ޕާކިސްތާނުގެ ކުރީގެ ބޮޑުވަޒީރު އިމްރާން ޚާން އަވަހާރަކޮށްލުމަށް ނިރުބަވެރި ހަމަލާއެއް ދޭން އުޅޭ ކަމަށް އެ ޤައުމުގެ ކައުންޓަރ ޓެރަރިޒަމް ޑިޕާޓްމެންޓާއި ހަވާލާދީ ބޭރުގެ މީޑިއާތަކުން ރިޕޯޓްކޮށްފިއެވެ.
އެ ރިޕޯޓްތައް ބުނާ ގޮތުގައި އިމްރާން ޚާނަށް ހަމަލާ ދިނުމަށް ޓެރަރިސްޓް ގްރޫޕަކުން ރާވަމުންދާ ކަމަށާއި އެ ހަމަލާ ދިނުމަށް ޚަރަދުކޮށްފައިވަނީ އަފްޣާނިސްތާނުގެ މީހަކަށް ކަމުގައި ރިޕޯޓްކޮށްފައިވެއެވެ.
މި މައްސަލަ އެ ޤައުމުގެ ކަމާ ބެހޭ ފަރާތްތަކާއި ހިއްސާ ކުރެވި، މައްސަލަ ބަލަމުންދާ ކަމަށް ވެސް މީޑިއާ ރިޕޯޓުތަކުގައި ބުނެއެވެ.
ޕާކިސްތާނުގެ ސީނިއަރ ޕޮލިސް އޮފިސަރަކާއި ހަވާލާދީ ބޭރުގެ މީޑިއާތަކުގައި ބުނެފައިވަނީ މިމައްސަލައިގެ ތަހުޤީޤު ކުރިއަށްދާއިރު، މި މައްސަލަ ސިއްރު ކުރުމަށް ކަމާ ބެހޭ ހުރިހާ ފަރާތްތަކަށް ވެސް އަންގާފައިވާކަމަށެވެ.
