ކުނި މެނޭޖް ކުރުމާ ބެހޭ ޤަވާއިދުގެ ދަށުން ކަނޑަ އަޅާފައިވާ މިންގަނޑުތަކާ ޚިލާފުވެ، ކަނޑަށް ކުނި އަޅާފައިވާތީ ނަކައި ރިސޯޓް ގްރޫޕުން ވ. އަލިމަތާ ގައި ހިންގާ ނަކައި އަލިމަތާ ރިސޯޓް ޖޫރިމަނާ ކޮށްފިއެވެ.

އެންވަޔަރަމަންޓް ޕްރޮޓެކްޝަން އެޖެންސީ (އީޕީއޭ)އިން އެ ރިސޯޓް ޖޫރިމަނާ ކުރީ 312،750 ރުފިޔާއިންނެވެ. އީޕީއޭއިން ބުނީ އެ ރިސޯޓް ޖޫރިމަނާ ކުރީ ކުނިވާޒާތުގެ ކުނި ކަނޑަށް އެޅުމުން ކުނި މެނޭޖް ކުރުމާ ބެހޭ ގަވާއިދާ އެ ރިސޯޓުން ޚިލާފުވެފައިވާތީ ކަމަށެވެ.

ޖޫރިމަނާ ދެއްކުމަށް އީޕީއޭއިން ވަނީ ނަކައި އަލިމަތާ ރިސޯޓަށް 30 ދުވަހުގެ މުއްދަތެއް ދީފައެވެ.

ވ. އަތޮޅުގައި އޮންނަ އަލިމަތާ ރިސޯޓުންނާއި އެ އަތޮޅުގައި އޮންނަ ދިއްގިރި ރިސޯޓުން މޫދަށް ކުނި އަޅާ މައްސަލައެއް އެ އަތޮޅުގެ ކައުންސިލުން ވެސް ވަނީ ފެންމަތިކޮށްފައެވެ. ރިސޯޓަކުން އުކާލާ ތަކެތި ކަނޑައަށް އަޅާ މަންޒަރު ފެންނަ ވީޑިއޯއެއް ހިއްސާކުރައްވައި ވ. އަތޮޅު ކައުންސިލްގެ ރައީސް ޝުޖާއު އަލީ ވިދާޅުވީ ފުޑް ވޭސްޓް މޫދަށް އެޅުމަކީ ގާނޫނުން މަނާ ކަމެއް ކަމަށާއި އަލިމަތާ އާއި ދިއްގިރި ރިސޯޓުން މިހާރުވެސް މޫދުަށް ކުނި އަޅާކަމަށެވެ.

ރިސޯޓުތަކުގައި އުފެދޭ ކުނީގެ ތެރެއިން އަމިއްލައަށް ހަލާކުވާޒާތުގެ ކުނި ކަނޑަށް އެޅުން ޓޫރިޒަމް މިނިސްޓްރީގެ ގަވާއިދެއްގެ ދަށުން ކުރިން އޮންނަނީ ހުއްދަ ކޮށްފައެވެ. ނަމަވެސް ކުނި އެޅުން އިތުރުވެ، ރިސޯޓުތަކާ ކައިރި ރަށްތަކަށް އޭގެ އަސަރު ކުރުން އިތުރުވުމުގެ ސަބަބުން ޓޫރިޒަމް މިނިސްޓްރީން ވަނީ އެ ގަވާއިދު އިސްލާހުކޮށް ކަނޑަށް ކުނި އެޅުން މަނާ ކޮށްފައެވެ.

ބައެއް ރިސޯޓުތަކުން އަދިވެސް ކަނޑަށް ކުނި އަޅާކަމަށް އެ ރިސޯޓުތަކާ ކައިރި ރަށްތަކުން ބުނަމުންއަންނަ އިރު ބައެއް ރިސޯޓުތަކުން ދަނީ ކުނި ނައްތާލުމަށް އަމިއްލަ މަސައްކަތްތަކެއް ވެސް ކުރަމުންނެވެ. އެގޮތުން، ދެމެހެއްޓެނިވި ގޮތެއްގައި ކުނި ނައްތާލުމާއި ރިސައިކަލް ކުރުމަށް ރާއްޖޭގެ ބައެއް ރިސޯޓުތަކުން މިހާރު އިސްކަމެއް ދެއެވެ.