ފިރިހެން ފައިނަލްގައި އެމް.އެން.ޔޫ އާއި ވިލާ، އަންހެން ފައިނަލްގައި ސީ.އެޗް.އެސް.އީ އާއި އަހުމަދިއްޔާ

ވިލާ ކޮލެޖްގެ ސްޓުޑެންޓް އެސޯސިއޭޝަން (ވީ.ސީ.އެސް.އޭ)ގެ ފަރާތުން އިންތިޒާމުކޮށްގެން ބާއްވާ ޓްރިޕަލް ތްރެޓް ބާސްކެޓްބޯލް ޓޯނަމެންޓް 2022 (ޓީ.ޓީ.ބީ.ޓީ)ގެ ފައިނަލްގައި ވާދަކުރާނެ ޓީމުތައް ކަށަވަރުވެއްޖެއެވެ.

ފައިނަލްގެ ޓީމުތައް ކަށަވަރުވީ އާދިއްތަ ދުވަހުގެ ރޭ ކުޅުނު ސެމީ ފައިނަލްގެ މެޗުތަކަށްފަހުއެވެ. އާދިއްތަ ދުވަހުގެ ރޭ ފުރަތަމަ ކުޅުނީ އަންހެން ޑިވިޝަންގެ ދެ ސެމީ ފައިނަލްއެވެ. ފުރަތަމަ ސެމީގައި ބައްދަލުކުރީ ސެންޓަރ ފޯރ ހަޔަރ ސެކަންޑްރީ އެޑިއުކޭޝަން (ސީ.އެޗް.އެސް.އީ) އާއި ވިލާ ކޮލެޖެވެ. ފަސޭހަކަމާއެކު ސީ.އެޗް.އެސް.އީން ވިލާ ކޮލެޖުގެ މައްޗަށް ކުރި ހޯދީ 21-6 ންނެވެ. ދެ ވަނަ ސެމީގައި ބައްދަލުކުރީ ދިވެހިރާއްޖޭގެ ޤައުމީ ޔުނިވަރސިޓީ (އެމް.އެން.ޔޫ) އާއި އަހުމަދިއްޔާ އިންޓަރނޭޝަނަލް ސްކޫލެވެ. މި ސެމީގައި އަހުމަދިއްޔާއިން ވަނީ 25-11 ން އެމް.އެން.ޔޫގެ މައްޗަށް ކުރި ހޯދާފައެވެ. އަންހެން ޑިވިޝަންގެ ފައިނަލްގައި ސީ.އެޗް.އެސް.އީ އާއި އަހުމަދިއްޔާ ބައްދަލުކުރާ މެޗު އޮންނާނީ މިރޭ 20:30 ގައެވެ.

ފިރިހެން ޑިވިޝަންގެ ފުރަތަމަ ސެމީ ފައިނަލްގައި ވާދަކުރީ ސީ.އެޗް.އެސް.އީ އާއި ވިލާ ކޮލެޖެވެ. މި މެޗު 18-16 ގެ ކުޑަ ފަރަގަކުން ކާމިޔާބުކޮށް، ވިލާ އިން ވަނީ ފައިނަލަށް ދަތުރުކޮށްފައެވެ. ދެ ވަނަ ސެމީގައި އެމް.އެން.ޔޫ ނިކުތީ މެޕްސް ކޮލެޖާ ދެކޮޅަށެވެ. މި މެޗުން އެމް.އެން.ޔޫ މޮޅުވީ 30-10 ގެ ބޮޑު ތަފާތަކުންނެވެ. ފިރިހެން ޑިވިޝަންގެ ފައިނަލްގައި އެމް.އެން.ޔޫ އާއި ވިލާ ކޮލެޖު ބައްދަލުކުރާ މެޗު އޮންނާނީ 21:30 ގައެވެ.

މުބާރާތް ކުރިއަށްދާ އިރު، ވީ.ސީ.އެސް.އޭ އިން ވަނީ ސްޕޯޓަރސް ޗެލެންޖުގެ ނަމުގައި ކުއިޒެއް ހުޅުވާލާފައެވެ. ޗެލެންޖުގައިވާ ސުވާލުތަކުގެ ޖަވާބު ދިމާކުރާ ފަރާތްތަކުގެ ތެރެއިން ގުރުއަތުން ހޮވޭ ތިން ފަރާތަކަށް 1000 ރުފިޔާގެ ފައިސާގެ އިނާމެއް ލިބޭނެއެވެ. ޖަވާބު ހުށަހެޅުމުގެ އެންމެ ފަހު ވަގުތަކީ ޖުލައި ހަ ވަނަ ދުވަހުގެ ރޭ އޮންނަ މުބާރާތް ނިންމުމުގެ ރަސްމިއްޔާތުގެ ކުރިންނެވެ.

ވިލާ ކޮލެޖުގެ ދަރިވަރުންގެ އެސޯސިއޭޝަނުން ވަނީ ކޮންމެ އަހަރުވެސް މި މުބާރާތް ބޭއްވުމަށް ނިންމާފައެވެ. މުބާރާތުގެ ފައިވް އޮން ފައިވް އާއި ތްރީ އޮން ތްރީގައި ވެސް އަންހެން އަދި ފިރިހެން ޓީމުތައް ވަނީ ބައިވެރިވެފައެވެ. މުބާރާތް ކުރިއަށްދާނީ ޖުލައި ހަ ވަނަ ދުވަހާ ހަމައަށް، އައުްޓްޑޯ ބާސްކެޓު ކޯޓުގައެވެ.