"އާސްކް ސްޕީކަރ" ޖޫން 30ގައި، ސުވާލު ފޮނުވުމަށް ހުޅުވާލައިފި
އާސްކް ސްޕީކަރ އޮންނާނީ ޖޫން 30 ވަނަ ދުވަހުގެ ރޭ 9:00ގައި
އާސްކް ސްޕީކަރ | ރައްޔިތުންގެ މަޖިލިސް
ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދާ ސުވާލުކުރުމަށް ބާއްވާ "އާސްކް ސްޕީކަރ" ޕްރޮގްރާމްގެ 5 ވަނަ އެޕިސޯޑް ޖޫން 30ގައި އޮންނާނެކަމަށް ރައްޔިތުންގެ މަޖިލީހުގެ އިދާރާއިން ބުނެފިއެވެ.
މި ޕްރޮގްރާމް އޮންނާނީ ޖޫން 30ވާ ބުރާސްފަތި ދުވަހުގެ ރޭ 9:00ގައެވެ. މި ޕްރޮގްރާމަށް ސުވާލުފޮނުވުމަށް މިހާރު ވަނީ އާންމުންނަށް ހުޅުވާލާފައެވެ. މިގޮތުން ވީޑިއޯ، ޓެކްސްޓް، އެސްއެމްއެސް، ޓެލެގްރާމް، ވައިބަރ އަދި ވަޓްސްއެޕް މެދުވެރިކޮށް 7234566ށް ފޮނުވުމަށް ވަނީ ހުޅުވާލާފައެވެ. ސޯޝަލް މީޑިއާ މެދުވެރިކޮށް ސުވާލު ފޮނުވަން ބޭނުންވާ ފަރާތްތަކުން ސުވާލު ޕޯސްޓު ކުރާއިރު AskSpeaker# ބޭނުންކުރުމަށް މަޖިލީހުގެ އިދާރާއިން އެދެއެވެ.
ފޯން މެދުވެރިކޮށް އަދި އޯޑިއެންސްގައި ބައިވެރިވެގެން ލައިވްކޮށް ސުވާލު ކުރަން ބޭނުންވާ ފަރާތްތަކުން، އެމީހެއްގެ ނަމާއި، އައިޑީކާޑު ނަންބަރު 7234566ށް ފޮނުވުމަށް މަޖިލީހުގެ އިދާރާއިން ވަނީ އެދިފައެވެ.
ސުވާލު ފޮނުވުމުގެ ފުރުސަތު ހުޅުވާލާފައިވަނީ 30 ޖޫން ވާ ބުރާސްފަތި ދުވަހުގެ މެންދުރު 14:00ގެ ނިޔަލަށެވެ.
މި ޕްރޮގްރާމްގައި އާންމުގެ ސުވާލުތަކަށް ރައްޔިތުންގެ މަޖިލީހުގެ ރައީސް ނަޝީދު ޖަވާބުދެއްވާނެއެވެ. އާސްކް ސްޕީކަރގެ ހަތަރުވަނަ އެޕިސޯޑް ބާއްވާފައިވަނީ މިދިޔަ އަހަރުގެ ނޮވެމްބަރު 30ގައެވެ.
