ޔޫކްރެއިން ހަނގުރާމަ ފާހަގަ ކުރެއްވިއެވެ.

އެންމެ ފަހުގެ އިގްތިސާދީ ޑޭޓާތައް ދައްކާ ގޮތުގައި ދުނިޔޭގެ ބޮޑެތި އިގްތިސާދުތައް ކަމަށްވާ ޗައިނާ އާއި ރަޝިއާގެ އިގްތިސާދު ވަނީ އަހަރުގެ 2ވަނަ ކުއާޓާގައި ވަރަށް ބޮޑަށް ދަށްވެފައެވެ.

ދުނިޔޭގެ އިގްތިސާދު މިހާރު އޮތް ހާލަތުގެ ސަބަބުން ރިސެޝަނަކަށް ދިޔުމުގެ ބިރު އެބައޮތް ކަމަށް ބޮޑެތި އިންވެސްޓަރުންނާއި މާކެޓް ދިރާސާ ކުރާ ފަރާތްތަކުން ވެސް ދަނީ ބުނަމުންނެވެ.