ރިލްވާނުގެ މަރާއި ގުޅިގެން އަހަނދު ހައްޔަރުކޮށްފި
ފުލުހުން ވަނީ ހައްޔަރު ކުރުމަށް ޚާއްސަ އޮޕަރޭޝަނެއް ހިންގާފައި
ރިލްވާނުގެ މަރާއި ގުޅިގެން ހައްޔަރު ކުރި އަހުމަދު އިސްމާއިލް
ނޫސްވެރިޔާ އަހުމަދު ރިލްވާންގެ މައްސަލައިގެ ތުހުމަތުގައި މީހަކު ހައްޔަރު ކޮށްފިއެވެ.
މި މައްސަލައިގައި ހައްޔަރު ކޮށްފައިވަނީ އަހުމަދު އިސްމާއިލް (އަހަނދު)އެވެ.
އޭނާއަކީ މީގެ ކުރިންވެސް އެކި މައްސަލަތަކުގެ ކުށުގެ ރެކޯޑު އޮންނަ މީހެކެވެ. އޭނާއަކީ ރާއްޖޭގައި ޙަރަކާތްތެރިވާ ގޭންގެއްގެ އިސްކޮށް އުޅޭ ފަރާތެއްކަމަށް ފުލުހުން ވަނީ ބުނެފައެވެ.
ނޫސްވެރިޔާ އަހުމަދު ރިލްވާންގެ މައްސަލައިގެ ތަހުޤީޤު މަރު ކޮމިޝަނުން އެއްކޮށް ނިންމައި، މިއަހަރު މެދުތެރޭގައި ރައީސަށް ހުށައަޅުއްވާނެކަމުގެ ޔަޤީންކަން މަރު ކޮމިޝަނުން ދީފައިވާކަން ރައީސް ސޯލިޙު ވަނީ ފާހަގަ ކުރައްވާފައެވެ.
މަރު ކޮމިޝަނުން އެންމެ އިސްކަމެއް ދީގެން ކުރިއަށް ގެންގޮސްފައިވަނީ ނޫސްވެރިޔާ އަޙްމަދު ރިލްވާން ގެއްލުވާލާފައިވާ މައްސަލަކަން ފާހަގަކުރައްވައި ރައީސް ވިދާޅުވީ، މިހާތަނަށް ކޮމިޝަންގެ ފަރާތުން 200 އަށް ވުރެ ގިނަ މީހުންނާއި ސުވާލުކޮށްފައިވާ ކަމަށެވެ. ބޭރުގެ ފައިނޭންޝަލް އެކްސްޕަރޓެއްގެ އެހީގައި މާލީ މުޢާމަލާތްތައް އެނަލައިޒްކޮށްފައިވާކަންވެސް ރައީސް ފާހަގަކުރެއްވިއެވެ.
ރައީސް ވިދާޅުވީ، މި އަހަރުގެ މެދުތެރޭގައި ތަހްޤީގު އެއްކޮށް ނިންމައި ކޮމިޝަންގެ ހޯދުންތައް އެމަނިކުފާނަށް ހުށަހަޅާނެކަމުގެ ޔަޤީންކަން ދެއްވާފައިވާކަމަށެވެ.
