ކުށެއް ނެތް ފޮތް ދޫކުރުމަށް ޚާއްސަ މަސައްކަތެއް ވަނީ ފަށާފައި: ޕަރމަނަންޓް ސެކެޓްރީ އަހުމަދު އަލީ
ގްރޭޑް 9 އަދި 10ގެ ދަރިވަންގެ މައިގަނޑު ޓެކްސްޓް ފޮތްތައް ހުންނާނީ ޑިޖިޓަލް ޓެކްސްޓްބުކްގެ ގޮތުގައި
އެޑިއުކޭޝަން މިނިސްޓްރީގެ ޕަރމަނަންޓް ސެކެޓްރީ އަހުމަދު އަލީ
އިސްލާމް އަދި ގުރުއާން ޓެކްސްޓް ފޮތްތަކުން މީގެ ކުރިން ފާހަގަވީ ކުށްތައް ރަނގަޅުކޮށް ކުށެއް ނެތް ފޮތް ދޫކުރުމަށް ޚާއްސަ މަސައްކަތެއް ފަށާފައިވާ ކަމަށް އެޑިއުކޭޝަން މިނިސްޓްރީގެ ޕަރމަނަންޓް ސެކެޓްރީ އަހުމަދު އަލީ ވިދާޅުވެއްޖެއެވެ.
ދިރާސީ އައު އަހަރަށް މިނިސްޓްރީން ވަމުންދާ ތައްޔާރީތަކާއި ގުޅޭގޮތުން ރާއްޖެޓީވީގެ ފަލަސުރުޚީ ޕްރޮގްރާމުގައި ވާހަކަދައްކަވަމުން އަހުމަދު ވިދާޅުވީ ނިމިގެންދިޔަ ދިރާސީ އަހަރުގައި އިސްލާމް އަދި ދިވެހި ފޮތްތަކުން ކުށްތަކެއް ފާހަގަވެގެން ދިޔަ ކަމަށެވެ. މިއާއެކު މިނިސްޓަރގެ ޚާއްސަ ބެއްލެވުމުގެ ދަށުން ކޮމިޓީއެއް އެކުލަވާލައިގެން މިކުށްތައް ރަނގަޅު ކުރުމުގެ މަސައްކަތް ކުރިއަށް ގެންދިޔަކަން އަހުމަދު ފާހަގަކުރެއްވިއެވެ.
އަހުމަދު ވިދާޅުވީ އޭރު ފެންމަތިވި މައްސަލަތަކުގެ އިތުރުންވެސް އެހެން މައްސަލައެއް ހުރިތޯ ބެލުމަށްފަހު އެކުށްތައް ރަނގަޅު ކުރުމުގެ މަސައްކަތް މިހާރު ކުރަމުންދާ ކަމަށެވެ. އަދި ދިރާސީ އައު އަހަރުގެ ކިޔެވުން ފެށެންވާއިރަށް ހުރިހާ ދަރިވަރުންނަށް ބޭނުންވާ ޓެކްސްޓް ފޮތްތައް ދަރިވަރުންނަށް ފޯރުކޮށްދިނުމުގެ މަސައްކަތް ކުރަމުން އަންނަކަން އަހުމަދު ފާހަގަކުރެއްވިއެވެ.
މީގެ އިތުރުން އަހުމަދު ވިދާޅުވީ ގްރޭޑް 9 އަދި 10ގެ ދަރިވަންގެ މައިގަނޑު ޓެކްސްޓް ފޮތްތައް ހުންނާނީ ޑިޖިޓަލް ޓެކްސްޓްބުކްގެ ގޮތުގައި ކަމަށެވެ.
އަހުމަދު ވިދާޅުވީ ކުރިއަށް އޮތް ދިރާސީ އައު އަހަރަށް ބޭނުންވާ ޓެކްސްޓް ފޮތްތައް ސްކޫލުތަކަށް ބެހުމުގެ މަސައްކަތް މިހާރު ފަށާފައިވާ ކަމަށެވެ. އެގޮތުން ގްރޭޑް އެކަކުން 10ގެ ދަރިވަރުންނަށް ބޭނުންވާ ފޮތްތައް މާލޭގެ ގިނަ ސްކޫލްތަކަކާއި ހަވާލުކޮށް ނިމިފައިވާކަން އަހުމަދު ފާހަގަކުރެއްވިއެވެ. މީގެ އިތުރުން ފުވައްމުލައް، އައްޑޫ އަދި ކުޅުދުއްފުށި ފަދަ ބޮޑެތި ސިޓީތަކުގެ ސްކޫލްތަކަށް ފޮތްތައް ފޮނުވުމުގެ މަސައްކަތް ހޮނިހިރު ދުވަހު ފަށާނެކަމަށް އަހުމަދު ވިދާޅުވިއެވެ. ހަމައެހެންމެ ކުރިއަށް އޮތް ހަފްތާގެ ތެރޭގައި ގިނަ އަތޮޅުތަކުގެ ސްކޫލުތަކަށް ފޮތްތައް ހަވާލުކުރުމުގެ މަސައްކަތް ކުރިއަށްދާނެ ކަމަށް އަހުމަދު ވިދާޅުވިއެވެ.
