ސަލީމް ބަދުނާމު ކުރުމަށް ހިންގަނީ ފިނޑި އަމަލުތަކެއް، ގާނޫނުގައިވާ އެންމެ ހަރުކަށި އަދަބު ދޭން ޖެހޭ: ހޯރަފުށީގެ ކްލަބުތައް
ހޯރަފުށީގެ 2 ކްލަބަކުން ވަނީ މިހާތަނަށް މި ޚަބަރުތައް ހަރުކަށި އިބާރާތުން ކުށްވެރިކޮށްފައި
އަހުމަދު ސަލީމް- ހޯރަފުށި ދާއިރާގެ މެމްބަރު
ހޯރަފުށީ ދާއިރާގެ މެމްބަރު އަހުމަދު ސަލީމް ބަދުނާމު ކުރުމަށް ހިންގަނީ ފިނޑި އަމަލުތަކެއް ކަމަށާއި އެ ފަރާތްތައް ގާނޫނުގެ ކުރިމައްޗަށް ގެނެސް ގާނޫނުގައިވާ އެންމެ ހަރުކަށި އަދަބު ދޭން ޖެހޭ ކަމަށް އެ ރަށުގެ ކްލަބުތަކުން ބުނެފިއެވެ.
ސަލީމްއާއި ގުޅޭ ގޮތުން ބައެއް ނޫސްތަކުން ފަތުރަމުންދާ ޚަބަރުތައް ކުށްވެރިކޮށް ހޯރަފުށީގެ ސްޕޯޓްސް ކްލަބެއް ކަމަށްވާ "އެފްސީ ފްރިގޭޓަރ" އިން ނެރުނު ބަޔާނެއްގައި ބުނީ "ދިޔަރެސް" ގައި ޝާއިރުކޮށްފައިވާ ޚަބަރަކީ އެއްވެސް އަސްލެއް އަދި އަސާސް އެއް ނެތް ހަގީގަތާ ޚިލާފު ވާހަކަތަކެއް ކަމަށެވެ. އަދި މިއީ ރައްޔިތުންގެ ޙައްގުގައި ރެއާއި ދުވާލު މަސައްކަތް ކުރާ ސަލީމްގެ އަބުރުފުޅަށް ހުތުރުވާގޮތަށް ފަތުރާފައިވާ ޚަބަރުތަކެއް ކަމަށާއި އެ ޚަބަރުތައް ފެތުރި ފަރާތްތަކަށް ގާނޫނުގައިވާ އެންމެ ހަރުކަށި އަދަބު ދޭން ޖެހޭ ކަމަށެވެ.
މިފަދަ ފިނޑި އަމަލުތަކުގެ ސަބަބުން ހޯރަފުށި ދާއިރާގެ ރައްޔިތުން ސަލީމަށް ކުރާ އިތުބާރަށް އެއްވެސް ބަދަލެއް ނާންނާނެ ކަމަށް ވެސް އެފްސީ ފްރިގޭޓަރ އިން ނެރުނު ބަޔާނުގައި ވަނީ ބުނެފައެވެ.
އެ ރަށުގެ އެހެން ސްޕޯޓްސް ކްލަބެއް ކަމަށްވާ "ދަންމަރު ޔުނައިޓެޑް" އިން ނެރުނު ބަޔާނުގައި ބުނީ މި އަމަލުތަކަކީ މެމްބަރު ސަލީމް ހޯރަފުއްޓަށާއި ދާއިރާގެ ރަށްތަކަށް ގެނެސްދެއްވަމުން ގެންދަވާ ތަރައްގީއާއި އުފާ ފާގަތިކަމަށް ހަސަދަވެރިވާ ބަޔަކު އަޑީގައި ތިބެގެން ސަލީމްގެ އަބުރު ގެއްލުވާލައި ރީތި ނަން ޚަރާބު ކުރުމުގެ ނިޔަތުގައި ހިންގާ މުޑުދާރު އަމަލުތަކެއް ކަމަށެވެ. ނަމަވެސް މީގެ ސަބަބުން ސަލީމްގެ ނަމަށް އެއްވެސް ކިލަނބުކަމެއް ނުގެނެވޭނެ ކަމަށް ވެސް އެ ބަޔާނުގައި ވަނީ ބުނެފައެވެ.
އެ ކްލަބުންވެސް ވަނީ ސަލީމަށް ނިސްބަތްކޮށް އެފަދަ ބުހުތާނު ޚަބަރުތައް ފަތުރަމުންދާ ފަރާތްތައް ހޯދައި އިންސާފުގެ ކުރިމައްޗަށް ގެެނެސް ހައްގު އަދަބު ދިނުމަށް ފުލުހުންނާއި ދައުލަތުގެ ކަމާ ބެހޭ ފަރާތްތަކަށް ގޮވާލާފައެވެ.
