ފްލޯޓިންގ ބްރެކްފާސްޓުގެ ދިފާއުގައި ދިވެހިން!

ރާއްޖެއަށް އަންނަ ފަތުރުވެރިންނަށް ރާއްޖޭގެ އެކި ކަންކަން ކަމުދެއެވެ. ރީތި ގޮނޑުދޮށާއި މޫދާއި ރިސޯޓުގެ ވިލާތައް މީގެ ތެރޭގައި ހިމެނެއެވެ. ފަހަކަށް އައިސް އެންމެ ބޮޑަށް މަޝްހޫރުވެފައިވާ އެކައްޗަކީ ރާއްޖޭގެ "ފްލޯޓިންގ ބްރެކްފާސްޓް"އެވެ. ރާއްޖޭގެ ރިސޯޓުތަކަށް އަންނަ ގިނަ ފަތުރުވެރިންގެ ސޯޝަލް މީޑިއާ ޕްލެޓްފޯމުތަކުގައި، ޕޫލުގައި ފްލޯޓިންގ ބްރެކްފާސްޓަކާއެކު ނަގާފައިވާ ފޮޓޯއެއް އޮތުން މަޖުބޫރު ފަދައެވެ. މިއީ މިހާރު ދިވެހިންގެ ފަތުރުވެރިކަމާ ގުޅިފައިވާ އެއްޗަކަށްވާއިރު، ފްލޯޓިންގ ބްރެކްފާސްޓަށް ފާޑުކިޔުމުން ދިވެހިން ހަނު ނުތިބޭނެކަން ހާމަވެއްޖެއެވެ.

އިންޑިއާގެ މަޝްހޫރު ކޮމީޑިއަން އަދި އެކްޓަރެއް ކަމަށްވާ ވީރު ދާސް އޭނާގެ ޓްވިޓަރގައި "ބްރެކްފާސްޓް އިން ދަ މޯލްޑިވްސް" ޖަހައި ހިއްސާކުރި ޕޯސްޓް ދިވެހިންނަށް ބަލައެއްނުގަނެވުނެވެ. އެއީ އެ ޕޯސްޓުގައި އޭނާ ރާއްޖެއަށް އަމާޒުކޮށް ފްލޯޓިންގ ބްރެކްފާސްޓަށް ވަރަށް ބޮޑަށް ފާޑުކިޔާފައިވާތީއެވެ.

ވީރު ދާސްގެ ޕޯސްޓުގައި ވަނީ، ރާއްޖޭގެ ރިސޯޓުތަކުގެ ޕޫލުގައި ފްލޯޓިންގ ބްރެކްފާސްޓް ދޭއިރު އެއާއެކު ޓޯސްޓް ފޮނުވަނީ ކީއްވެތޯ ސުވާލުކޮށް، އޭގެ ސަބަބުން ޓޯސްޓުގެ ކުނޑި ޕޫލަށް އެޅި ލޮލަށް އެޅޭ ކަމަށް ބުނެފައެވެ. އަދި ޖޭމް ޕޫލަށް އެޅުމުން އެ ހީވަނީ ޕޫލުގައި އެއްޗެއް މަރުވެފައި އޮންނަހެން ކަމަށާއި، ފްލޯޓިންގ ބްރެކްފާސްޓުގެ ޚިޔާލަކީ ވަރަށް ގޯސް ޚިޔާލެއްކަމަށްވެސް އޭނާ ބުނެފައިވެއެވެ.

އޭނާ ވަނީ ސޯޝަލް މީޑިއާގައި މީހުންގެ މަގުބޫލުކަން ހޯދަން މިފަދަ "މޮޔަ" ޚިޔާލުތައް އެއްނުކުރުމަށް ރާއްޖެއަށް ގޮވާލާފައެވެ. އަދި ޕޫލުގައި ކާނަމަ ޑައިވްކުރާ ތަންތަނުގައި ބޮޑުކަމުދާނެ ކަމަށްވެސް އޭނާ ވަނީ ބުނެފައެވެ.

މީގެ އިތުރުން ފްލޯޓިންގ ބްރެކްފާސްޓް ބޭނުންވާ މީހުން، ރެސްޓޯރެންރެންޓެއްގައި ކާން ތިބޭއިރު، ކްލޮރިން ފެން އަޅާނެކަމަށް އުއްމީދުކުރާކަމަށާއި ކާށި ކިރަކީ ސީގަލްގެ ބޮޑުކަމުދާ ތަކެތީގެގޮތުގައި އޭނާ ވަނީ ސިފަކޮށްފައެެވެ.

ވީރު ދާސްގެ މި ވާހަކަތަކަށް އިންޑިއާގެ ބައެއް މީހުން ތާއީދުކޮށްފައިވާއިރު، ދިވެހިން ވަނީ އޭނާއަށް ވަރުގަދަ ރައްދުތަކެއް ދީފައެވެ. އެގޮތުން، އޭނާގެ ޓްވީޓަށް ޖަވާބުދީ ގިނަ ދިވެހިން ވަނީ، އިންޑިއާގައި ގެރީގެ ބޮޑުކަމުދާ ތަކެއްޗާއި ކުޑަކަމުދާތަކެތި އެއީ ތާހިރު އެއްޗަކަށްވެފައި، ފްލޯޓިންގ ބްރެކްފާސްޓް އޭނާއަށް "މޮޔަ" ޚިޔާލަކަށްވި ސަބަބާމެދު ސުވާލުކޮށްފައެވެ. އަދި އޭނާ އެ ޕޯސްޓް ހިއްސާކުރީ މަޖާ ކަމެއް ކަމަށް ދެކިގެން ކަމަށް ވިއަސް، އެ ޕޯސްޓް އެއްވެސް މަޖަލެއް ނޫންކަމަށް ގިނަ ބަޔަކު ވަނީ ބުނެފައެވެ.

އެ ޕޯސްޓަށް ރިސޯޓް ދާއިރާގައި މަސައްކަތްކުރާ ބައެއް މީހުންވެސް ވަނީ ޖަވާބު ދީފައެވެ. އެގޮތުން، ފްލޯޓިންގ ބްރެކްފާސްޓަކީ ކޮމްޕްލިމެންޓްރީ އެއްޗެއް ނޫންކަމަށާއި، އެއީ އެމީހަކު ބޭނުންވެގެން އޯޑަރުކުރާ އެއްޗެއް ކަމަށް ވަނީ ބުނެފައެވެ. އަދި ފަތުރުވެރިކަމަކީ ސަރވިސް އިންޑަސްޓްރީއެއް ކަމަށާއި ކަސްޓަމަރު އޯޑަރުކުރާ ކޮންމެ އެއްޗެއް ހޯދައިދޭނެކަމަށްވެސް ވަނީ ބުނެފައެވެ.

ކާށި ކިރުގެ ބަދަލުގައި ބޮވެނީ ސީގަލްގެ ބޮޑުކަމުދާތަކެތިކަމަށް ބުނެ އޭނާ ދެއްކި ވާހަކަތަކަށް ވެސް ގިނަ ބަޔަކު ވަނީ ރައްދު ދީފައެވެ. ސީގަލްއަކީ ރާއްޖޭގައި އޫޅޭ ދޫންޏެއް ނޫންކަމަށާއި، އޭނާއަށް އެހެން ގައުމަކާ ރާއްޖެއާ އޮޅުނީތޯވެސް ގިނަ ބަޔަކު ވަނީ ސުވާލު އުފައްދާފައެވެ. އަދި ރާއްޖެއާ ބެހޭ ގޮތުން ހަގީގަތާ ޚިލާފު ވާހަކަތައް ދައްކާއިރު، ރާއްޖެއާގުޅޭ ސައްހަ މައުލޫމާތު ހޯދުމަށް ގިނަ ބަޔަކު ވަނީ އޭނާއަށް އިރުޝާދުދީފައެވެ.

ދިވެހިންގެ ތެރެއިން ގިނަ ބަޔަކު ފްލޯޓިންގ ބްރެކްފާސްޓުގެ ދިފާއުގައި ތިބި ނަމަވެސް ބައެއް ދިވެހިން ވީރުދާސްގެ ޕޯސްޓަށް ތާއީދުކުރެއެވެ. އެ ފަރާތްތަކުން ބުނާ ގޮތުގައި އޭނާ ދައްކާފައި ހުރި ވާހަކަތަކަކީ ރަނގަޅު ވާހަކަތަކެކެވެ.

ވީރު ދާސް ރާއްޖޭގެ ފްލޯޓިންގ ބްރެކްފާސްޓަށް ފާޑުކީނަމަވެސް ރާއްޖެއަށް އަންނަ ހުރިހާ ބޮލީވުޑް ތަރިންގެ އިންސްޓަގްރާމުން ފްލޯޓިންގ ބްރެކްފާސްޓުގެ ފޮޓޯ ފެނެއެވެ. ބައެއް މީހުންނަށް ރާއްޖެއަށް އައިސް ފްލޯޓިންގ ބްރެކްފާސްޓެއް ނުނަގާނަމަ ދަތުރު ފުރިހަމަވެސްނުވެއެވެ. އަދި ރާއްޖެއަށް އަންނަ އެއް ސަބަބަކީވެސް ފްލޯޓިންގ ބްރެކްފާސްޓް ކަމަށް ގިނަ ތަރިންތަކެއް ވަނީ ބުނެފައެވެ.

ފްލޯޓިންގ ބްރެކްފާސްޓަކީ ހެނދުނުގެ ނާސްތާ ޕޫލުގައި ކުރުމެވެ. މިއީ ރާއްޖޭގައި އެކަނި ދޭ ޚިދުމަތެއްނޫނެވެ. ދުނިޔޭގެ މަގުބޫލު ފަތުރުވެެރި މަންޒިލްތަކުގައި މި ޚިދުމަތްދެއެވެ.