ހުޅަނގު އެފްރިކާގެ ލީޑަރުން މާލީއާ ދެކޮޅަށް އަޅާފައިވާ ފިޔަވަޅުތައް އުވާލައިފި

މާލީއާ ދެކޮޅަށް ހުޅަނގު އެފްރިކާގެ ގައުމުތަކުގެ އިގްތިސާދީ ކޮމިއުނިޓީގެ ލީޑަރުން އަޅާފައިވާ ފިޔަވަޅުތައް އުވާލައިފިއެވެ.

އިގްތިސާދީ ގޮތުންނާއި މާލީ ގޮތުން އަޅާފައިވާ ފިޔަވަޅުތައް އުވާލަން ނިންމާފައިވަނީ، އެގައުމުގެ ވެރިކަން އަސްކަރީ ބަޣާވާތަކުން ބަދަލުކުރުމަށްފަހު، އަސްކަރިއްޔާއިން ކުރަމުންދާ ވެރިކަން ބަދަލުކުރުމަށް 2 އަހަރުގެ މުއްދަތެއް ބޭނުންވާކަމަށް ބުނެފައިވަނިކޮށެވެ. ޑިމޮކްރެޓިކް ވެރިކަމަކަށް ބަދަލުކޮށް އައު އިންތިހާބު ބޭއްވޭނެ އައު ގާނޫނެއް ގެންނަން ވެސް ވަނީ ނިންމާފައެވެ.

ހުޅަނގު އެފްރިކާގެ ގައުމުތަކުގެ އިގްތިސާދީ ކޮމިއުނިޓީގެ ލީޑަރުން މާލީއާއި ދެކޮޅަށް ހަރުކަށި ފިޔަވަޅުތައް އެޅީ ޖެނުއަރީގެ ފަހުން އެގައުމުގައި ޑިމޮކްރެޓިކް އިންތިހާބެއް ރާވާފައިވާ ގޮތަށް ނުބާއްވާނެކަމަށް ބުނުމާއެކުއެވެ.

ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން ހުޅަނގު އެފްރިކާގެ ލީޑަރުންގެ ރައީސް ޖީން ކްލައުޑޭ ކައްސި ބްރޮ، ވިދާޅުވީ އަޅާފައިވާ ފިޔަވަޅުތައް އުވާލުމާއެކު، މާލީއާއި އެހެން ގައުމުތަކާއި ހިއްސާކުރާ ބޯޑަރުތައް ހުޅުވާލާނެ ކަމަށާއި ސަރަހައްދީ ޑިޕްލޮމެޓުން އެނބުރި މާލީއަށް ވަޑައިގަންނަވާނެ ކަމަށެވެ.

އެފްރިކާގައި ބައްދަލުކުރަމުންދާ ހުޅަނގު އެފްރިކާގެ ލީޑަރުން ވަނީ ބާރުތައް އަތުލާފައިވާ ޖުންޓާއިން 2 އަހަރު ތެރޭގައި އެގައުމުގައި ގާނޫނު އަސާސީ އަލުން ރުޖޫއަކުރުމަށް ވެސް ނިންމިކަން އިއުލާންކުރުމަށް އަންގަވާފައެވެ.

މާލީ ސަރުކާރާއި ދެކޮޅަށް ހަނގުރާމާ ކުރާ ސިފައިން ނިކުމެ މާލީގެ ރައީސް އިބްރާހިމް ބޫބަކާރ ކެއިޓާ އާއި ބޮޑު ވަޒީރު ބޮބޮބެއް ހައްޔަރުކޮށް ވެރިކަން ބަދަލުކޮށްފައިވަނީ އޮގަސްޓް 2020 ގައެވެ.

މާލީގެ އަސްކަރިއްޔާއިން އޮގަސްޓު 2020 ގައި ފުރަތަމަ ބަޣާވާތް ކުރީ އޭރުގެ ރައީސް އިބްރާހިމް ބޫބަކާރ ކެއިޓާއާ ދެކޮޅަށް އެގައުމުގައި ބޮޑެތި މުޒާހަރާތަކެއް ބާއްވާތާ މަސްތަކެއް ފަހުންނެވެ. އަދި މާލީގެ ވެރިކަމާ އަސްކަރިއްޔާއިން ހަވާލުވެއްޖެނަމަ، ސަރަހައްދީ ގައުމުތަކުން ދަތިކުރުމުގެ ފިޔަވަޅު އަޅާނެ ކަމުގެ އިންޒާރު ދިނުމުން، އެގައުމުގައި އަންނަ ފެބުރުއަރީ މަހުގައި ރިޔާސީ އިންތިހާބެއް ބާއްވަން ނިންމައި، މަދަނީ ސަރުކާރެއް އެކުލަވާލައި، އެ ސަރުކާރުގެ ރައީސްކަމަށް ގޮއިޓާ ހަވާލުވެވަޑައިގެންނެވިއެވެ. އަދި ސިފައިންނަށް ކެބިނެޓުގެ މުހިންމު މަގާމުތަކެއް ހަވާލުކުރެއްވިއެވެ.

އެކަމަކު އެ ސަރުކާރަށް ބަދަލުގެނެސް، ސިފައިންގެ ދެމީހެއްގެ މަގާމު އަތުލި ފަހުން، އަސްކަރިއްޔާއިން ރައީސް އެންޑޯ އާއި ބޮޑުވަޒީރު މޮކްޓާ އާން ހައްޔަރުކުރިއެވެ. އަދި އެ ދެބޭފުޅުން ހައްޔަރުން ދޫކޮށްލީ މަގާމުން އިސްތިއުފާ ދިނުމުންނެވެ.

މާލީގެ ރައީސް ކަމުން އެންޑޯ އަދި މޮކްޓާ އިސްތިއުފާ ދެއްވާފައިވަނީ އދ. އަދި އެފްރިކަން ޔޫނިއަނުން މާލީގެ އަސްކަރިއްޔާއިން ހިންގި ބަޣާވާތް ކުށްވެރިކޮށްފައި ވަނިކޮށެވެ.