މަސްވެރިކަމުގެ ދާއިރާގެ މައްސަލަތައް ޙައްލު ކުރުމާބެހޭ ޕްރޮޖެކްޓް އިފްތިތާޙުކޮށްފި

މަސްވެރިކަމުގެ ދާއިރާއަށް އަމާޒުކޮށް ނޫ ޢިޤްތިސާދުގެ ސިޔާސަތުތައް ފުޅާކުރުމުގެ މަޤްޞަދުގައި ޖަޕާނު ސަރުކާރުގެ އެހީގައި ކުރިއަށް ގެންދިއުމަށް ހަމަޖެހިފައިވާ އައު ޕްރޮޖެކްޓް އިފްތިތާޙުކޮށްފިއެވެ.

މި ޕްރޮޖެކްޓު އިފްތިތާޙު ކުރުމުގެ ރަސްމިއްޔާތާއި މި މަޝްރޫއުގެ ފުރަތަމަ ޖޮއިންޓް ކޯޑިނޭޝަން ކޮމިޓީ ބައްދަލުވުން ބާއްވާފައިވަނީ ހޯމަ ދުވަހުއެވެ.

މި ޕްރޮޖެކްޓަކީ ޖަޕާނު ސަރުކާރުގެ ހިލޭ އެހީގެ ދަށުން ޖަޕާން އިންޓަނޭޝަނަލް ކޯޕަރޭޝަން އެޖެންސީ (ޖައިކާ) ގެ ފަންނީ އެހީތެރިކަމާއެކު ތަންފީޒުކުރާ ޕްރޮޖެކްޓެކެވެ. 

މި މަޝްރޫޢު އިފްތިތާހު ކުރުމުގެ ގޮތުން ބޭއްވުނު ޖަލްސާގައި މިނިސްޓަރ އޮފް ފިޝަރީޒް މެރިން ރިސޯސަސް އެންޑް އެގްރިކަލްޗަރ، ޑރ. ޙުސައިން ރަޝީދު ޙަސަން އަދި ޖަޕާނުން ދިވެހިރާއްޖެއަށް ކަނޑައަޅާފައިވާ ސަފީރު، ޓަކެއުޝީ މިޑޯރީ ބައިވެވަޑައިގެންނެވިއެވެ.

މިޖަލްސާގައި މިނިސްޓަރ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރ، ޑރ ޙުސައިން ރަޝީދު ޙަސަންގެ ވާހަކަފުޅުގައި ދިވެހިރާއްޖެ އާއި ޖަޕާނުގެ މެދުގައި އޮންނަ ޒަމާނީ ގުޅުންވަނީ ފާހަގަ ކުރައްވާފައެވެ. މިގޮތުން ރާއްޖެއަށް 2004ވަނަ އަހަރު އެރި ސުނާމީގައި ޖަޕާނު ސަރުކާރުން ދިވެހިރާއްޖެއަށް ވެދެއްވާފައިވާ އެހީ ފާހަގަކުރައްވާ، އެ ދަތިކަމުގެ ތެރޭގައި މަސްވެރިންނަށް ޙާއްސަކޮށް ޖަޕާން ސަރުކާރުން ވެދެއްވާފައިވާ އެހީއަށްޓަކައި ވަނީ ޝުކުރު އަދާކުރައްވާފައެވެ.

މީގެ އިތުރުން ދިވެހިރާއްޖޭގެ މަސްވެރިކަމުގެ ދާއިރާ މިއަދު މިއޮތް ހިސާބަށް ކުރިއެރުވުމުގައި ޖަޕާނު ސަރުކާރުން ކޮށްދެއްވާފައިވާ އަދި މިހާރުވެސް ކުރައްވަމުންދާ ގިނަގުނަ މަސައްކަތްތައް ފާހަގަކުރައްވާ، މިނިސްޓަރުވަނީ އެ އެހީތެރިކަމަށް ވެސް ޝުކުރު އަދާކުރައްވާފައެވެ.

ފިޝަރީޒް މިނިސްޓްރީން މައުލޫމާތު ދޭ ގޮތުގައި ނޫ ޢިޤްތިޞާދު ފުޅާކުރުމުގެ ސިޔާސަތުގައި ތަންފީޒުކުރާ މިޕްރޮޖެކްޓަކީ، ޖަޕާނު ސަރުކާރުގެ އެހީގައި 2014ން 2017ށް ކުރިއަށް ގެންދިޔަ ސަސްޓެއިނަބްލް ފިޝަރީޒް ޑިވެލޮޕްމަންޓް ޕްލޭން އިން މަސްވެރިކަމުގެ ދާއިރާގައި ހައްލު ހޯދުމަށް ފާހަގަކުރެވުނު ބައެއް ކަންކަން ތަންފީޒުކުރުމާއި ގުޅޭގޮތުން އެކުލަވާލާފައިވާ ޕްރޮޖެކްޓެކެވެ.

މި ޕްރޮޖެކްޓްގެ ތެރެއިން މައިގަނޑު ތިން ދާއިރާއަކުން މަސައްކަތް ކުރުމަށްވަނީ ހަމަޖެހިފައެވެ. މިގޮތުން، ދެމެހެއްޓެނިވި ގޮތެއްގައި ރާއްޖޭގައި ކުރެވޭ މަސްވެރިކަމުގެ ވިޔަފާރީގެ ވާދަވެރިކަން އިތުރުކުރުމާއި، ރާއްޖޭގައި ކުރެވޭ އެންވެރިކަމުގައި އެން ވަތުގައި އެން މަރުވާ ނިސްބަތް މަދުކުރުމާއި، މަސް ކައްކާ ހިއްކުމުގައި ޙަރަކާތްތެރިވާ ފަރާތްތަކަށް މިހާރު ކުރިމަތިވެފައިވާ ގޮންޖެހުންތަކަށް ހައްލު ހޯދުން ހިމެނެއެވެ.

މިނިސްޓްރީން މައުލޫމާތު ދޭ ގޮތުގައި ކަނޑުމަހުގެ މަސްވެރިކަމުގައި ބާނާ މަހުގެ ކޮލިޓީ ރަނގަޅުކުރުމުގެ ގޮތުން ދޯނީގައި ކުރަންޖެހޭ މަސައްކަތްތަކާއި ގުޅޭގޮތުން ފަޅުވެރިން ތަމްރީނު ކުރުމާއި، އެންވެރިކަމުގައި އެން ގެންގުޅެންޖެހޭ ގޮތާއި ބެހޭ ގޮތުން މަސްވެރިންނަށް ތަމްރީނު ދިނުމާއި، ކޮވިޑް-19 އާ ގުޅިގެން ދިވެހިރާއްޖޭގެ އިޤްތިޞާދަށް އަދި ވަކިން ޚާޢްސަކޮށް މަސް ކައްކާ ހިއްކުމުގައި ޙަރަކާތްތެރިވާ ފަރާތްތަކަށް ކުރިމަތިވި ގޮންޖެހުންތަކަށް ހައްލު ހޯދުމަކީ ޕްރޮޖެކްޓްގެ ދަށުން ހިންގޭ މުޙިއްމު ޙާރަކާތްތަކެވެ.

މި މަޝްރޫއު އިފްތިތާހު ކުރުމުގެ ޖަލްސާއަށްފަހު މި މަޝްރޫއުގެ ފުރަތަމަ ޖޮއިންޓް ކޯޑިނޭޝަން ކޮމިޓީ ބައްދަލުވުންވެސް ވަނީ ބާއްވާފައެވެ.