އިންޑިއާ އައުޓް ހަރަކާތް ހުއްޓުވުމަށް ކަމާގުޅޭ ގާނޫނުތައް އިސްލާހުކުރުމަށް ރައްޔިތުންގެ މަޖިލީހުން ފާސްކޮށްފިއެވެ.

އިންޑިއާ އައުޓްގެ ނަމުގައި ހިންގާ ހަރަކާތް ހުއްޓުވުމަށް ގާނޫނީގޮތުން ހުރަސްތަކެއް ދިމާވާކަމަށް ދައުލަތުގެ އިދާރާތަކަށާއި، ސަލާމަތީ ހިދުމަތްތަކަށް ފެންނަނަމަ، ކަމާގުޅޭ ގާނޫނުތައް އިސްލާހުކުރުމަށް ރައްޔިތުންގެ މަޖިލީހުން ފާސްކޮށްފައިވަނީ 241 ކޮމިޓީން ހުށަހެޅި ރިޕޯޓަށް ނެގި ވޯޓާއެކުއެވެ. ހޯމަ ދުވަހުގެ ޖަލްސާގައި ހާޒިރުވި 37 މެންބަރުންގެ ތެރެއިން މި ރިޕޯޓް ފާސްކުރުމަށް ވޯޓު ދެއްވީ ވޯޓަށް އެހި އިރު ހާޒިރުވެ ތިއްބެވި މެންބަރުންގެ އަގުލަބިއްޔަތުންނެވެ.

ކޮމިޓީގެ ހުށަހެޅުންތަކުގެ ތެރޭގައި ގާނޫނަށް އިސްލާހު ގެނައުމުގެ އިތުރުން، އިންޑިއާ އައުޓް ނަމުގައި ހިންގަމުން އަންނަ ހަރަކާތަކީ އެކަމުގެ ސަބަބުން ގައުމީ ސަލާމަތަށް އޮތް ނުރައްކަލެއް ކަމުގައިވާތީއާއި، އަދި ދިވެހިރާއްޖޭގެ އިގްތިސާދަށް އެކަމުގެ ސަބަބުން ނުރަނގަޅު އަސަރެއްކުރާނެ ކަމަކަށްވެފައި، ބައިނަލްއަގުވާމީ ގުޅުންތަކަށް ހީނަރުކަން އަންނަކަމަށްވާތީ، ގާނޫނާ ގައިވައިދުގައިވާ ގޮތުގެ މަތިން އެ ހަރަކާތް ހުއްޓުވުމަށް ދައުލަތުގެ ކަމާގުޅޭ އިދާރާތަކާއި ސަލާމަތީ ހިދުމަތްތަކުން މަސައްކަތް ކުރުމަށް ވަނީ ހުށަހަޅާފައެވެ.

241 ކޮމިޓީގެ ރިޕޯޓުގައި 24 ކަމެއް ވަނީ ފާހަގަކޮށްފައެވެ. މި ރިޕޯޓަކީ ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ހުށަހެޅުއްވި، "އިންޑިއާ އައުޓް ކެމްޕޭނާއި ގުޅިގެން އެކަމުގެ ސަބަބުން ގައުމީ ސަލާމަތަށް ނުރައްކާވާނެ ކަމެއް ކަމަށް ގަބޫލުކުރައްވާ ކަމަށާއި، އެކަމުގެ ސަބަބުން ދެގައުމުގެ ދެމެދުގައި އޮންނަ ގާތް ގުޅުމަށް ހީނަރުކަން އައުމުގެ ފުރުސަތު އޮތްކަމެއް ކަމަށްވާތީ"، އެ މައްސަލަ ބައްލަވައިދެއްވުމަށް އެދިވަޑައިގެން، ހުށަހަޅުއްވާފައިވާ މައްސަލަ ދިރާސާކުރުމަށްފަހު އެކޮމިޓީން އާންމުކުރި ރިޕޯޓެކެވެ.

މި ރިޕޯޓުގައި ކޮމިޓީގެ ހޯދުންތަކުގެ ތެރޭގައި 24 ކަމެއް ވަނީ ހިމަނާފައެވެ. އެގޮތުން އިންޑިއާއާއި ދެކޮޅަށް ރާއްޖެއިން ހިންގަމުންދާ ހަރަކާތްތަކާ ގުޅިގެން ކޮޗިން އެއަރޕޯޓުގެ އިމިގްރޭޝަން ކައުންޓަރުގައި ތިބި ފަރާތްތަކުން ދިވެހިންނަށް ނިސްބަތްކޮށް، "އިންޑިއާ އައުޓް ޕީޕަލް ކަމިންގ" ފަދަ ބަސްތަކުން މުޚާތަބުކުރިކަމަށާއި، އަދި އިންޑިއާއަށް ކުރި ދަތުރެއްގައި އެރުނު ޓެކްސީއެއްގެ ޑްރައިވަރު، ރާއްޖޭގައި ހިންގާ އިންޑިއާ އައުޓް ހަރަކާތްތަކަށް ނިސްބަތްކޮށް، އިންޑިއާއިން "މޯލްޑިވްސް އައުޓް"ގެ ނަމުގައި ހަރަކާތްތަކެއް ފަށައިފިނަމަ ހަދާނީ ކިހިނެއްތޯ ބުނެ ސުވާލު އުފައްދާފައިވާކަމަށް، އާންމު ފަރާތްތަކުން ކޮމިޓީއާ މައުލޫމާތު ހިއްސާކޮށްފައިވާކަމަށް ކޮމިޓީގެ ހޯދުންތަކުގެ ތެރޭގައި ބުނެފައިވެއެވެ.

މީގެ އިތުރުން އިންޑިއާ އައުޓްގެ ނަމުގައި ހިންގާ ކެމްޕޭން ފުޅާވަމުންދާ ވަރަކަށް، އެކަމުން ދިވެހިރާއްޖެއަށް ކުރާ އަސަރު ރާއްޖޭގެ އެކި ކަންކޮޅުތަކުން ފެންނަމުންދާ ކަމަށާއި، އެގޮތުން ރާއްޖޭގައި ދިރިއުޅޭ އިންޑިއާ މީހުންނާ ދިމާކުރަމުންދާކަން ބައެއް ނޫސްތަކާއި ސޯޝަލް މީޑިއާ ޚަބަރުތަކުން އެނގޭކަން އިކޮނަމިކް މިނިސްޓްރީން ފާހަގަކޮށްފައިވާ މައްސަލަ ވެސް ހޯދުންތަކުގެ ތެރޭގައި ހިމެނެއެވެ.

މީގެ އިތުރުން ވެސް، އިންޑިއާ އައުޓް ހަރަކާތްތަކަކީ ނަފުރަތު އުފެއްދުމަށް ހިންގާ ހަރަކާތެއް ކަމަށާއި، ގައުމީ ސަލާމަތަށް ހުރި ނުރައްކަލެއް ކަމުގައި ގައުމީ ސަލާމަތާބެހޭ މަޖިލީހުން ނިންމާފައިވާ ކަމާއި، ދިވެހިރާއްޖޭގެ ޖުމްހޫރިއްޔާގެ ގާނޫނުއަސާސީން ލިބިދީފައިވާ ޚިޔާލުފާޅުކުރުމުގެ މިނިވަންކަމާއި، އެއްވެ އުޅުމުގެ މިނިވަންކަމުގެ ނާޖާއިޒު ފައިދާ ނަގައި، އިންޑިއާއާ ދެކޮޅަށް ހިންގާ ކެމްޕޭނަކީ ދިވެހިރާއްޖޭގެ ސުލްހަ މަސަލަސްކަން ނަގައިލުމުގެ ނިޔަތުގައި، ދިވެހިރާއްޖެއާ އިންޑިއާއާއެކު އޮތް ޒަމާންވީ ބަދަހި ގުޅުމަށާއި ރާއްޖޭގެ ތަރައްގީއަށާއި މި ސަރަހައްދުގެ ސަލާމަތާއި ހަމަޖެހުމާއި އަމާންކަން ދެމެހެއްޓުމަށް ބައިނަލްއަގުވާމީ ފެންވަރުގައި ކުރަމުން އަންނަ މުހިންމު މަސައްކަތަކަށް ހުރަސްއެޅުމަށް ރާވައިގެން ހިންގަމުންގެންދާ ކެމްޕޭނެއް ކަމަށް ރައީސުލްޖުމްހޫރިއްޔާގެ ގަރާރުން އެނގޭ ކަމަށެވެ.

މީގެ އިތުރުން ދިވެހިރާއްޖޭގެ ގާނޫނުލްއުގޫބާތުގެ 124 މާއްދާގެ (ހ)ގެ (3) ވަނަ ނަންބަރާއި، 615 ވަނަ މާއްދާގެ (ހ)ގެ (6) ވަނަ ނަންބަރުގެ ދަށުން، މިފަދަ ކަންކަމަކީ ދިވެހިރާއްޖޭގައި ޖިނާއީ ކުށުގެ ގޮތުގައި ކަނޑައަޅާފައިވާ އަމަލުތަކެއްކަން ރައީސްގެ ގަރާރުން އެނގޭކަމަށް ބުނެފައިވެއެވެ.

އަދި މި ހަރަކާތަކީ ދިވެހިރާއްޖޭގެ އެކިއެކި ކަންކޮޅުތަކުގައި އޮތް އަމަންއަމާންކަމާއި ދާޚިލީ ހަމަޖެހުން ނަގާލައި، ސަރަހައްދީ ސަލާމަތާއި ރައްކާތެރިކަން ގެއްލުވާލައި، ރާއްޖޭގެ އިގުތިސާދީ ރައްކާތެރިކަމާއި އިޖްތިމާއީ ނިޒާމުތަކަށް ބޮޑު ބުރައެއް އުފުލަންޖެހޭނެ ކަމެއްކަމުގައި ގަބޫލުކުރެވޭކަމަށް ބުނެފައިވެއެވެ. އަދި ވަކިން ޚާއްސަކޮށް ބައިނަލްއަގުވާމީ މައިދާނުގައި އެކަހެރިވެ، އިތުބާރު ގެއްލި، ޒަމާނުއްސުރެ ދިވެހި ދައުލަތުން ގެންގުޅެމުން އަންނަ ޚާރިޖީ ސިޔާސަތު ރޫޅި، ދިވެހިރާއްޖޭގެ މިނިވަންކަމާއި ސިޔާދަތާއި އިސްތިގުލާލަށް ނުރައްކަލެއް ކުރިމަތިވެދާނެ ކަމެއްކަމުގައި ފާހަގަކުރެވޭކަން ރައީސްގެ ގަރާރުން އެނގޭކަމަށް ކޮމިޓީ ރިޕޯޓުގައި ބުނެފައިވެއެވެ.

މި ހަރަކާތުގެ ސަބަބުން ކަންބޮޑުވުން ފާޅުކުރަނީ ހަމައެކަނި އިންޑިއާ ސަރުކާރުން ނޫންކަމަށާއި، ރާއްޖޭގައި ތިބި އެކި ގައުމުތަކުގެ އެމްބެސެޑަރުން ކަންބޮޑުވުން ފާޅުކޮށްފައިވާކަމަށާއި، އެމްބަސީތަކުގެ ސެކިއުރިޓީ ވަރުގަދަކޮށްދިނުމަށް އެދިފައިވާކަމަށް ރިޕޯޓުގައި ބުނެފައިވެއެވެ.

އަދި ދިވެހިރާއްޖޭގެ ފަރާތުން ބައިވެރިވެފައިވާ އެކިއެކި ކޮންވެންޝަންތަކަށް ބަލާއިރު އެ ކޮންވެންޝަންތަކުގެ ދަށުން އަދާކުރަންޖެހޭ ކަންތައްތަކެއް ހުންނަކަމަށާއި، އެގޮތުން "ކޮންވެންޝަން އޮން ދަ އެލިމިނޭޝަން އޮފް އޯލް ފޯމްސް އޮފް ރޭޝަލް ޑިސްކްރިމިނޭޝަން"ގެ ދަށުން ވަކި ގައުމަކަށް ނުވަތަ ވަކި ގްރޫޕަކަށް، ނުވަތަ ވަކި ނަސްލަކަށް، ނުވަތަ ވަކި ކުލައެއްގެ މީހުންނަށް ނުވަތަ ވަކި ދީނެއްގެ މީހުން ތަފާތުކޮށް އެ މީހުންނާ ދެކޮޅަށް ނަފުރަތު އުފެދޭ ބަސްތައް ބޭނުންކުރުމާއި، ހަރުކަށިކަމަށް މަގުފަހިވާގޮތަށް ކުރެވޭ މަސައްކަތަކީ ކޮށްގެންވާނެ ކަމެއް ނޫންކަމަށް ރިޕޯޓުގައި ބުނެފައިވެއެވެ.

މީގެ އިތުރުން ދިވެހިރާއްޖޭގެ ކަނޑުގެ ސަރަހައްދުގައި ހިންގާ އެކިއެކި ކުށްތައް ހުއްޓުވުމަށް ހިންގާ ބޮޑެތި އޮޕަރޭޝަންސްތަކަކީ، އެކި ގައުމުތަކާ ގުޅިގެން ކުރިއަށްގެންދެވޭ އޮޕަރޭޝަންތަކަކަށް ވާއިރު، މިފަދަ ހަރަކާތެއް އަވަށްޓެރި ގައުމަކާ ދެކޮޅަށް ހިންގާކަމީ ދޭދޭ ގައުމުތަކުގެ އެއްބައިވަންތަކަމަށާއި، ކުށް މަދުކުރުމަށް ގުޅިގެން ހިންގޭ ހަރަކާތްތަކަށް ބުރޫއަރާނެ ކަމެއްކަން ޑިފެންސް މިނިސްޓްރީން ފާހަގަކޮށްފައިވާކަމަށް ރިޕޯޓުގައި ބުނެފައިވެއެވެ.