ޖެޓް ފިއުލް ހުހެއް ނުވޭ، އައު ޝިޕްމަންޓް 14 ވަނަ ދުވަހު އަންނާނެ: އެމްއޭސީއެލް
ތެޔޮ ވިއްކާ މިންވަރު ކޮންޓްރޯލްކޮށްފައިވޭ
އެމްއޭސީއެލް އާއި އެސްޓީއޯއިން ބޭއްވި ނޫސްވެރިންގެ ބައްދަލުވުން
ޖެޓް ފިއުލް ވިއްކުން ކޮންޓްރޯލް ކުރިނަމަވެސް ޖެޓް ފިއުލް ހުސްނުވާ ކަމަށް މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް)އިން ބުނެފިއެވެ.
ބައެއް މީޑިއާތަކުން ޖެޓް ފިއުލް ހުސްވެފައިވާ ކަމަށް ޚަބަރުތައް ފަތުރަމުންދާތީ އެކަމާއި ގުޅިގެން އެމްއޭސީއެލްގެ މީޑިއާ އޮފިޝަލާއި ސުވާލުކުރުމުން ވިދާޅުވީ ތެޔޮ ވިއްކާ މިންވަރު ކޮންޓްރޯލް ކޮށްފައިވާ ކަމަށާއި ނަމަވެސް ތެލުގެ ޝޯރޓޭޖެއް ނެތް ކަމަށެވެ. މިދުވަސްކޮޅު ފްލައިޓްތައް އިތުރުވެފައިވާތީ އިތުރަށް ތެޔޮ ބޭނުންވާ ކަމަށާއި އައު ތެލުގެ ޝިޕްމަންޓް ލިބޭނީ މި މަހުގެ 14 ވަނަ ދުވަހު ކަމަށް ވެސް އޭނާ ވިދާޅުވިއެވެ.
ރާއްޖޭގައި ފްލައިޓްތަކަށް އަޅާ ތެޔޮ މަދުވެ، އެއަރލައިންތަކަށް ވިއްކާ ތެޔޮ ކޮންޓްރޯލްކޮށްފައިވާކަމަށް ބުނެ ބައެއް ނޫސްތަކުން ރިޕޯޓްކުރުމާ ގުޅިގެން އަންގާރަ ދުވަހު ބޭއްވި ނޫސްވެރިންގެ ބައްދަލުވުމުގައި އެމްއޭސީއެލްގެ ޑެޕިއުޓީ މެނޭޖިންގ ޑިރެކްޓަރ އިބްރާހިމް ޠާހާ ވިދާޅުވީ އެކުންފުނީގެ ފިއުލް ކެޕޭސިޓީއަކީ 13 މިލިއަން ލީޓަރުގެ ކެޕޭސިޓީ ކަމަށެވެ. ކޮންމެ ދުވަސްވަރަކާ ދިމާކޮށް އެ އަދަދު ހޭދަވާނެ ގޮތް ފޯކާސްޓްކޮށް، މެނޭޖް ކުރަމުންދާ ކަމަށެވެ. ނަމަވެސް މި ދުވަސްވަރު ވެލާނާ އިންޓަރނޭޝަނަލް އެއަރޕޯޓުން ތެޔޮ ނަގާ މިންވަރު އިތުރުވެފައިވާ ކަމަށާއި، އެގޮތުން ލަންކާއާ ރާއްޖެއާ ދެމެދު ކުރާ ދަތުރުތަކުގައި، ދެކޮޅަށް ވާވަރަށްވެސް އެ އެއަރޕޯޓުން ތެޔޮ އަޅާކަމަށް އޭނާ ވިދާޅުވިއެވެ.
ތޯހާ ވިދާޅުވީ ލަންކާގެ ހާލަތާއެކު، އެއަރޕޯޓުން ތެޔޮ ފޯރުކޮށްދިނުމުގައި ގޮންޖެހުންތަކެއް ހުރިނަަމަވެސް ރަނގަޅަށް މެނޭޖްކުރެވޭނެ ކަމަށެވެ. އެގޮތުން، ފްލައިޓްތަކަށް މިހާރު ތެޔޮ އަޅައިދެނީ އެ ފްލައިޓެއް ދަތުރުކުރާ މަންޒިލަށް ބަލައި އެ މަންޒިލަކަށް ދާން ތެޔޮ ބޭނުންވާ އެންމެ މަދު މިންވަރަށް ކަމަށްވެސް އޭނާ ވިދާޅުވިއެވެ. މިގޮތަށް ތެޔޮ ފޯރުކޮށްދިނުމުގައި ބައިނަލްއަގުވާމީ މިންގަނޑުތަކާ ޚިލާފުނުވާކަމުގެ ޔަގީންކަން އެމްއޭސީއެލުން ދެއެވެ.
އެމްއޭސީއެލްއާ އެސްޓީއޯއާ ދެމެދު ވެފައިވާ އެއްބަސްވުމުގެ ދަށުން، އެއަރލައިންތަކަށް ބޭނުންވާ ތެޔޮ ފޯރުކޮށްދެނީ އެސްޓީއޯއިންނެވެ. އެ ކުންފުނިން މިދުވަސްވަރު ތެޔޮ ގެނައުމުގައި ދަތިތަކެއް ހުރިކަން ވަނީ ފާހަގަކޮށްފައެވެ.
އެސްޓީއޯގެ ސީއީއޯ އަދި މެނޭޖިންގ ޑިރެކްޓަރ ހުސައިން އަމްރު ވިދާޅުވީ، ރާއްޖެއަށް ތެޔޮ އެތެރެކުރުމަށް، ތެޔޮ އަޅާ "ލޯޑު ޕޯރޓަށް" 1 މަސްދުވަސް ކުރިން އަންގަންޖެހޭ ކަމަށާއި، މިހާރު ދިމާވެފައިވާ މައްސަލައަކީ، 1 މަސްދުވަސް ކުރިން ހަދާފައި އޮތް ޝެޑިއުލަކަށް ފޯރކާސްޓް ނުކުރެވި، އިތުރަށް ކޭޓަރކުރަން ޖެހުން ކަމަށެވެ. އަދި މި ދުވަސްވަރު ރަޝިއާ ހަނގުރާމައާ ގުޅިގެން ބޯޓުތައް ޑައިވަރޓްކޮށް، ޕޯރޓުތައް ކޮންޖެސްޓުވުމުން ޝިޕްމަންޓުތައް ލަސްވާކަންވެސް އަމްރު ފާހަގަކުރެއްވިއެވެ.
އަމްރު ވިދާޅުވީ ދިމާވާ ދަތިތަކާއެކުވެސް އެއަރލައިންތަކަށް ދަތިނުވާނެހެން ބަފަރ ސްޓޮކެއް ބަހައްޓާފައި ހުންނަކަމަށެވެ. ތެޔޮ ލިބުމުގައި ހުރި ދަތިތަކާއި ޑިމާންޑު އިތުރުވުމާއެކުވެސް މެނޭޖްކުރެވޭނެ ކަމަށްވެސް އަމްރު ވިދާޅުވިއެވެ.
