އިންކަމް ސަޕޯޓް އެޕްރެންޓިސްޝިޕް ޕްރޮގްރާމްގައި ބައިވެރިވާން އިތުރު ފުރުސަތުތަކެއް ހުޅުވާލަނީ
22 ޖޫން 2022 | ބުދަ 16:02އާރުޑީސީން ވަނީ 14 ދާއިރާއަކުން ތަމްރީން ހޯދުމުގެ ފުރުސަތު ހުޅުވާލާފައި
އިކޮނޮމިކް މިނިސްޓްރީއާއި އާރުޑީސީއާ ދެމެދު އެއްބަސްވުމުގައި ސޮއިކުރުން
ކޮވިޑް-19ގެ އިމަޖެންސީ އިންކަމް ސަޕޯޓް ޕްރޮޖެކްޓުގެ ދަށުން ހިންގަމުންދާ އެޕްރެންޓިސްޝިޕް ޕްރޮގްރާމުގެ އިތުރު ފުރުސަތުތަކެއް ހުޅުވުމަށް އިކޮނޮމިކް މިނިސްޓްރީން ރޯޑް ޑެވެލޮޕްމަންޓް ކޯޕަރޭޝަން (އާރުޑީސީ)އާއެެކު އެއްބަސްވުމެއްގައި ސޮއިކޮށްފިއެވެ.
ބުދަ ދުވަހު ބޭއްވި ރަސްމިއްޔާތެއްގައި އިކޮނޮމިކް މިނިސްޓްރީގެ ފަރާތުން އެއްބަސްވުމުގައި ސޮއިކުރެއްވީ ސްޓޭޓް މިނިސްޓަރ ނީޒާ އިމާދުއެވެ. އަދި އާރުޑީސީގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރ މޫސާ އަލިމަނިކުއެވެ.
މި ޕްރޮގްރާމުގެ ދަށުން 14 ދާއިރާއަކުން އާރުޑީސީން ތަމްރީންވުމުގެ ފުރުސަތު ހުޅުވާލާނެއެވެ.
އާރުޑީސީން ފުރުސަތު ހުޅުވާލާ ދާއިރާތައް
އިކޮނޮމިކް މިނިސްޓްރީން ފަށާފައިވާ އިންކަމް ސަޕޯޓް ޕްރޮޖެކްޓަކީ ކޮވިޑުގެ ބަލިމަޑުކަމުގެ ސަބަބުން އާމްދަނީއަށް ނުރަނގަޅު އަސަރުކޮށްފައިވާ ފަރާތްތަކަށް ވަޒީފާގެ ފުރުސަތު ހޯދުމަށް މަގުފަހިކޮށްދިނުމެވެ. އަދި ކަނޑައެޅިފައިވާ އެކި ދާއިރާތަކުން ފަންނީ ގާބިލުމީހުން ބިނާކޮށް، ވަޒީފާގެ މައިދާނަށް ނިކުންނަ ފަރާތްތަކަށް ވަޒީފާގެ މާހައުލުގައި ބޭނުންވާނެ ތަމްރީނާއި ތަޖުރިބާ ހޯދުމުގެ ފުރުސަތުތަކެއް މި ޕްރޮގްރާމުގެ ދަށުން ފަހިވެގެންދާނެއެވެ.
މި ޕްރޮގްރާމްތަކަށާއި އަދި މި ޕްރޮޖެކްޓުގެ ދަށުން ހިންގާ އިތުރު އެޕްރެންޓިސްޝިޕް ޕްރޮގްރާމްތަކަށް ކުރިމަތިލުމުގެ ފުރުސަތު، ޖޮބް ސެންޓަރ ޕޯޓަލް މެދުވެރިކޮށް މިހާރު ވަނީ ހުޅުވާލަފައެވެ.
