މިދިޔަ ބުރާސްފަތި ދުވަހު މާލެ ޖަލު ސަރަހައްދުގައި ހިނގި މުޒާހަރާއަށްފަހު ފުލުހެއްގެ ފޮޓޯ ވަރަށް ގަދައަށް ސޯޝަލް މީޑިއާގައި އާއްމުވިއެވެ. އޭނާގެ ފޮޓޯ އާއްމު ކޮށްފައިވަނީ އޭނާގެ ޤައުމިއްޔަތާ މެދު ސުވާލު އުފައްދަމުންނެވެ. އެއީ އޭނާ ހުރި ސިފައިގެ ސަބަބުންނެވެ. މަތިމަހެއް ހުރުމުންނެވެ.
އެ ޕޯސްޓް ޝެއަރ ކުރި ބައެއް ޕޭޖުތަކާއި މީހުން އެ ފުލުސް އޮފިސަރަށް ފާޑުކިޔައި މަލާމާތް ކުރީ އޭނާ އިންޑިއާގެ ރައްޔިތަަކަށް ހަދައިގެންނެވެ. އެހެންނަމަވެސް އެއީ ދިވެހި ދަރިއެއްކަން ފުލުހުން ވަނީ "ރާއްޖެ އެމްވީ" އަށް ކަށަވަރު ކޮށްދީފައެވެ. ފާޑު ކިޔައި ފޭސްބުކްގައި މަލާމާތް ކުރި މީހުންނާ އެއްގޮތަށް މި ޤައުމަކީ އޭނާގެ ވެސް އުފަން ޤައުމެވެ. ތަފާތަކަށްވީ އޭނާގެ ސިފައެވެ.
މަތިމަހެއް ހުރުމަކީ އެ މީހަކު އެހެން ޤައުމަކަށް ނިސްބަތްވާންވީ ސަބަބެއް ނޫނެވެ. ދިވެހިންގެ ތެރޭގައި ޒަމާނުއްސުރެ މަތިމަސް އެކަނި ބަހައްޓާ މީހުން ވެސް ދިރިއުޅެއެވެ. އަދި ތުބުޅި އެކަނި ބައްޓާ މީހުންނާއި ތުބުޅިއާއި މަތިމަސް ވެސް ބަހައްޓާ މީހުންނާއި މަތިމަހާއި ތުބުޅި ބާލާފައި ހުންނަ މީހުން ވެސް ދިރިއުޅެވެ. ނަމަވެސް މަތިމަހުގެ ސަބަބުން، ސިޔާސީ ބޭނުމެއްގައި ވަކި ޤައުމަކަށް ފާޑުކިޔުމުގެ ނިޔަތުގައި މުޅި ސޯޝަލް މީޑިއާގައި ފާޑު ކިޔެމުންދަނީ ދިވެހި ދަރިއަކަށެވެ.
މިއީ ފުލުހެއް ހުރި ސިފައިގެ ސަބަބުން ފޮޓޯ އާއްމުކޮށް ފާޑުކީ ފުރަތަމަ ފަހަރެއް ނޫނެވެ. މީގެ ކުރިންވެސް މުޒާހަރާއެއްގެ ތެރެއިން ފުލުހެއްގެ ފޮޓޯ ނަގައި އޭނާއަކީ އެހެން ޤައުމެއްގެ މީހެއް ކަމަށް ތުހުމަތުކޮށް ވަޒީފާ ލިބުނު ގޮތާ މެދު ސުވާލު އުފައްދާފައިވެއެވެ.
މި ޕޯސްޓުތައް ފެނި އުފެދޭ ސުވާލުތައް ބައިވަރެވެ. ދިވެއްސަކަށް ވާން ބޭނުންވަނީ ސިފައެއްތޯއެވެ. އެހެންކަމަށްވާނަމަ ދިވެއްސެއްކަން އެނގެނީ ކޮން ސިފަތަކެއް ހުރެގެންތޯއެވެ. ކުޑަކޮށްވެސް އެހެން ޤައުމެއްގެ މީހެއްގެ ގައިގައި ހުންނަ ސިފަ ހުރެއްޖެ ނަމަ އެ މީހާއަކީ ދިވެއްސަކަށް ނުވަނީތޯ އެވެ. އަދި ވަކި ވަޒީފާއެއް އަދާ ކުރާނަމަ ދިވެއްސަކަށް ނުވަނީތޯއެވެ.
ދިވެހިން އަމިއްލަ ސިކުނޑީގައި މީހާގެ ޤައުމިއްޔަތު ނިންމަނީ ހަމައެކަނި ސޯޝަލް މީޑިއާގައި އެކަންޏެއް ނޫނެވެ. އާއްމު ދިރިއުޅުމުގައި ވެސް އެފަދަ ކަންކަން ވަރަށް ގިނައިން ފެނެއެވެ. އެގޮތުން، ފިހާރަތަކުން ފެންނަ "ދިވެހި ސިފަ" ނެތް ކޮންމެ ފިރިހެނަކީ ބިދޭސީއެއް ކަމަށް އަމިއްލައަށް ނިންމައި އޭނާއާ ބިދޭސީންނާ ވާހަކަދައްކާ ބަހުރުވައިން ވާހަކަދައްކާ މީހުން ވެސް މަދެއް ނޫނެވެ.
ރާއްޖޭގައި އެހެން ޤައުމުތަކުގެ މީހުންނާ އިނދެގެން އުޅޭ މީހުން ވެސް އިތުރުވަމުން އަންނައިރު އެ މީހުންނަށް ލިބޭ ދަރިންގެ ގައިގައި "ދިވެހި ސިފަ" ނެތް ނަމަ ފާޑު ކިޔައެވެ. ލޯ ކުޑަވެއްޖެ ނަމަ އެވީ ޗައިނާ މީހަކަށެވެ. ހަމުގެ ކުލަ މާބޮޑަށް އަލިވެފައި ލޮލުގެ ކުލަ ތަފާތު ވެއްޖެނަމަ އެވީ ޔޫރަޕްގެ މީހަކަށެވެ. އަދި މާބޮޑަށް ކަޅުވެއްޖެނަމަ އެ މީހަކު ވަނީ އެފްރިކާގެ މީހަކަށެވެ.
ދިވެހިރާއްޖެއަކީ އެކި ޤައުމުތަކުން މީހުން އައިސް ވަޒަން ވެރިވެފައިވާ ޤައުމަކަށްވާއިރު ދިވެހިންގެ ސީދާ ދަރިފަސްކޮޅު އަދި އެއްވެސް ބަޔަކަށް ކަށަވަރު ކުރެވިފައި ނުވެއެވެ. ދިވެހިންގެ ތެރޭގައި ކައިރި ޤައުމުތައް ކަމަށްވާ އިންޑިއާ އާއި ސްރީލަންކާ ފަދަ ޤައުމުތަކުގެ ދަރިފަސްކޮޅަށް ނިސްބާތްވާ މީހުން ވެސް ހިމެނޭ ކަމަށް ތާރީހު ދިރާސާކުރާ ބައެއް ފަރާތްތަކުން ބުނެއެވެ. އެހެންކަމަށްވާނަމަ އަވައްޓެރި ޤައުމެއްގެ މީހެއްގެ ގައިގައި ހުންނަ ސިފަ ހުރުން އެއީ ދިވެއްސަކަށް ނުވާންވީ ސަބަބެއް ނޫނެވެ.
ޤައުމިއްޔަތަށް ސުވާލުކޮށް މީހުންގެ ފޮޓޯ އާއްމުކޮށް އެ މީހާއަށް ފާޑުކިޔުމަކީ ވެސް ބުލީ ކުރުމެވެ. ސޯޝަލް މީޑިއާއަކީ ތެދު ދޮގު ނުބަލައި ސިކުންތު ކޮޅެއްގެ ތެރޭގައި ޕޯސްޓުތައް ވައިރަލް ކޮށްލާ ޕްލެޓްފޯމް އަކަށްވާއިރު މީހަކަށް ފާޑުކިޔައި އޭނާގެ ކަރާމަތާއި އަބުރަށް ގެއްލުންވާ ގޮތަށް ޕޯސްޓު ކުރުމުގެ ކުރިން ހަގީގަތް އޮޅުން ފިލުވަން ޖެހެއެވެ. އަމިއްލަ މަންފާއަށް ނުވަތަ ސިޔާސީ މަންފާއަށް ދޮގު ޚަބަރު ފެތުރުމުގެ ސަބަބުން ލިބިދާނެ ގެއްލުމާ މެދު ވިސްނާލުން މުހިންމެވެ.
