ފަތުރުވެރިކަމުގެ ދާއިރާއަށް ބޭނުންވާވަރަށް ދިވެހިން ނުލިބޭ ކަމަށާއި, އެހެންވާނަމަ ބިދޭސީ މުވައްޒަފުންގެ އަދަދު އިތުރުކުރުމަށް ވިސްނަންޖެހޭކަމަށް ޓޫރިޒަމް މިނިސްޓަރ ޑރ. އަބްދުﷲ މައުސޫމް ވިދާޅުވެއްޖެއެވެ.

މިނިސްޓަރ މައުސޫމް މިހެން ވިދާޅުވީ، ބުރާސްފަތި ދުވަހު ކުރިއަށްދިޔަ މަޓީގެ އަހަރީ އާއްމު ޖަލްސާގައި ފަތުރުވެރިކަމުގެ ދާއިރާގެ ބައެއް އިސް ބޭފުޅުން ކުރެއްވި ސުވާލަކަށް ޖަވާބުދެއްވަމުންނެވެ. އެގޮތުން، ފަތުރުވެރިކަމުގެ ދާއިރާގެ އެނދުތައް އިތުރުވަމުންދާއިރު، ދިވެހިން ލިބުމުގައި ދަތިވާކަމަށާއި ރާއްޖޭގެ ރިސޯޓުތަކުގައި ވަޒީފާދޭއިރު ދިވެހިންގެ 45 އިންސައްތަ ތިބެންޖެހޭގޮތަށް މަޖުބޫރުކޮށްފައި އޮތްއޮތުމަށް ބަދަލު ގެންނަން ނުވިސްނަވަންތޯ ވަނީ ސުވާލުކުރައްވާފައެވެ.

އެ ސުވާލަށް ޖަވާބު ދެއްވަމުން މައުސޫމް ވިދާޅުވީ، ފަތުރުވެރިކަމުގެ ދާއިރާއަށް ދިވެހިން ލިބުން މަދުކަން ފާހަގަކުރެވޭ ކަމަށެވެ. އަމިއްލަފުޅަށްވެސް ރިސޯޓެއް މެނޭޖް ކުރެއްވިކަން ފާހަގަކުރައްވައި، މުވައްޒަފުން ނުލިބޭނަމަ ރިސޯޓް ހިންގަން ދަތިވާނެކަމަށްވެސް މިނިސްޓަރ ވިދާޅުވިއެވެ.

މިނިސްޓަރ ވިދާޅުވީ، ސްކޫލް ނިންމާ ދަރިވަރުންގެ އާބާދީ 6000ށްވެސް ނާރާކަމަށާއި، ނަމަވެސް ފަތުރުވެރިކަން ފުޅާވަމުން އަންނަ ހަލުވިމިނަށް ބަލައި، އަހަރަކު 10،000 މުވައްޒަފުން ފަތުރުވެރިކަމުގެ ދާއިރާއަށް ބޭނުންވާނެ ކަމަށެވެ. އަދި ސްކޫލް ނިންމާ އާބާދީގެ ތެރެއިން ވެސް ފަތުރުވެރިކަމުގެ ދާއިރާގެ ވަޒީފާތައް ޚިޔާރުކުރާނީ މަދު އިންސައްތައެއް ކަމަށާއި، އެހެންކަމަށްވާނަމަ ދާއިރާ ހިންގުމަށް ބިދޭސީންގެ އަދަދު އިތުރު ކުރުމަށް ވިންސަންޖެހޭކަމަށެވެ.

ދިވެހިން ނުލިބޭނަމަ ބިދޭސީންގެ އަދަދު އިތުރުކުރުމަށް ވިސްނަން ޖެހޭކަމަށް ވިދާޅުވިނަމަވެސް، އެގޮތަށް އަމަލުކުރާނީ ދިވެހިންނަށް ހުރި ފުރުސަތުތައް ހަނިނުވާގޮތަށް ކަމަށްވެސް މިނިސްޓަރ މައުސޫމް ވިދާޅުވިއެވެ. އެގޮތުން، މަތީ މަގާމުތަކާއި ދިވެހިން ގިނައިން ޝައުގުވެރިކަން ހުންނަ މަގާމުތައް ދިވެހިންނަށް ޚާއްސަކުރަންޖެހޭ ކަމަށާއި، ދިވެހިންނަކީ ދާއިރާގައި ހުނަރު ހުރި ބައެއްކަން މިނިސްޓަރ ފާހަގަކުރެއްވިއެވެ.

މަޓީގެ އަހަރީ އާއްމު ޖަލްސާގައި ރިސޯޓުތަކުގެ ބައުންޑްރީ އޭރިއާއާ ގުޅޭގޮތުން ވެސް މިނިސްޓަރ މައުސޫމާ ވަނީ ސުވާލުކޮށްފައެވެ. އެގޮތުން، ވިލާތައް ހުންނަ ސަރަހައްދާ ދިމާލުގައި ރޭގަނޑުވަގުތު މަސްބޭނުން ފަދަ ކަންކަން ކުރުމުން، ފަތުރުވެރިން ކަންބޮޑުވާކަމަށާއި، ބައުންޑްރީ ސަރަހައްދު 500 މީޓަރުން 1000 މީޓަރަށް ބަދަލުކުރުމާ ދޭތެރޭ ދެކޭގޮތާ ގުޅޭގޮތުން ސުވާލުކުރިއެވެ.

އެ ސުވާލަށް ޖަވާބު ދެއްވަމުން މިނިސްޓަރ ވިދާޅުވީ އެ މަޝްވަރާތައް ކުރެވޭކަމަށާއި، ކުރިއަށް އޮތްތަނުގައި ބައުންޑްރީ ސަރަހައްދު 1000 މީޓަރަށް އިތުރުކޮށް އެ ސަރަހައްދު އެނގޭ ގޮތް ހަދާފައި ހުންނާނެ ކަމަށެވެ. އަދި 1000 މީޓަރަށްވުރެ ކައިރި ހިސާބުގައި އޮންނަ ރިސޯޓުތަކުގެ ބައުންޑްރީ ދެބައިކުޅަ އެއްބަޔަށް ހަދަން މަޝްވަރާތައް ކުރެވޭ ކަމަށްވެސް މިނިސްޓަރ މައުސޫމް ވިދާޅުވިއެވެ.