މިއީ ސިޓީ ކުރިއަށް ދާން ލިބުނު ވަރަށް ބޮޑު އުންމީދެއް: ނަލަ

އެސޯސިއޭޝަން ކަޕް ކާމިޔާބުކުރެވުމަކީ ސްޕޯޓްސް ކުލަބް ސިޓީ ކުރިއަށް ދާން ލިބުނު ވަރަށް ބޮޑު އުންމީދެއް ކަމަށް އެ ޓީމުގެ ކޯޗު ހުސެއިން ޝަރީފް (ނަލަ)ބުނެފިއެވެ.

މިއަހަރުގެ އެސޯސިއޭޝަން ކަޕްގެ ފައިނަލްގައި ތިން ސެޓު ދެ ސެޓުން ކުލަބް ވެމްކޯ ބަލިކޮށް، ބުރާސްފަތި ދުވަހުގެ ރޭ ސިޓީން ވަނީ މުބާރާތުގެ ތަށި އުފުލާލާފައެވެ. މިއީ ސިޓީ އުފެދުނު ފަހުން ފާއިތުވި 13 އަހަރުގެ ތެރޭގައި އެ ޓީމުން ފުރަތަމަ ޑިވިޝަންގެ ފައިނަލެއް ކުޅެ، ތަށި ކާމިޔާބުކުރި ފުރަތަމަ ފަހަރެވެ.

ފައިނަލް މެޗަށްފަހު ވާހަކަ ދައްކަމުން ނަލަ ބުނީ ލިބުނު ކާމިޔާބަށް ޝުކުރު ކުރާކަމަށެވެ. ސިޓީއަށް ލިބުނީ ވަރަށް ބޮޑު ކާމިޔާބެއްކަން ފާހަގަކުރަމުން ނަލަ ބުނީ، ޓީމުގެ ކޯޗިން އޮފިޝަލުންނާއި ހުރިހާ ކުޅުންތެރިންގެ ފަރާތުން ވަރަށް ބޮޑު އެހީތެރިކަމަކާއި އެއްބާރުލުމެއް ލިބުނު ކަމަށެވެ. އެކަމުގެ ސަބަބުން ކޯޗުގެ މަސައްކަތްތަކަށް ވަރަށް ބޮޑު ލުޔެއް ލިބޭ ކަމަށް ވެސް ނަލަ ބުންޏެވެ. ކުރިއަށް އޮތް މުބާރާތްތަކަށް ވެސް ސިޓީ ނިކުންނާނީ މިހާރު އޮތް ރޫހުގައި ކަމަށް ވެސް އޭނާ ވަނީ ބުނެފައެވެ.

ނަލަ ބުނީ ފައިނަލްގެ ކުރިން ރެސްޓުކޮށްފައި، ފަރިތަކުރަން ރަނގަޅު ވަގުތެއް ލިބުނު ކަމަށެވެ. ލިބުނު ވަގުތުގައި ރަނގަޅަށް ރެސްޓުކޮށް އަދި ފަރިތަކުރެވުމުގެ ފައިދާ ވެސް ލިބުނު ކަމަށް ނަލަ ބުންޏެވެ. މީގެ އިތުރުން ނަލަ ބުނީ މުބާރާތުގެ ތަށި ލިބުމަކީ ވޮލީ ބޯޅައެއް ޚިދުމަތް ކުރާ ކުލަބެއްގެ ހައިސިއްޔަތުން ސިޓީ ކުރިއަށްދާން ލިބުނު އުންމީދަކާއި ހިތްވަރެއް ކަމަށެވެ.

މުބާރާތުގައި ރަނގަޅު ކުޅުމެއް ދެއްކި ސިޓީން، ފައިނަލްގެ ޖާގަ ހޯދީ ލީގު ބުރުގެ އެއް ވަނަ ޓީމުގެ ގޮތުގައި އޮވެއެވެ.