ކޮވިޑް-19 ހެލްތު ފެސިލިޓީ ޕްރޮޖެކްޓަށް އީއައިބީން 18.4 މިލިއަން ޔޫރޯގެ ލޯނެއް
މި އެއްބަސްވުމުގެ ދަށުން ލޯނު ދޫކުރަނީ ކޮންސެޝަނަލް ޓާރމްތަކެއްގައި
އީއައިބީ ލޯނު އެއްބަސްވުމުގައި ސޮއިކުރުމުގެ ރަސްމިއްޔާތުގެ ތެރެއިން
"މޯލްޑިވްސް ކޮވިޑް-19 ހެލްތު ފެސިލިޓީ" ޕްރޮޖެކްޓަށް ބޭނުންވާ ފައިސާ ހަމަޖެއްސުމަށް ދިވެހި ސަރުކާރާއި ޔޫރަޕިއަން އިންވެސްޓްމަންޓް ބޭންކް (އީއައިބީ) އާ ދެމެދު ލޯނު އެއްބަސްވުމެއްގައި ސޮއިކޮށްފިއެވެ.
މި އެއްބަސްވުމުގެ ދަށުން އީއައިބީން ރާއްޖެއަށް 18.4 މިލިއަން ޔޫރޯ (299.14 މިލިއަން ރުފިޔާ) ގެ ލޯނު ދޫކުރާނެއެވެ. މިއީ އީއައިބީން ތައާރަފުކޮށްފައިވާ "ސައުތު އޭޝިއާ ޕަބްލިކް ހެލްތު ކެއަރ ކޮވިޑް-19 ޕްރޮގްރާމް ލޯން" ގެ ދަށުން ރާއްޖެއަށް ދޭ ލޯނެކެވެ.
ބުދަ ދުވަހު މި އެއްބަސްވުމުގައި ދިވެހި ސަރުކާރުގެ ފަރާތުން ސޮއިކުރެއްވީ ފިނޭންސް މިނިސްޓަރު އިބްރާހިމް އަމީރެވެ. އަދި އީއައިބީގެ ފަރާތުން ސޮއިކުރެއްވީ އެ ބޭންކުގެ ގްލޯބަލް ޕާރޓްނަރސް ޑިރެކްޓަރު މިސް މާރިއާ ޝޮއެވެ. މި ރަސްމިއްޔާތު ބާއްވާފައިވަނީ ބެލްޖިއަމްގެ ބްރެސަލްސްގައި ކުރިއަށްދާ "ޔޫރަޕިއަން ޑިވެލޮޕްންޓް ޑޭސް" އިވެންޓުގައެވެ.
ފިނޭންސް މިނިސްޓްރީން މައުލޫމާތު ދޭ ގޮތުގައި މި އެއްބަސްވުމުގެ ދަށުން ލޯނު ދޫކުރަނީ ކޮންސެޝަނަލް ޓާރމްތަކެއްގައެވެ. އަދި ދިގު މުއްދަތަކަށް ބަހާލައިގެން ލޯނު ދެެއްކޭނެ ކަމަށް ވެސް އެ މިނިސްޓްރީން ބުނެއެވެ.
މި ލޯނުގެ ދަށުން ރާއްޖޭގެ ސިއްހީ ނިޒާމް ތަރައްގީ ކުރުމަށް ޒަމާނީ ވަސީލަތްތަކާއެކު ނެޝަނަލް ހެލްތު ލެބޯޓްރީއެއް ގާއިމް ކުރާނެއެވެ. އަދި އަތޮޅުތެރޭގައި އިންފެކްޝަން ޑިސީޒް ވޯޑުތައް ވެސް މި ލޯނުގެ ދަށުން ގާއިމްކުރަން ވަނީ ނިންމާފައެވެ. އެގޮތުން 18 ރަށެއްގައި އައިސޮލޭޝަން ފެސިލިޓީތައް ގާއިމް ކުރެވޭނެ ކަމަށް ފިނޭންސް މިނިސްޓްރީން ބުނެއެވެ.
ލޯނު އެއްބަސްވުމުގެ ދަށުން ހިންގާ މަޝްރޫއުގެ ސަބަބުން ރާއްޖޭގެ ސިއްހީ ހިދުމަތުގެ ނިޒާމް ޒަމާނީކޮށް، ލާމަރުކަޒު ކުރުމުގެ ފުރުސަތު މަގުފަހިވެގެންދާނެ ކަމަށް ވެސް ފިނޭންސް މިނިސްޓްރީން ބުނެއެވެ.
