މޯލްޑިވްސް ކަރެކްޝަނަލް ސަރވިސްގެ ބެލުމުގެ ދަށުގައި ތިބި މީހުންގެ ތެރެއިން މެއި މަހު އެންމެ ގިނައިން ހުކުމްކޮށްފައިވަނީ ޑްރަގްގެ މައްސަލަތަކަށް ކަމަށް އެއިދާރާއިން ބުނެފިއެވެ.

ކަރެކްޝަންސުން އާންމުކުރި ތަފާސްހިސާބުތައް ދައްކާގޮތުން ޑްރަގާއި ގުޅޭ 51.4 އިންސައްތަ މައްސަލައަށް ހުކުމްކޮށްފައިވާއިރު ދެން އެންމެ ގިނައީ ވައްކަމާއި މުދާ ނުހައްޤުން ހޯދުމުގެ މައްސަލަތަކެވެ. އެއީ ދެ މައްސަލަގައި ވެސް 11.4 އިންސައްތައެވެ.

ކޯޓުގެ ހުރުމަތް ކަނޑާލައިގެން 5.7 އިންސައްތަ މައްސަލަގައި ހުކުމްކޮށްފައިވާއިރު ގެއްލުންދީގެން 5.7 އިންސައްތަ މައްސަލަތަކުގައި ވަނީ ހުކުމްކޮށްފައެވެ. އަދި އެހެނިހެން 5.7 އިންސައްތަ މައްސަލަތަކުގައި ހުކުމްކޮށްފައިވާ ކަމަށް ވެސް ކަރެކްޝަންސުން ބުނެއެވެ.

މީގެއިތުރުން ޓެރެރިޒަމާއި ބިރުދެއްކުމާއި ހުއްދަނެތި ތަނަކަށް ވަދެގެން 2.9 އިންސައްތަ މައްސަލަތަކުގައި ވަނީ ހުކުމްކޮށްފައެވެ. މެއި މަހު ޖަލަށް 59 މީހުން ގެންގޮސްފައިވާއިރު އޭގެ ތެރެއިން 35 މީހުންނަށް ހުކުމްކޮށްފައިވެއެވެ. އަދި 24 މީހެއްގެ ޝަރީއަތް ނުނިމިވާ ކަމަށް ވެސް ކަރެކްޝަންސް އިން ބުނެއެވެ.

ކަރެކްޝަންސުން ބުނީ 42 މީހެއް މެއި މަހު ޖަލުން ދޫކޮށްފައިވާއިރު 36 މީހުންނަށް ހުކުމްކޮށްފައިވާ ކަމަށެވެ. އަދި 6 މީހެއްގެ ޝަރީއަތް ނުނިމިވާ ކަމަށެވެ. ކަރެކްޝަންސުން ބުނީ ދޫކޮށްފައިވާ 42 މީހުންގެ ތެރޭއިން 26 މީހުން ދޫކޮށްފައިވަނީ ހުކުމުގެ މުއްދަތު ނިމުމުން ކަމަށާއި އެކަކު ދޫކޮށްފައިވަނީ ޕެރޯލްގެ ދަށުން ކަމަށެވެ. އަދި 9 މީހަކު ކްލެމެންސީގެ ދަށުން ދޫކޮށްފައިވާއިރު އަނެއް 6 މީހުން ދޫކޮށްފައިވާ ކޯޓުން އަންގައިގެން ކަމަށެވެ.

ޑްރަގްގެ މައްސަލަތައް މިހާ ގިނަވެފައިވާއިރު އަހަރެއްގެ މައްޗަށް 400 އާއި 500 ދެމެދުގެ އަދަދަކަށް މީހުން އަލަށް މަސްތުވާތަކެތި ބޭނުންކުރާ ކަމަށް ކޮމިޝަނަރ އޮފް ޕޮލިސް މުހައްމަދު ހަމީދު ވަނީ މިދިޔަ އަހަރު ވިދާޅުވެފައެވެ.

ސީޕީ ހަމީދު ވިދާޅުވީ ރާއްޖޭގައި ހިންގާ ކުށްތަކުގެ 75 އިންސައްތަ އާއި 85 އިންސައްތައާ ދެމެދުގެ ކުށްތައް ސީދާ ގޮތުންނާއި ނުސީދާ ގޮތުން ގުޅިފައިވަނީ މަސްތުވާތަކެތީގެ މައްސަލަތަކާ ކަމަށެވެ.

މިކަމުގެ ސީރިއަސް މިންވަރު ހާމަވާ ކަމަށާއި ހުރިހާ މުއައްސަސާތައް ގުޅިގެން މިކަން ހައްލު ކުރުމަށް މަސައްކަތް ކުރަންޖެހޭ ކަމަށް ވެސް ހަމީދު ވިދާޅުވިއެވެ.

ފުލުހުން މިހާތަނަށް ކުރި މަސައްކަތުން 43 ސަރަހައްދެއްގައި މަސްތުވާތަކެތި ވިޔަފާރިއެއްގެ ގޮތުގައި، ރާވައިގެން ޓްރެފިކް ކޮށްގެން ވިއްކުމަށް މީހުން ހަރަކާތްތެރިވާ ކަމަށާއި، އެކި އުމުރުފުރައިގެ މީހުން ބޭނުންކޮށްގެން މަސްތުވާތަކެތީގެ ވަބާގައި ޖެއްސުމަށް މަސައްކަތް ކުރާ ކަމަށް ހަމީދު ވިދާޅުވިއެވެ.

ހަމީދު އިތުރަށް ވިދާޅުވީ އަތުލައިގަނެވޭ މަސްތުވާތަކެތި ޤާނޫނުގެ ތެރެއިން އެ އޮންނަ މުއްދަތުގެ ތެރޭގައި ނައްތާލުމަށް ފުލުހުން ޚާއްސަ އިސްކަމެއް ދޭ ކަމަށާއި 2020 ވަނަ އަހަރު 10 އަހަރުގެ ތެރޭގައި ހުރި މަސްތުވާތަކެތި 2018 ވަނަ އަހަރާ ހަމައަށް ހުރީ އެކި ސަބަބުތަކާއި ހުރެ ނައްތާނުލެވި ކަމަށެވެ. އެހެންނަމަވެސް މިއަދު އެ މަސައްކަތް ކުރެވިގެން ދިޔުމަކީ މަސްތުވާތަކެއްޗާ ދެކޮޅަށް ފުލުހުން ހިންގާ މަސައްކަތުގައި ލިބުނު އިތުރު ކުރިއެރުމެއް ކަމަށެވެ.

ރާއްޖެއަށް މަސްތުވާތަކެތި ޓްރެފިކް ކުރާ މީހުން ދެނެގަނެ އެމީހުން އަތުލައިގަތުމަށް ފުލުހުން ޚާއްސަ އިސްކަމެއް ދޭ ކަމަށާއި، އަންނަ އަހަރު ވެސް މިކަންތައްތައް ހައްލު ކުރުމަށް ގިނަ މަސައްކަތްތަކެއް ކުރެވިގެންދާނެ ކަމަށް ވިދާޅުވިއެވެ.