ގއ. މާމެންދޫގައި ހިންގި ގްރޫޕް މާރާމާރީއެއްގައި ވަޅިން ހަމަލާދީ އެރަށު ލިލީ އޮފްދަ ވެލީ، އަހްމަދު އުދައްޔު، 17، މަރާލި މައްސަލައިގައި ދައުވާ އުފުލާފައިވާ ފަރާތްތަކުގެ ޝަރީއަތުގެ އަޑުއެހުމެއް އާދިއްތަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.

މި މައްސަލައިގައި ތޫނު އެއްޗެއް ބޭނުންކޮށްގެން ގަސްތުގައި މީހަކު މެރުމުގައި ބައިވެރިވުމުގެ ކުށުގެ ދައުވާ އުފުލާފައިވަނީ ގއ. މާމެންދޫ، ރިހިފަރުދާގެ، އަޙުމަދު ޝަމީމްއާއި، ގއ. މާމެންދޫ، ބިލަތްމާގެ، ޝަރަފު ރަޝީދުއާއި، ގއ. މާމެންދޫ، ގުލްފާމުގެ، މުޙައްމަދު މާޒިންގެ މައްޗަށެވެ. އެމީހުންގެ މައްޗަށް ވަނީ މީހަކަށް ނުރައްކާތެރި ހާނިއްކައެއްވާ ގޮތަށް ތޫނު އެއްޗެއް ނުވަތަ ހަތިޔާރެއް ބޭނުންކޮށްގެން މާރާމާރީ ހިންގުމުގައި ބައިވެރިވުމުގެ ކުށުގެ ދައުވާވެސް އުފުލާފައެވެ.

މި މައްސަަލައިގެ ހެކިބަސް ނެގުން ކުރިއަށްދާއިރު، އާދިއްތަ ދުވަހުގެ އަޑުއެހުމުގައި އެންމެ ފުރަތަމަ ހާޒިރުކުރީ ޕޮލިސް ސަރޖަންޓް އިބްރާހިމް އަހުމަދުއެވެ.

އޭނާއާ ސުވާލުކޮށްފައިވަނީ އޭނާ ތައްޔާރުކުރި ސީން އޮފް ކްރައިމް އޮފިސަރސް ރިޕޯޓުތަކަކާއި ގުޅިގެންނެވެ. އޭނާ ވަނީ ސީން އިން ނަގާފައިވާ މާއްދީ ހެކިތަކާއި އެ ހެކިތަކާއިމެދު އަމަލުކޮށްފައިވާ ގޮތާއި ގުޅޭގޮތުން ހެކިބަސް ދެއްވާފައެވެ.

ދެން ހާޒިރުކުރީ ފުލުހުންގެ ޚިދުމަތުގައި ވަޒީފާ އަދާކުރަމުންދާ ފަރީޝް އަހުމަދުއެވެ. އޭނާ ހާޒިރުކުރީވެސް ހެކީގެ ގޮތުގައި ހުށައެޅިފައިވާ ބައެއް ރިޕޯޓުތަކާއި ގުޅިގެންނެވެ.

އެއަށްފަހު ދެން ހާޒިރުކުރީ ޑީއެންއޭ އެނަލިސްޓެއް ކަމަށްވާ ރީމާން ސައީދުއެވެ. އޭނާ ވަނީ ޑީއެންއޭ ޕްރޮފައިލްތައް އިންޓަޕްރިޓް ކުރުމަށްފަހު ލިބުނު ނަތީޖާތަކާއި ގުޅޭގޮތުން ރިޕޯޓު އެކުލަވާލައްވައި، އެ ރިޕޯޓާއި ގުޅިގެން ހެކިބަސް ދެއްވާފައެވެ.

އޭގެ އިތުރުން، މުހައްމަދު އަޝްރަފްވެސް ހެއްކެއްގެ ގޮތުގައި ވަނީ ހާޒިރުކޮށްފައެވެ. އެއީ ފުލުހުންގެ ފޮރެންސިކް ސަރވިސްގެ ޑިޖިޓަލް އެވިޑެންސް ލެބޯޓަރީގައި މަސައްކަތް ކުރައްވަމުން ގެންދަވާ ފަރާތެކެވެ. އޭނާއަކީ ޑިޖިޓަލް އެގްޒެމިނަރެކެވެ.

މި އަޑުއެހުމަށް އިތުރު 2 ހެއްކެއްގެ ހެކިބަސް ނެގުމަށްވެސް އޮތީ ތާވަލު ކުރެވިފައެވެ. އެހެންނަމަވެސް އޭގެ ތެރެއިން އެއް ހެއްކެއްގެ ހެކިބަސް ނަގަން ބޭނުން ނުވާކަން ދައުލަތުން ފާހަގަކުރިއެވެ. އަދި ދެން ހިމެނޭ ހެއްކަކީ ފިޒިކަލް އެގްޒެމިނޭޝަން ރިޕޯޓު ތައްޔާރު ކުރެއްވި އޮފިސަރުކަން ފާހަގަ ކުރައްވައި ދައުލަތުން ވަނީ، އޭނާގެ ހެކިބަސް ނަގަން ބޭނުންވާކަން ފާހަގަކޮށްފައެވެ. އޭނާ މިހާރު ހުރީ ޗުއްޓީގައެވެ،

ކްރިމިނަލް ކޯޓުގައި މި މައްސަލަ ބައްލަވަނީ ގާޒީ އަލީ ނަދީމެވެ.