ކ. ގާފަރާއި ދިމާލުގައި އޮތް ސަފާރީއެއްގައި ރޯވެ، އަލިފާނުގެ ހާދިސާއެއް ހިނގައިފިއެވެ.

އެމްއެންޑީއެފްއިން ބުނީ "އަވި" ނަމަކަށް ކިޔާ ސަފާރީއެއްގައި ރޯވެ އަނދަމުންދާކަމުގެ މައުލޫމާތު އެ އިދާރާއަށް ލިބިފައިވަނީ ބުރާސްފަތި ދުވަހުގެ ރޭ 22:51 އެހާއިރު ކަމަށެވެ.

މި ސަފާރީ އޮތީ ކ.ގާފަރާއި ދިމާލުން 13 މޭލު ހުޅަނގުގައި ކަމަށް އެމްއެންޑީއެފުން ބުނެފައިވެއެވެ. ހާދިސާ ހިނގި ވަގުތު ސަފާރީގައި 3 ފަތުރުވެރިންނާއި، 6 ފަޅުވެރިން ތިބި ކަމަށް އެމްއެންޑީއެފުން ބުނެފައިވެއެވެ.

މި ހާދިސާގެ ރިޕޯޓު ލިބުމާއެކު އެމްއެންޑީއެފް ސްކޮޑްރަންގެ ފަޔަރު ލޯންޗު ވަނީ އެ ސަރަހައްދަށް ގޮސްފައެވެ. އެމްއެންޑީއެފުން ބުނީ ސަފާރީ އުޅަނދުގެ ކްރޫއިންނާއި ފަސެންޖަރުން ތިބީ ސަފާރީގެ ޑައިވިންގް ދޯނީގައި ހެޔޮހާލުގައި ކަމަށެވެ. އަދި ޑައިވިންގ ދޯނީގައިތިބި މީހުން ކޯސްޓްގާޑްގެ ސީއެމްބިއުލާސްގެ އެހީތެރިކަމާއެކު ގާފަރަށް ގެންގޮސްފައިވާކަމަށެވެ.

އެމްއެންޑީއެފުން ބުނީ ރޯވި ސަފާރީ ވަނީ އެއްކޮށް އަޑިޔަށް ގޮސްފައި ކަމަށެވެ.