ޕޯޓޯއަށް ކުޅެމުން އައި ޕޯޗުގަލްގެ މިޑްފީލަޑަރު ފަބިއޯ ވިއެރާ އާސެނަލަށް ބަދަލުވެއްޖެއެވެ.
އުމުުރުން 22 އަހަރުގެ ފަބިއޯ އާސެނަލަށް ބަދަލުވީ ދާއިމީ އެއްބަސްވުމެއްގެ ދަށުންނެވެ. ފަބިއޯ އޭނާގެ ސީނިއަރ ކެރިއަރު ފަށާފައިވަނީ 2019 ވަނަ އަހަރު ޕޯޓޯއިންނެވެ. ޕޯޓޯއަށް ޖުމުލަ ކުޅެދިން 102 މެޗުގައި އޭނާ ވަނީ 19 ލަނޑު ޖަހާފައެވެ.
ފަބިއޯ ޕޯޓޯ ދޫކޮށް އާސެނަލަށް ބަދަލުވީ 35 މިލިއަން ޔޫރޯއަށެވެ. އޭނާ ވަނީ އާސެނަލަށް ބަދަލުވުމުގެ ގޮތުން ހަދަން ޖެހޭ މެޑިކަލް ޓެސްޓުތައް ހުކުރު ދުވަހު ހަދާފައެވެ.
ފަބިއޯ އާސެނަލަށް ބަދަލުވުމާ ގުޅިގެން އެ ޓީމުގެ ޓެކްނިކަލް ޑިރެކްޓަރ އެޑޫ ބުނީ ފަބިއޯގެ ސޮއި ލިބުމަކީ އެ ޓީމަށް ލިބުނު އުފަލެއް ކަމަށެވެ. އަދި އެޑޫ ބުނީ ފަބިއޯ އަކީ ޚާއްސަ ކޮލިޓީއެއް ހުރި ކުޅުންތެރިއެއްކަމަށެވެ. އަދި މުޅި އާސެނަލް އޮތީ ފަބިއޯއާއެކު މުސަތަގުބަލުގައި މަސައްކަތް ކުރަން ކަމަށެވެ. އަދި މި ޓްރާންސްފާ މާކެޓުގައި އާސެނަލް ވަރުގަދަ ކުރުމަށް އިތުރު މަސައްކަތް ކުރާނެކަމަށެވެ.
ފަބިއޯއާ ގުޅޭ ގޮތުން އާސެނަލްގެ ކޯޗު އާޓެޓާ ބުނީ، ފަބިއޯ އާސެނަލާ ގުޅުމުން އޭނާ އުފާވާކަމަށެވެ. އަދި ފަބިއޯއަކީ ހުނަރުވެރި މޮޅު ކުޅުންތެރިއެއްކަމަށާއި، ފަބިއޯއާއެކު އާސެނަލްގެ އެޓޭކިން ވަރުގަދަ ވާނެ ކަމަށް އުންމީދުކުރާކަމަށެވެ. އަދި އާސެނަލުން ފަބިއޯއާއި އޭނާގެ އާއިލާއަށް މަރުހަބާ ކިޔާކަމަށް ވެސް އާޓެޓާ ވަނީ ބުނެފައެވެ. އާސެނަލްގައި ފަބިއޯ ބޭނުންކުރާނީ 21 ނަންބަރު ޖާޒީއެވެ.
