ކްރިމިނަލް ކޯޓުގައި ފުނިޖެހިފައިވާ މައްސަލަތައް ނިންމުމަށް އިތުރު ގަޑީގައި މަސައްކަތް ކުރައްވާ ގާޒީންނަށް އިތުރު އެލަވަންސެއް ދިނުމަށް ރައްޔިތުންގެ މަޖިލީހުގެ މާލިއްޔަތު ކޮމިޓީން ފާސްކޮށްފިއެވެ.

ބުދަ ދުވަހު އޮތް މާލިއްޔަތު ކޮމިޓީ ބައްދަލުވުމުގައި ވަނީ ކްރިމިނަލް ކޯޓުގެ ބެކްލޮގް ސާފު ކުރުމުގެ ނުރަސްމީ ގަޑީގައި އަޑުއެހުންތައް ބާއްވައި އެކަން ކުރިއަށް ގެންދިއުމަށްޓަކައި ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަނުން ފޮނުވާފައިވާ މައްސަލައަށް ގޮތެއް ނިންމާފައެވެ.

ޑީޖޭއޭއިން ފޮނުވާފައިވާ ސިޓީގައި ބަޔާން ކޮށްފައިވަނީ ހަލައްކަ ރުފިޔާ އިތުރަށް ޚަރަދު ކޮށްގެން މިހާރު ބެކްލޮގްގައި އޮތް 1182 މައްސަލަ ކުރިއަށް އޮތް 4 މަހެއްހާ ދުވަހުގެ ތެރޭގައި ކްލިއަރ ކުރެވޭނެ ކަމަށެވެ.

އެކަމަށްޓަކައި އިތުރު ގަޑީގައި މަސައްކަތަށް ނުކުންނަ ގާޒީންނަށް ދުވާލެއްގެ މައްޗަށް 500 ރުފިޔާގެ އެލަވަންސެއް އެ މުއްދަތުގެ ތެރޭގައި ދޭ ގޮތަށް ވަނީ ހުށައަޅާފައެވެ.

އެ ހުށައެޅުމަށް ވިލުފުށީ ދާއިރާގެ މެމްބަރު ޙަސަން އަފީފް ވަނީ ތާއީދު ކުރައްވާފައެވެ. އެހެންނަމަވެސް، 4 މަހަށްވުރެ އެ މުއްދަތު އިތުރުވެގެން ނުވާނެކަމަށް މެމްބަރު ފާހަގަ ކުރެއްވިއެވެ.

އެގޮތުން 4 މަހަށްވުރެ މުއްދަތު އިތުރުވާނަމަ، އެ މުއްދަތަށްފަހު އެލަވަންސް ނުދިނުމަށް މެމްބަރު ވަނީ ހުށައަޅުއްވާފައެވެ.

މެމްބަރު ޙަސަން އަފީފްގެ މި ހުށައެޅުއްވުމަށް ކާށިދޫ ދާއިރާގެ މެމްބަރު އަބްދުﷲ ޖާބިރު ވަނީ ތާއީދު ކުރައްވާފައެވެ. ވުމާއެކު، އެ ހުށައެޅުން ކޮމިޓީ މެމްބަރުންގެ އިއްތިފާޤުން ވަނީ ފާސްކޮށްފައެވެ.

ކްރިމިނަލް ކޯޓުގައި ނުނިމިހުރި މައްސަލަތައް ނިންމައި، އެ ކޯޓުގެ "ބެކްލޮގް" ސާފުކުރުމަށްޓަކައި ކޯޓުގެ މަސައްކަތު ގަޑިވެސް ވަނީ އިތުރުކޮށްފައެވެ. މި ބަދަލަކީ ޖުޑީޝަލް ސަރވިސް ކޮމިޝަން (ޖޭއެސްސީ) އިން ކްރިމިނަލް ކޯޓުގެ ފަނޑިޔާރުންނާއި މަޝްވަރާ ކުރުމަށްފަހު ރައްޔިތުންގެ މަޖިލީހުގެ ޖުޑީޝަރީ ކޮމިޓީގައިވެސް އެކަންކަމާއި ގުޅިގެން މަޝްވަރާ ކުރެވިފައިވާ ބަދަލެކެވެ.