ބަންގްލަދޭޝްގައި މިހާތަނަށް ހެދި އެންމެ ދިގު ބްރިޖްގެ މަސައްކަތް ނިންމާ އާދީއްތަ ދުވަހު ރަސްމީކޮށް އާންމުނަށް ހުޅުވާލައިފިއެވެ.

6.51 ކިލޯމީޓަރު (4.04މޭލު) ދިގު ބްރިޖްއަށް 3.6 ބިލިއަން ޑޮލަރު ހޭދަވިއިރު ބްރިޖްގެ މަސައްކަތް ނިންމުމަށް 8 އަހަރުގެ މުއްދަތެއް ނަގާފައިވެއެވެ. މި ބްރިޖްގެ ސަބަބުން ވެރިރަށް ޑާކާ އާއި ދެވަނައަށް އެންމެ ބޮޑު ސީ ޕޯޓް ކަމަށްވާ މޮންގްލާއާ ދެމެދު ކުރިން ކުރެވޭ ދަތުރު ސަތޭކަ ކިލޯމީޓަރު ކުރުވެގެން ދެއެވެ.

ބްރިޖް ހުޅުވުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން ބަންގްލަދޭޝްގެ ބޮޑުވަޒީރު ޝޭޚް ހަސީނާ ވިދާޅުވީ މި ބްރިޖްއަކީ ބަންގްލަދޭޝްގެ ހުރިހާ ރައްޔިތުންގެ އަމިއްލަ ތަނެއްކަމަށާއި ބްރިޖް ރަމްޒުކޮށްދެނީ ބަންގްލަދޭޝް ރައްޔިތުންގެ ހުނަރާއި ހިތްވަރު އަދި ކެތްތެރިކަން ކަމުގައެވެ.  

ބަންގްލަދޭޝްގެ ޕަދްމާ ކޯރު ހުރަސްކޮށް އަޅާފައިވާ ބްރިޖްގެ މަސައްކަތް ކޮށްފައިވަނީ ޗައިނާގެ ކުންފުންޏެއްކަމަށްވާ ޗައިނާ މޭޖަރ އިންޖިނިއަރިންގ ކޮމްޕެނީ ލިމިޓަޑްއިންނެވެ. ފުރަތަމަ މަސައްކަތާއި ހާލުވި ކެނެޑާގެ ކުންފުންޏަކާދެމެދު ހިނގި ކޮރަޕްޝަންގެ މައްސަލައަކާއި ގުޅިގެން ބްރިޖަށް ޚަރަދު ކުރުމަށް ވަރލްޑް ބޭންކް އަދި އޭޝިއަން ޑިވެލޮޕްމަންޓް ބޭންކް ފަދަ މާލީ އިދާރާތަކުން އެއްބަސްނުވުމުން ބްރިޖަށް ޚަރަދު ކޮށްފައިވަނީ އެގައުމުގެ އަމިއްލަ ފައިސާ އިންނެވެ.

ބްރިޖް ހެދުމުގެ މަސައްކަތުގައި 4000 އިންޖިނިއަރުން ހަރަކާތްތެރިވެފައިވާއިރު މިއީ ވަރަށް ގޮންޖެހުން ބޮޑު މަސައްކަތަކަށް ވިކަމަށް ވެއެވެ. މިގޮތުން ބައެއް ހިސާބުތަކުގައި ކޯރުގެ ފެންގަނޑުގެ އަޑިއަށް 400 ފޫޓު ފުނަށް ޕައިލިންގ ޖަހަން ޖެހުނު ކަމަށްވެއެވެ. މިހިސާބަކީ އެމޭޒަން ކޯރަށް ފަހު މުޅިދުނިޔޭންވެސް ކޯރެއްގެ ފެންގަނޑު އެންމެ ފުން ހިސާބުކަމަށް ވެއެވެ.

އަލަށް ހުޅުވުނު ޕަދްމާ ބްރިޖްގެ ސަބަބުން ބަންގްލަދޭޝްގެ މުހިންމު 21 ޑިސްޓްރިކްޓް ގުޅާލަދޭއިރު ބްރިޖްގެ ސަބަބުން އެގައުމުގެ 465 ބިލިއަން ޑޮލަރުގެ އިގްތިސާދު އިތުރަށް ފުޅާވެ، 2022-23 ގައި 7.1 އިންސައްތައިގެ ކުރިއެރުމެއް ހާސިލްވާނެ ކަމަށް އޭޝިއަން ޑިވެލޮޕްމަންޓް ބޭންކުން އަންދާޒާކޮށްފައިވެއެވެ.