ވަގު ފޯމުގެ މައްސަލަ އެންމެ ބޮޑީ ޕީޕީއެމްއާއި އެމްޑީޕީގައި: އިލެކްޝަންސް ކޮމިޝަން

ސައްހަ ނޫން ފޯމުގައި ޕާޓީތަކަށް މެމްބަރުން ވައްދާފައިވާކަމަށްބުނެ އެންމެ ގިނައިން މައްސަލަ ހުށަހަޅާފައިވަނީ އެމްޑީޕީއާ ޕީޕީއެމްއާ ގުޅޭގޮތުންކަމަށް އިލެކްޝަންސް ކޮމިޝަނުން ބުނެފިއެވެ.

ސިޔާސީ ޕާޓީތަކުގެ ގާނޫނަށް 4 ވަނަ އިސްލާހު ގެނައުމުގެ ބިލާ ގުޅޭގޮތުން މިނިވަން މުއައްސަސާތަކުގެ ކޮމިޓީގައި ވާހަކަދައްކަވަމުން އިލެކްޝަންސް ކޮމިޝަންގެ ރައީސް ފުއާދު ތައުފީގު ވިދާޅުވީ، ސައްހަ ނޫން ފޯމުގައި ޕާޓީތަކަށް މީހުން ވެއްދުމަކީ ހުރިހާ ޕާޓީއެއްގައިވެސް އޮންނަ ކަމެއް ކަމަށެވެ. އެހެންނަމަވެސް މިކަން އެންމެ ބޮޑަށް އޮތީ އެމްޑީޕީއާއި ޕީޕީއެމްގެ ތެރޭގައި ކަމަށް ފުއާދު ވިދާޅުވިއެވެ.

ފުއާދު ވިދާޅުވީ މިފަދަ ގިނަ މައްސަލަތަކެއް އެ ކޮމިޝަނަށް މިހާރުވެސް ހުށަހަޅަމުންދާކަމަށެވެ. ފާއިތުވި 6 މަސް ދުވަހުގެ ތެރޭގައި ހަމައެކަނި އެމްޑީޕީއަށް 7،000 މެމްބަރުން ވަގު ފޯމުގައި ވައްދާފައިވާކަމުގެ މައްސަލަ ހުށަހަޅާފައި އެބައޮތްކަމަށް ފުއާދު ވިދާޅުވިއެވެ. ހަމަ މިގޮތަށް އެހެނިހެން ޕާޓީތަކުންވެސް އެތައް ފޯމެއް ހުށަހަޅަމުންދާކަމަށް ފުއާދު ވިދާޅުވިއެވެ.

ފުއާދު ވިދާޅުވީ އަދިވެސް މަސައްކަތްކުރައްވަމުންދަނީ ޖޫރިމަނާނުކޮށް މިކަންކަން ކުރެވޭނެ ގޮތެއް ބެލުމަށްކަމަށެވެ. ޖޫރިމަނާ ކުރަންފަށައިފިނަމަ ބޮޑެތި އަދަދުތަކުން ޕާޓީތައް ޖޫރިމަނާކުރެވިގެންދާނެތީ، ޕާޓީތަކުންވެސް މިކަން އެހަށް މަޑުޖައްސާލަން އެދެމުންދާކަމަށް ފުއާދު ވިދާޅުވިއެވެ.

ސިޔާސީ ޕާޓީތަކުން ހުށަހަޅާ ކޮންމެ ސައްހަ ނޫން ފޯމަކަށް ބޮޑު އަދަދަކުން ޖޫރިމަނާކުރަން އިލެކްޝަންސް ކޮމިޝަނުން ވަނީ ނިންމާފައެވެ. މިގޮތުން ސައްހަ ނޫން ކޮންމެ ފޯމަކަށް ޕާޓީ 10،000 ރުފިޔާއިން ޖޫރިމަނާ ކުރާއިރު، ފުރަތަމަ ފަހަރު ރަޖިސްޓްރާ 5،000 ރުފިޔާއިން ޖޫރިމަނާ ކުރާނެއެވެ. އަދި ދެފަހަރަށްވުރެ ގިނައިން އެކަން ތަކުރާރުވެއްޖެނަމަ ކޮންމެ ފަހަރަކު ރަޖިސްޓްރާވެސް 10،000 ރުފިޔާއިން ޖޫރިމަނާކުރަން ވަނީ ނިންމާފައެވެ.

އިލެކްޝަންސް ކޮމިޝަނަށް ސައްހަ ނޫން ފޯމުތައް ހުށަހަޅާކަމުގެ ޝަކުވާތައް ވަނީ ވަރަށް ބޮޑަށް އިތުރުވެފައެވެ. އެގޮތުން، ބައެއް މީހުންނަށް ނޭނގި އެމީހުންގެ ފޯމުތައް އީސީއަށް ހުށަހަޅައި ޕާޓީތަކުގެ ދަފްތަރުގައި ޖައްސާ ކަމަށްވެސް ގިނަ ފަރާތްތަކުން ދަނީ ބުނަމުންނެވެ. ގިނަ ފަހަރަށް މިގޮތަށް ސައްހަ ނޫން ފޯމުތައް ހުށަހަޅަނީ ޕާޓީގައި 10،000 މެމްބަރުން ހަމަކުރުމަށެވެ. އެއީ ގާނޫނުގައި ބުނާ ގޮތުގައި ދައުލަތުގެ ބަޖެޓުން ފައިސާ ދޭންޖެހޭނީ އެ އަދަދު ހަމަވާ ޕާޓީތަކަށް ކަމަށް ވާތީއެވެ.

އީސީން މީގެކުރިންވެސް ސައްހަ ނޫން ފޯމުތައް ހުށަހެޅި ޕާޓީތައް ޖޫރިމަނާކުރިއެވެ. އޭރު ސައްހަ ނޫން ފޯމު ހުށަހަޅާނަމަ ކޮންމެ ފޯމަކަށް 5000 ރުފިޔާގެ ޖޫރިމަނާއެއް ކުރިއެވެ، ނަމަވެސް ސިޔާސީ ޕާޓީތަކަށް އުފުލަން ޖެހޭ ބުރަ ކުޑަކުރުމަށް ޖޫރިމަނާ ނުކުރަން ނިންމީއެވެ.