23 ޓީމާއެކު ފަސްވަނަ މައިލޯ ހޭންޑްބޯލް މޯލްޑިވްސް ޗެމްޕިއަންޝިޕް ފަށައިފިއެވެ.

މުބާރާތުގެ އަންހެން ޑިވިޝަންގައި 15 ޓީމް އަދި ފިރިހެން ޑިވިޝަންގައި 8 ޓީމް ވަނީ ބައިވެރިވެފައެވެ. މުބާރާތުގައި ބައިވެރިވެފައިވާ ޓީމްތައް ގިނަވުމުން ފިރިހެން ޑިވިޝަން ވަނީ ދެ ބުރަކަށް, އަދި އަންހެން ޑިވިޝަން ތިން ބުރަކަށް ބަހާލާފައެވެ. ފިރިހެން ޑިވިޝަންގައި ބައިވެރިވި އަށް ޓީމްގެ ތެރެއިން ތިން ޓީމް ވަނީ ސީޑްކޮށް, އޮޓޯއިން ދެވަނަ ބުރުން ޖާގަ ދީފައެވެ. ގައުމީ މުބާރާތަށް ބަލައިގެން ސީޑްކުރި ތިން ޓީމަކީ ފުލިދޫ ޔޫތު ސްޕޯރޓްސް ކްލަބާއި, ޕޮލިސް ކްލަބާއި, ފިއުޗަރ ސްޕޯރޓްސް ކްލަބް އެކަޑަމީއެވެ. މިތިން ޓީމާއެކު ދެވަނަ ބުރުގައި ވާދަކުރާނީ ފުރަތަމަ ބުރުގައި ވާދަކުރާ ސީޑް ނުކުރާ ފަސް ޓީމްގެ ތެރެއިން އެއްވަނަ ޓީމެވެ. އެފަސް ޓީމްގެ މެދުގައި ކުޅޭނީ ލީގު ބުރެކެވެ. ފައިނަލަށްދާނީ ދެވަނަ ބުރުގެ އެއްވަނަ އަދި ދެވަނަ ޓީމެވެ.

އަންހެން ޑިވިޝަންގައި ގައުމީ މުބާރާތަށް ބަލާ ދެޓީމެއް ވަނީ ސީޑްކޮށް ތިންވަނަ ބުރުން ފުރުސަތު ދީފައެވެ. އެ ދެޓީމަކީ އޮރިކްސް ހޭންޑްބޯލް ކްލަބާއި, އައިލެންޑަރސް ހޯޕްސް ސްޕޯރޓްސް ކްލަބެވެ. ފުރަތަމަ ބުރުގައި ވާދަކުރާނީ ސީޑްނުކޮށް އޮތް 13 ޓީމެވެ. 13 ޓީމް ވަނީ ހަތަރު ގްރޫޕަށް ބަހާލާފައެވެ. ދެވަނަ ބުރަށްދާނީ ކޮންމެ ގްރޫޕަކުންވެސް އެއްވަނަ ޓީމެވެ. ދެވަނަ ބުރުގައި ވާދަކުރާނީ ގްރޫޕް އޭގެ އެއްވަނަ ޓީމާއި, ގްރޫޕް ސީގެ އެއްވަނަ ޓީމެވެ. އަދި ގްރޫޕް ބީގެ އެއްވަނަ ޓީމާއި, ގްރޫޕް ޑީގެ އެއްވަނަ ޓީމެވެ. އެދެމެޗުން މޮޅުވާ ޓީމެއް ތިންވަނަ ބުރުގައި ވާދަކުރާނީ ސީޑްކޮށްފައިވާ ދެޓީމާއެކުއެވެ. ފައިނަލަށްދާނީ ތިންވަނަ ބުރުގައި ހަތަރު ޓީމް ލީގުބުރެއް ކުޅޭ އެއްވަނަ އަދި ދެވަނަ ހޯދާ ޓީމެވެ.

މުބާރާތުގެ ފުރަތަމަ މެޗު ކާމިޔާބުކުރީ އައިލެންޑަރސް ހޯޕް ސްޕޯރޓްސް ކްލަބެވެ. ފިރިހެން ޑިވިޝަންގެ މިމެޗު އެޓީމް ކާމިޔާބުކުރީ ރެޑްހޯކްސް ސްޕޯރޓްސް ކްލަބާ ވާދަކޮށް 28-16ންނެވެ. މެޗުގެ މޮޅު ކުޅުންތެރިއަކީ އައިލެންޑަރސްގެ އަލީ ނާއިޒްއެވެ. މުބާރާތް މިމަހުގެ 15 ވަނަ ދުވަހުގެ ނިޔަލަށް ކުރިއަށްދާނެއެވެ.