2023ގެ އިންތިޚާބަށް ރައީސް ސޯލިހަށް ތާއީދުކުރައްވާކަން މިނިސްޓަރ ޝައުނާވެސް ހާމަކުރައްވައިފި
20 ޖޫން 2022 | ހޯމަ 12:16ރައީސަށް ދެވަނަ ދައުރަކަށް ތާއީދުކުރެއްވުމަށް ނިންމެވީ، ހުރިހާ ކަމަކަށް ބެލުމަށްފަހު
މިނިސްޓަރ ޝައުނާ
2023ގެ އިންތިޚާބަށް ރައީސް ސޯލިހަށް ތާއީދުކުރައްވާކަން އެންވަޔަރަމަންޓް މިނިސްޓަރު އައިމިނަތު ޝައުނާވެސް ހާމަކުރައްވައިފިއެވެ.
ރާއްޖެއެމްވީއަށް މައުލޫމާތު ދެއްވަމުން މިނިސްޓަރ ޝައުނާ ވިދާޅުވީ، 2018 ވަނަ އަހަރުން ފެށިގެން ރައީސް ސޯލިހާއެކު ގާތުން މަސައްކަތްކުރެއްވިއްޖެ ކަމަށާއި، ވަރަށް ގިނަކަންތައްތަކެއް ފެނިގެން ހިނގައްޖެކަމަށެވެ.
ރައީސް ސޯލިހަށް ދެވަނަ ދައުރަކަށް ތާއީދު ކުރެއްވުމަށް ނިންމެވީ ހުރިހާ ކަމަކަށް ބެލުމަށްފަހު، ރާއްޖެއަށް ބޭނުންވާ ހަމަޖެހުމާއި އިިސްލާހީ މަސައްކަތްތައް ގެނެވޭނީ އެމަނިކުފާނަށް ކަމަށްވާތީ ކަމުގައި ޝައުނާ ވިދާޅުވިއެވެ. އަދި ސިޔާސަތުތައް ތަންފީޒުކުރުމަށް އެންމެ ރަނގަޅުވާނީ ރައީސް ސޯލިހުގެ ލީޑަރޝިޕާއެކު ކުރިއަށް ދިޔުމުން ކަމަށްވެސް ޝައުނާ ވިދާޅުވިއެވެ.
ރައީސަ ސޯލިހަށް ތާއީދުކުރައްވާކަން ޝައުނާ ހާމަކުރައްވާާފައިވާއިރު، ސަރުކާރުގެ ގިނަ ވަޒީރުންތަކެއް ދަނީ 2023ގެ އިންތިޚާބަށް އެމަނިކުފާނަށް ތާއީދުކުރައްވާކަން ހާމަކުރައްވަމުންނެވެ. އެގޮތުން ޑިފެންސް މިނިސްޓަރު އަލްއުސްތާޒާ މާރިޔާ އަހުމަދު ދީދީއާއި، އެޑިއުކޭޝަން މިނިސްޓަރު ޑރ. އާއިޝަތު އަލީއާއި، މިނިސްޓަރ އޮފް ނެޝަނަލް ޕްލޭނިންގ ހައުސިންގ އެންޑް އިންފްރާސްޓްރަކްޗަރ މުހައްމަދު އަސްލަމް ވެސް ވަނީ އެމަނިކުފާނަށް ތާއީދުކުރައްވާކަން ހާމަކުރައްވާފައެވެ.
މީގެއިތުރުން ޑީއާރްޕީންވެސް ވަނީ ރައީސް ސޯލިހު އެންޑޯސް ކުރައްވާފައެވެ. އެގޮތުން ޑީއާރްޕީގެ ލީޑަރ، ކާށިދޫ ދާއިރާގެ މެމްބަރު އަބްދުﷲ ޖާބިރު ވިދާޅުވީ، ޑީއާރްޕީން ރައީސް ސޯލިހާއެކު ކޯލިޝަނެއް ހަދަން ހުށަހަޅާފައިވާކަމަށާއި 15 ޕަސަންޓަށް އެދިފައިވާނެކަމަށެވެ.
ރައީސްގެ ކޯލިޝަންގައި ތިބި ބަޔަކާއެކު އުޅުއްވާ މަންޒަރު ފެނިވަޑައިގަންނަވާކަމަށް ޖާބިރު ވިދާޅުވިއެވެ. މި ދަނޑިވަޅުގައި ގައުމުގެ ހަމަޖެހުން ވަރަށް މުހިންމުކަން ފާހަގަކުރައްވައި ޖާބިރު ވިދާޅުވީ، ގައުމުގެ ހަމަޖެހުމަށްޓަކައި ރައީސް ސޯލިހު ދެވަނަ ދައުރަކަށް ހޮވަންޖެހޭކަމަށެވެ.
މޮޅުވާ ޓީމުގައި ހުންނަން ބޭނުންފުޅުވާކަމަށާއި، މޮޅުވާނީ ރައީސް ސޯލިހުކަމަށްވެސް ޖާބިރު ވިދާޅުވިއެވެ. މީގެއިތުރުން މިފަހަރު ރައީސްގެ ކެމްޕެއިންގައި އަމަލީކޮށްވެސް ބައިވެރިވެވަޑައިގަންނަވާ ކަމަށް ވިދާޅުވިއެވެ.
