ފްރާންސްގައި އައު ކެބިނެޓެއް އިއުލާންކޮށްފި

ފްރާންސްގެ ރައީސް އިމެނުއަލް މެކްރޯންގެ ވެރިކަން ކުރާ ޕާޓީއަށް އޮތް އަގުލަބިއްޔަތު  އެންމެ ފަހުން ބޭއްވުނު ޕާލިއަމެންޓް އިންތިޚާބްގެ ދެވަނަ ބުރުގައި ގެއްލުމާއި ގުޅިގެން އައު ސަރުކާރެއް އެކުލަވާލެވިފައިވާކަން އެލީސީ ގަޑުވަރުން ވަނީ ހޯމަ ދުވަހު އިއުލާން ކޮށްފައެވެ. އެފަރާތުން ނެރުނު ބަޔާނެއްގައިވާ ގޮތުން ބޮޑުވަޒީރު އެލިޒަބަތު ބޯންގެ ދަށުން މަސައްކަތް ކުރެއްވުމަށް އަލަށް އައްޔަން ކުރެވުނު މިނިސްޓަރުންނަކީ ސިޔާސީ އައު އިސްލާހުތަކަށް މަރުހަބާ ކިޔާ ޕާޓީތަކުގެ ބޭފުޅުންނެވެ.

ފްރާންސްގެ ކެބިނެޓަށް ގެނެވުނު "ރިޝަފްލް" ނުވަތަ ބަދަލުތަކުގެ ދަށުން ސަރުކާރުގެ ތަރުޖަމާންގެ މަގާމަށް އައްޔަންކޮށްފައިވަނީ ކުރީގެ ހެލްތު މިނިސްޓަރު އޮލީވިއޭ ވޭއޯން އެވެ. އަދި ހެލްތު މިނިސްޓަރަކަށް އައްޔަންކޮށްފައި ވަނީ ފްރާންސުއާ ބްރައުން އެވެ.

ކުރިން ތިއްބެވި މަގާމުގައި ބައެއް މިނިސްޓަރުން ތިއްބެވި އިރު މީގެތެރޭގައި މުހިންމު މަގާމްތައްކަމަށްވާ އިންޓީރިއަރ މިނިސްޓަރު، ފައިނޭންސް މިނިސްޓަރު، އަދި ފޮރިން މިނިސްޓަރު ހިމެނިވަޑައިގަންވައެއެވެ.

އައު ކެބިނެޓް އިއުލާނު ކުރެވުމާއިއެކު ރައީސް މެކްރޯން ވަނީ އަލަށް ގުޅިވަޑައިގެންނެވި މެމްބަރުންނާއެކު ބައްދަލުވުމެއް ބާއްވަވާފައެވެ.

ފްރާންސްގެ މިހާރުގެ ބޮޑުވަޒީރު އުމުރުފުޅުން 61 އަހަރުގެ އެލިޒަބަތު ބޯންއަކީ 1990 ގެ އަހަރުތަކަށް ފަހު އެގައުމުގައި އެމަގާމަށް ވަޑައިގެންނެވި ފުރަތަމަ އަންހެން ބޮޑުވަޒީރެވެ. އެކަމަނާ މަގާމާ ހަވާލުވެވަޑައިގެންފައިވަނީ މިއަހަރުގެ މޭމަހުއެވެ.