ސްޓެލްކޯއަކީ ރައްޔިތުން ބަލައިގަންނަ ކުންފުންޏަކަށް ހަދައިދޭނަން: ޝަރީފް
4 ޖުލައި 2022 | ހޯމަ 04:36ސްޓެލްކޯގެ ޚިދުމަަތުގެ ފެންވަރު މަތިކޮށް ވައްޓަފާޅި ބަދަލުކުރަންޖެހޭ
ސްޓެލްކޯގެ މެނޭޖިން ޑިރެކްޓަރު އަހުމަދު ޝަރީފް
ސްޓެލްކޯއަކީ ރައްޔިތުން ގަބޫލުކުރާފަދަ ޚިދުމަތެއް ދޭ، ރައްޔިތުންގެ ކުރިމަތީގައި މަގުބޫލު ކުންފުންޏަކަށް ހަދައިދެއްވާނެ ކަމަށް އެ ކުންފުނީގެ މެނޭޖިން ޑިރެކްޓަރު އަހުމަދު ޝަރީފް ވިދާޅުވެއްޖެއެވެ.
ޝަރީފް މިފަދައިން ވިދާޅުވީ ކަސްޓަމަރުންނާ ދެމެދު އޮންނަ ގުޅުން އިތުރަށް ބަދަހިކޮށް، ކަސްޓަމަރުން އިތުބާރު ކުރާ ފަދަ ކުންފުންޏަކަށް ހެދުމަށްޓަކައި، ސްޓެލްކޯގެ މުވައްޒަފުންނަށް ޚާއްސަކޮށްގެން ކަސްޓަމަރ ސާވިސް އެކްސެލެންސް ޓްރެއިނިންގ ޕްރޮގްރާމް ފެށުމުގެ ރަސްމިއްޔާތުގައި ވާހަކަދައްކަވަމުންނެވެ.
ޝަރީފް ވިދާޅުވީ ސްޓެލްކޯއިން ދޭ ޚިދުމަތުގެ ފެންވަރު މަތިކޮށް ޚިދުމަތުގެ ވައްޓަފާޅި ވަރަށް ބޮޑަށް ބަދަލުކުރަންޖެހޭ ކަމަށެވެ. ކަރަންޓު ކެނޑުނަސް، ކަރަންޓުގެ ބިލް ބޮޑުވިޔަސް، ސްޓެލްކޯ ކުންފުންޏަށާއި، މެނޭޖްމެންޓުގެ އިތުރުން މުވައްޒަފުންނަށް އެތައް ކަމަކާ ކުރިމަތިލާންޖެހޭ ކަމަށް ޝަރީފް ވިދާޅުވިއެވެ.
މިއީ ބަދަލުކުރަންޖެހޭ ކަމެއް ކަމަށް ޝަރީފް ވިދާޅުވިއެވެ. މިއީ ނުވާނެ ކަމެއް ކަމަކަށް ގަބޫލެއް ނުކުރައްވާ ކަމަށާއި، ހެޔޮ ނިޔަތެއްގައި އެންމެން ގުޅިގެން މަސައްކަތްކޮށްފިނަމަ މިކަން ބަދަލުކުރެވޭނެ ކަމަށް ޝަރީފް ވިދާޅުވިއެވެ.
މިޒަމާނާ ގުޅެނީ ޚިދުމަތް ހޯދަން އަންނަ ފަރާތާއި ޚިދުމަތް ދޭ ފަރާތާއި އެއް ލެވަލްއެއްގައި ތިބުން ކަމަށް ޝަރީފް ވިދާޅުވިއެވެ. ކަސްޓަމަރާއި ދޭތެރޭގައި ގެންގުޅޭ އެޓިޓިއުޑް ބަދަލުކުރަންޖެހޭ ކަމަށާއި، ކަސްޓަމަރުންނަށް އިހުތިރާމް ކުރަންޖެހޭ ކަމަށް ޝަރީފް ވިދާޅުވިއެވެ. މިފަދަ ކުދި ކުދި ބަދަލުތައް ގެނެސްގެން ސްޓެލްކޯއަކީ ރައްޔިތުން ބަލައިގަންނަ ފަދަ ޚިދުމަތްތަކެއްދޭ ކުންފުންޏަކަށް ހެދޭނެ ކަމަށް ޝަރީފް ވިދާޅުވިއެވެ.
