ހައްޖު އަދި އުމްރާގެ ދަތުރުވެރިންނަށް ޚާއްސަ 2 ހެލްތު ސްކްރީނިން ޕެކޭޖެއް ޓްރީޓޮޕް ހޮސްޕިޓަލުން ތައާރަފްކޮށްފިއެވެ.

އެއީ ޕްރިލިމިނަރީ މެޑިކަލް ޗެކްއަޕް އަދި ޕޯސްޓް-މެޑިކަލް ޗެކްއަޕްއެވެ. ޓްރީޓޮޕުން ބުނީ މި 2 ޗެކްއަޕް ވަކިވަކިން ފުރިހަމަ ކުރުމުގެ އިޚުތިޔާރުވެސް އޮންނާނެ ކަމަށެވެ.

މި ޕެކޭޖުތައް ތަޔާރަފުކޮށްފައިވަނީ ހައްޖު އަދި އުމްރާގެ ދަތުރު ފެށުމުގެ ކުރިން އަދި ނިމުމަށްފަހު ފުރިހަމަ ސިއްހަތެއްގައި ހުރިތޯ ބަލައި ޑޮކްޓަރުގެ އިރުޝާދު ފަސޭހަކަމާއެކު ލިބޭނެ ގޮތެއް ފަހިކުރުމަށެވެ.

ހައްޖުގެ އަޅުކަން އެންމެ ފުރިހަމައަށް އަދާކުރުމަށް ދުޅަހެޔޮ ސިއްހަތެއް ހުރިތޯ ބެލުމަކީ މުހިންމުކަމެކެވެ. އަދި ހައްޖުގެ އަޅުކަމަށްފަހު ހައްޖުވެރިން އެނބުރި އަންނައިރު ބަލިފެތުރުމަކީ އެކަށީގެންވާ ކަމެކެވެ. އެހެންކަމުން ހައްޖުގެ ދަތުރަށްފަހު ޓެސްޓުތައް ފުރިހަމަކޮށް ޑޮކްޓަރުގެ އިރުޝާދު ހޯދުން މުހިންމެވެ.

މި ދެ ސްކްރީނިންގެ ޕެކޭޖު ފަރުމާކޮށްފައިވަނީ އެޗް.ޕީ.އޭ، ސައުދީ އަރަބިއްޔާ ސަރުކާރު އަދި ޓްރީޓޮޕް ހޮސްޕިޓަލުގެ ފެމިލީ މެޑިސިން ކޮންސަލްޓަންޓް ކަނޑައަޅާފައިވާ މިންގަނޑުތަކަށް ބިނާކޮށެވެ.

ޓްރީޓޮޕް ހޮސްޕިޓަލަކީ ރާއްޖޭގެ ގިނަ ބައެއްގެ އިތުބާރު ހޯދައިފައިވާ، ޒަމާނީ ފެންވަރަށް ސިއްހީ ހިދުމަތް ފޯރުކޮށްދެމުން އަންނަ އެއް ހޮސްޕިޓަލެވެ. އެގޮތުން މިހާރުވެސް އެ ހޮސްޕިޓަލުން އަންނަނީ އެންމެ ފަހުގެ ވަސީލަތްތަކާއެކު އާ ހިދުމަތްތައް ތައާރަފުކުރަމުންނެވެ.