ޑްވޯފިޒަމްއާއެކު ހަނގާގެ ޝިކާރައަކަށްވިއަސް، މިއަދު އެއީ ރަންޏެއް!

އުމުރުން 33 އަހަރުގެ އާޔަތު އަލް-ޚަތީބު، އޭނާގެ ދަރިވަރުންނަށް އުނގަންނައިދެމުންދާ ފިލާވަޅުތަކަކީ އެއްވެސް ފޮތެއްގައި ލިޔެފައި އޮއްވާ ފެންނާނެ ފިލާވަޅުތަކެއް ނޫނެވެ.

އުމުރާ އެންމެ އެކަށީގެންވާ މިންވަރަށް ޖިސްމާނީ ހެދިބޮޑުވުމުގައި އުނިކަމެއް ހުރުން ނުވަތަ ޑްވޯފިޒަމްއާއެކު އުފަންވި، މިއަދު ޢަރަބި އަދަބިއްޔާތު އުނގަންނައިދެމުންދާ އާޔަތުގެ އަޒުމާއި އުއްމީދު ބޮޑެވެ. އެހާމެ ފޮންޏެވެ. އާޔަތު އަމާޒު ހިފައިގެން ހުރީ، ކޮންމެ ގޮތަކުންވެސް ހުވަފެންތައް ހަގީގަތަކަށް ހެދުމަށް އޭނާގެ ދަރިވަރުންނަށް އުނގަންނައި ދިނުމަށެވެ. ހުވަފެންތަކުގައި ހަގީގީ ކުލަ ޖެއްސުމަށް އެއްވެސް ކަމަކުން ހުރަހެއް ކުރިމަތި ނުވާނެ ގޮތްތައް ދަރިވަރުންނަށް ކިޔައިދިނުމަށެވެ.

ޅަ އުމުރުގެ ދުވަސްވަރަކީ އާޔަތަށްވެސް މާ އުޖާލާ ދުވަސްތަކެއް ނޫނެވެ. ޖިސްމާނީ ގޮތުން އޭނާގެ ކިބައިގައި ހުރި ތަފާތު ކަމެއްގެ ސަބަބުން، ދަރިވަރެއްގެ ގޮތުގައި އޭނާ އުޅުނު ދުވަސްވަރު، ބުލީ ނުވަތަ ހަނގާ ކުރުމާއި ގަނާ ކުރުމުގެ ޝިކާރައަކަށް ވިއެވެ.

ނަމަވެސް އޭނާގެ އުއްމީދީ އަޒުމު ފިސާރި ވަރުގަދައެވެ. އަމާޒު ކަނޑައެޅި ގޮތަށް، އޭނާ ކިޔެވި ސްކޫލުގައި ޓީޗަރުކަން ކުރަން ފެށިއެވެ.

ސިކުނޑިތަކެއްގެ ވިސްނުން ހެޔޮފާލަކަށް އެޅުވުމުގެ މަސައްކަތަށް އެންމެ ރަނގަޅު ތަނަކީ ސްކޫލް ވެށި ކަމަށް އާޔަތު ގަބޫލު ކުރެއެވެ. އުއްމީދީ ބަދަލުތަކެއްގެ ފެށުން އޮތީ ސްކޫލް މާހައުލުގައި ކަން އޭނާ ގަބޫލު ކުރެއެވެ އެއީ އޭނާގެ ހަރުދަނާ އަޒުމުގެ އެއް މަސްދަރެވެ.

ނަޒާރިތުގެ ހުޅަނގުއުތުރުގެ އިލޫތު އަވަށުގެ ސްކޫލްގައި ހަފުތާއަކު 2 ފަހަރު އާޔަތު ކުލާސް ނަގާދެއެވެ. ކިތަންމެ ބައިވަރު ގޮންޖެހުންތަކަކާ ކުރިމަތިލާންޖެހިފައި އިނެއް ކަމަކު، އާޔަތު މަގުބޫލު ވެފައިވަނީ އޭނާގެ އުފާވެރި ހިނިތުންވުމާއި، އުއްމީދީ އަޒުމުގެ ވެރިއެއްގެ ގޮތުގައެވެ.

އާޔަތުގެ ހިނިތުންވުމުގެ ފަހަތުގައި ވާ ސިއްރަކީ ގިނަ އުއްމީދުތަކަކާއި، އިންތިހާ ލޯތްބާއި ހިތްހަމަޖެހުން ކަމަށް އޭނާ ބުނެއެވެ. މިއަދު އޭނާއަކީ އެތައް ދަރިވަރުންނެއްގެ ހިތްތަކުން ޖާގަ ހޯދާފައިވާ ރަންޏެކެވެ.