ރެއާލް މެޑްރިޑަށް ކުޅެމުން އަންނަ ބްރެޒިލްގެ ސެންޓަރ ބެކް އެޑާ މިލިޓާއޯގެ ކޮންޓްރެކްޓް އައުކޮށްފިއެވެ.

މިލިޓާއޯއާއެކު ރެއާލްއިން މީގެ ކުރިން ހަދާފައިވާ އެއްބަސްވުމުގެ މުއްދަތު ހަމަވާނީ 2025 ވަނަ އަހަރުއެވެ. ކޮންޓްރެކްޓް އައުކުރީ 2028ގެ ނިޔަލަށެވެ. މި ކޮންޓްރެކްޓާއެކު އޭނާގެ ރިލީޒް ކްލޯސްވަނީ 1 ބިލިއަނަށް އަރާފައެވެ.

މިލިޓާއޯ ރެއާލް މެޑްރިޑާ ގުޅުނީ 2019 ވަނަ އަހަރުއެވެ. އޭގެ ކުރިން 6 މަސްދުވަހު އޭނާ ވަނީ ޕޯޗުގަލްގެ ޕޯޓީއަށް ކުޅެފައެވެ. މިލިޓާއޯއަށް ރެއާލްގެ ފުރަތަމަ 11ން ޖާގަ ލިބެންފެށީ 2020/21 ވަނަ ސީޒަންގެ މެދުތެރެއިން، އެޓީމުގެ ވެރާންއާއި ސާޖިއޯ ރާމޯސްއަށް އަނިޔާވެގެންނެވެ. އޭގެ ފަހުން އޭނާ އަންނަނީ ރެއާލްގެ ފުލް ޓީމުން ބަރާބަރަށް ޖާގަ ހޯދަމުންނެވެ.

މިލިޓާއޯގެ އިތުރުން ލުކަ މޮޑްރިޗް، ވިނީޝިއޫސް ޖޫނިއަރ އަދި ރޮޑްރީގޯ ވަނީ ރެއާލްއާއެކު ހަދާފައިވާ އެއްބަސްވުމުގެ މުއްދަތު އައުކޮށްފައެވެ.