މިދިޔަ ސީޒަންގައި ލިވަޕޫލަށް ކުޅުނު ފޯވާޑް ޑިވޯކް އޮރިގީ އިޓަލީގެ އޭސީ މިލާނަށް ބަދަލުވެއްޖެއެވެ.
ލިވަޕޫލާއެކު އޮރިގީ ހަދާފައިވާ އެއްބަސްވުމުގެ މުއްދަތު ހަމަވީ ނިމުނު ޖޫން މަހުގެ ނިޔަލަށެވެ. އެހެންކަމުން އޭނާ މިލާނަށް ބަދަލުވީ ހިލޭ ޓްރާންސްފަރއެއްގައެވެ.
2015 ވަނަ އަހަރު ލިވަޕޫލްއާ ގުޅުނު ފަހުން އޮރިގީ ވަނީ މޮޅު ކުޅުމެއް ދައްކާފައެވެ. އަދި ޓީމަށް މުހިންމު ލަނޑުތަކެއްވެސް އޮރިގީ ކާމިޔާބު ކޮށްދިނެވެ.
މީގެ ތެރޭގައި ޔުއެފާ ޗެމްޕިއަންސް ލީގުގެ ސެމީ ފައިނަލުގައި ބާސެލޯނާގެ ފަހަތުން އަރައި މޮޅުވި މެޗުގައި އޭނާ ޖެހި ދެ ލަނޑު ފާހަގަކުރެވެއެވެ. އަދި 2019 ވަނަ އަހަރު އެވަޓަންއާ ބައްދަލުކުރި މެޗުގެ ފަހު ވަގުތު ލަނޑުޖަހައި އޭނާ ވަނީ ޓިމު މޮޅުކޮށްދީފައެވެ. ނަމަވެސް ފަހަކަށް އައިސް އޭނާއަށް ޓީމުގައި އެދެވޭވަރުގެ ކުޅުމެއް ދެއްކިފައެއްނުވެއެވެ.
