މަޖިލީހުގެ ތަޅުމަށް ކުޑަކުދިން ނުގެނައުމަށް ކޮމިޓީން އަންގައިފި

މަޖިލީހުގެ ތަޅުމަށް ކުޑަކުދިން ނުގެނައުމަށް އިނގިރޭސިވިލާތުގެ ކޮމަންސް ޕްރޮސީޖަރ ކޮމިޓީން އަންގައިފިއެވެ.

ކޮމިޓީން މިގޮތަށް ނިންމާފައިވަނީ މިދިޔަ އަހަރު ލޭބަރ ޕާޓީގެ މަޖިލިސް މެމްބަރު ސްޓެލާ ކްރީސީ އެ ގައުމުގެ ޕާލަމެންޓުގެ ދަށުގެ "ހައުސް އޮފް ކޮމަންސް"އަށް އޭނާގެ ތިން މަހުގެ ދަރިފުޅު ގޮވައިގެން ވަޑައިގެންނެވުމާ ގުޅިގެން، އެގޮތަށް ކަންތައް ނުކުރެއްވުމަށް އޮފިޝަލަކު އެންގެވުމުންނެވެ. އޭރު ސްޓެލާ ވަނީ މިކަމާގުޅިގެން ޓުވީޓެއް ކުރައްވައި، އޭނާއަށް ޕާލަމެންޓުގެ އިސް އޮފިޝަލުން ފޮނުއްވާފައިވާ އީމެއިލެއް ޝެއަރކުރައްވާފައެވެ. އެ މެއިލްގައި ބުނެފައިވާ ގޮތުގައި، ޕާލަމެންޓުން އަލަށް ހަދާފައިވާ ގަވާއިދެއްގެ ދަށުން މެމްބަރުންގެ ގޮނޑިކޮޅުގައި މެންބަރާއެކު ކުޑަކުއްޖަކު އިނުމަކީ މަނާކަމެކެވެ.

މިކަމާގުޅިގެން ސްޕީކަރ ވަނީ މި މައްސަލައިގައި ގޮތެއް ނިންމުމަށް އެދި ކޮމަންސް ޕްރޮސީޖަރ ކޮމިޓީއަށް ހުށަހަޅުއްވާފައެވެ. އަދި އެ ކޮމިޓީން ނެރުނު ބަޔާނެއްގައި ބުނީ، މެމްބަރުން އެމީހުންގެ ދަރިން ގޮވައިގެން މަޖިލީހުގެ ތަޅުމަށާއި ކޮމިޓީ ބައްދަލުވުންތަކަށް އައުމަކީ މަނާކަމެއްކަމަށެވެ.

މި ނިންމުމާގުޅިގެން ބައެއް މަޖިލިސް މެމްބަރުންގެ ފާޑުކިޔުންތައް އަމާޒުވާނެކަމަށް ވަނީ ބެލެވިފައެވެ. އެއީ ވިހެއުމަށްފަހު ދޭ ޗުއްޓީ އެ ގައުމުގެ މަޖިލިސް މެމްބަރުންނަށް ނުލިބޭތީ، ވިހެއުމަށްފަހު ވެސް އެމީހެއްގެ ދާއިރާ ތަމްސީލުކުރުމުގެ ފުރުސަތު ނޯންނާނެތީއެވެ.