ޑްރޯން އުފެއްދުމަށް ހިތްވަރު ދިނުމަށް އިންޑިއާ އިން 230 މިލިއަން ޑޮލަރު ގެ ޕްރޮގްރާމެއް ފަށަނީ

އަސްކަރީ އަދި މަދަނީ ޑްރޯން އުފެއްދުމަށް ހިތްވަރު ދިނުމަށް އިންޑިއާ އިން 234 މިލިއަން ޑޮލަރުގެ އިންސެންޓިވް ޕްރޮގްރާމެއް ފަށަން ޕްލޭން ކޮށްފައިވާ ކަމަށް ރޮއިޓާސް އިން ބުނެފިއެވެ.

ސިވިލް އަދި މިލިޓަރީ ޑްރޯން އުފައްދާ ފަރާތްތަކަށް އެހީތެރިވުމަށް އިންޑިއާ އިން މި ޕްރޮގްރާމް ފަށަން ރާވާފައިވާ ކަމަށް ތިން މަސްދަރަކުން މަޢުލޫމާތު ދީފައިވާ ކަމަށް ރޮއިޓާސް އިން ބުނެފައިވެއެވެ. މި ޕްރޮގްރާމުގެ މަޤްޞަދަކީ އިމްޕޯޓްކުރާ ޑްރޯން ގެ ބައިތަކަށް ބަރޯސާވާ މިންވަރު ކުޑަކުރުމާއި، ޗައިނާ އަދި ތުރުކީގެ އެހީތެރި ކަމާއެކު ޕާކިސްތާނުން ކުރިއަށްގެންދާ ޑްރޯން ޕްރޮގްރާމަށް ވާދަ ކުރުމެވެ.

އިންޑިއާ އިން އެގައުމުގައި އުފައްދާ ޑްރޯންތައް އިތުރު ކުރުމަށް މަސައްކަތް ކުރާ އިރު މޭ މަހު ޕާކިސްތާނާއެކު ހިނގި ހަތަރު ދުވަހުގެ ހަނގުރާމައިގައި ދެ ގައުމުން ވެސް ފުޅާ ދާއިރާއެއްގައި ޑްރޯން ބޭނުން ކޮށްފައި ވެއެވެ. މިއީ ނިއު ދިއްލީ އާއި އިސްލާމާބާދުން އެއްބަޔަކު އަނެއް ބަޔަކާ ދެކޮޅަށް ހަމަލާ ދިނުމުގައި ޑްރޯން ބޭނުންކުރި ފުރަތަމަ ފަހަރެވެ.

މިއާ އެކު ނިއުކްލިއަރ ހަތިޔާރު ގެންގުޅޭ ދެ އަވައްޓެރިންގެ މެދުގައި ވާދަވެރި ޑްރޯން ރޭހެއް މިހާރު މިވަނީ ފެށިފައި ކަމަށް ރިޕޯޓުތައް ބުނެއެވެ.

ރޮއިޓާސް އިން ބުނާގޮތުގައި ނިއު ދިއްލީން 20 ބިލިއަން އިންޑިއަން ރުޕީސް (234 މިލިއަން ޑޮލަރު) ގެ ޑްރޯން ޕްރޮގްރާމެއް ތިން އަހަރުގެ މުއްދަތައް ތަޢާރަފު ކުރާނެއެވެ. މި ޕްރޮގްރާމުގެ ދަށުން ޑްރޯން އާއި އޭގެ ބައިތަކާއި، ސޮފްޓްވެއަރ، ކައުންޓަރ ޑްރޯން ސިސްޓަމްތައް އުފެއްދުމަށް އެހީތެރިވެ ދިނުން ހިމެނޭނެ ކަމަށް ނަން ހާމަކުރަން ބޭނުންނުވާ ސަރުކާރު ދެ މަސްދަރަކާއި އިންޑަސްޓްރީ މަސްދަރަކުން ރޮއިޓާސް އަށް މަޢުލޫމާތު ދީފައިވެއެވެ.

މި ޕްރޮގްރާމުގެ ތަފްޞީލުތައް ކުރިން ހާމަކޮށްފައެއް ނުވެއެވެ. އަދި 2021 ގައި ނިއު ދިއްލީން ތަޢާރަފުކުރި 1.2 ބިލިއަން ރުޕީސްގެ ޕްރޮޑަކްޝަން-ލިންކްޑް އިންސެންޓިވް ސްކީމަށްވުރެ މި ޕްރޮގްރާމަށް ކަނޑައަޅާފައިވާ ރައުސުލްމާލް މާ ބޮޑެވެ. ކުރީގެ ސްކީމަކީ ރައުސުމާލު ހޯދުމަށާއި ދިރާސާތަކުގައި އިންވެސްޓް ކުރުމަށް ދަތިވެފައިވާ ޑްރޯން ސްޓާޓްއަޕްތައް ކުރިއެރުވުމަށް ތަޢާރަފުކުރި ސްކީމެކެވެ.

އިންޑިއާ އިން މައިގަނޑު ގޮތެއްގައި މީގެ ކުރިން އަސްކަރީ ގްރޭޑްގެ ޑްރޯން އެތެރެ ކުރަނީ އެ ޤައުމުގެ ތިންވަނަ އަށް އެންމެ ބޮޑު ހަތިޔާރު ސަޕްލައިކުރާ ފަރާތް ކަމުގައިވާ އިސްރާއީލުންނެވެ. ނަމަވެސް ފަހަކަށް އައިސް އިންޑިއާގެ އަލަށް އުފެދެމުންދާ ޑްރޯން އިންޑަސްޓްރީން ވަނީ އަގުހެޔޮ އުފެއްދުންތައް ތަޢާރަފުކޮށް، މިލިޓަރީ އަށް ވެސް އެ އުފެއްދުންތައް ފޯރުކޮށްދޭން ފަށާފައެވެ. އެހެން ނަމަވެސް މޯޓަރު، ސެންސަރު އަދި އިމޭޖިންގ ސިސްޓަމްތައް ފަދަ ވަކި ބައިތަކަށް އަދިވެސް ޗައިނާއަށް ބަރޯސާވާން ޖެހެއެވެ.

އިންސެންޓިވްތައް މެދުވެރިކޮށް، އިންޑިއާއިން މަސައްކަތްކުރަނީ 2028 ވަނަ އަހަރުގެ ބަޖެޓު އަހަރު (އޭޕްރީލް-މާރޗް) ނިމޭއިރު މުހިންމު ޑްރޯން ބައިތަކުގެ މަދުވެގެން 40 އިންސައްތަ އެ ޤައުމުގައި އުފެއްދުމަށެވެ.

"(އިންޑިއާ-ޕާކިސްތާން) ހަނގުރާމައިގައި ދެ ފަރާތުން ވެސް ޑްރޯންތަކާއި، ލޮއިޓަރިންގ މިއުނިޝަންސް އަދި ކަމިކާޒޭ ޑްރޯންތައް ވަރަށް ގިނައިން ބިން ބޭނުންކުރިއެވެ،" އިންޑިއާގެ ޑިފެންސް ސެކްރެޓަރީ ރާޖޭޝް ކުމާރު ސިންގ ދާދި ފަހުން ވިދާޅުވިއެވެ. "އަޅުގަނޑުމެންނަށް ލިބުނު ފިލާވަޅަކީ އަޅުގަނޑުމެން އެތެރޭގައި އުފެއްދުމުގެ މަސައްކަތްތައް އިތުރަށް ފުޅާކުރަން ޖެހޭކަމެވެ. އެއީ ބޮޑު، ހަރުދަނާ މިލިޓަރީ ޑްރޯން އުފެއްދުމުގެ އިކޯސިސްޓަމެއް ބިނާ ކުރުމަށްޓަކައެވެ."

އިންޑިއާ އިން އާންމު ގޮތެއްގައި ޑްރޯން އިމްޕޯޓްކުރުން މަނާކޮށްފައިވީ ނަމަވެސް، އޭގެ ބައިތައް އިމްޕޯޓްކުރުން މަނާކޮށްފައެއް ނުވެއެވެ. އަދި ސަރުކާރުން ވަނީ ޤައުމުގެ އެތެރެއިން ބައިތައް ހޯދައިގެން ޑްރޯން އުފެއްދުންތެރިންނަށް އިތުރު އިންސެންޓިވްތަކެއް ދިނުމަށް ރާވާފައެވެ.

ސަރުކާރުން ހިންގާ ސްމޯލް އިންޑަސްޓްރީޒް ޑިވެލޮޕްމަންޓް ބޭންކް އޮފް އިންޑިއާ އިން ވެސް މި އިންސެންޓިވް ޕްރޮގްރާމަށް އެހީތެރިވެދޭނެއެވެ. އެގޮތުން ކުންފުނިތަކަށް ވަރކިންގ ކެޕިޓަލް، ރިސަރޗް އެންޑް ޑިވެލޮޕްމަންޓް ބޭނުންތަކަށް އަގުހެޔޮ ލޯނުތައް ފޯރުކޮށްދޭނެއެވެ.

މިހާރު އިންޑިއާގައި 600 އަށްވުރެ ގިނަ ޑްރޯން އުފެއްދުމާއި އެއާ ގުޅުންހުރި ކުންފުނިތައް ހުރި ކަމަށް އަންދާޒާކުރެވެއެވެ.