އައިސިސްގެ އަމީރެއްކަމަށް ބުނާ ޝަރީފްގެ މައްޗަށް އުފުލާފައިވާ ހުރިހާ ދައުވާއަކަށް އޭނާ އިންކާރުކޮށްފި

އިމްޕްރޮވައިސްޑް އެކްސްޕްލޯސިވް ޑިވައިސް (އައި.އީ.ޑީ)އެއް ތައްޔާރުކޮށް، ތިމަރަފުށީގައި ޓެރަރިސްޓް ހަމަލާއެއް ދިނުމަށް ރޭވިކަމަށް ތުހުމަތު ކުރެވޭ މައްސަލައިގައި އެރަށު އަބްދުﷲ ޝަރީފްގެ މައްޗަށް އުުފުލާފައިވާ ދައުވާތަކުގެ އަޑުއެހުމެއް ކްރިމިނަލް ކޯޓުގައި ކުރިއަށް ގެންގޮސްފިއެވެ.

މި އަޑުއެހުމުގައި ގާޒީ އަލީ ނަދީމް ވަނީ ދައުވާ ލިބޭ ފަރާތަށް ލިބިގެންވާ ޙައްޤުތައް ބަޔާން ކޮށްދެއްވާފައެވެ.

ފުލުހުން މީގެ ކުރިން ހާމަކޮށްފައިވާ މައުލޫމާތުތަކަށް ބަލާއިރު، (އައިސިސް) ޖަމާޢަތުގެ ޚޮރާސަން ޕްރޮވިންސްގެ ފަރާތުން ދިވެހިންގެ ތެރެއިން އަމީރެއްގެ ގޮތުގައި ތ. ތިމަރަފުށި ފެހިވިދުވަރުގެ އަބްދުﷲ ޝަރީފް ޢައްޔަނުކޮށްފައިވާ ކަމުގެ މަޢުލޫމާތު ފުލުހުންގެ އިންޓެލިޖެންސްއަށް ވަނީ ލިބިފައިކަމަށް ބުނެފައިވެއެވެ.  

އޭނާގެ މައްޗަށް ދައުވާ އުފުލާފައިވަނީ އިމްޕްރޮވައިސްޑް އެކްސްޕްލޯސިވް ޑިވައިސް (އައި.އީ.ޑީ)އެއް ތައްޔާރުކޮށް، ޓެރަރިސްޓް ހަމަލާއެއް ދިނުމަށް ރޭވިކަމަށް ބުނާ މައްސަލައިގައެވެ.

އެކަމާ ގުޅޭގޮތުން ފުލުހުން ބުނެފައިވަނީ، ތ. ތިމަރަފުށީގައި ދީނުގެ ނަމުގައި ހަރުކަށި ފިކުރު ޤަބޫލުކުރާ ބަޔަކު އިސްވެތިބެ، ޓެރަރިސްޓް ޖަމާޢަތަކަށް ތާޢީދުކޮށް، ޓެރަރިޒަމަށް ހިތްވަރުދީ، ޓެރަރިސްޓް ޖަމާޢަތްތަކުގެ އަމަލުތަކަކީ ސަބަބުވެރި އަމަލުތަކެއްކަމަށް ދައްކައި، ޓެރަރިސްޓް ޖަމާޢަތެއްކަމަށްވާ އިސްލާމިކް ސްޓޭޓް ޖަމާޢަތުގެ އިރުޝާދުގެ ދަށުން ރާއްޖޭގައި ޓެރަރިޒަމްގެ އަމަލުތައް ހިންގުމަށް ރާވައި، އެކަމަށް ހިތްވަރުދީ، ތިމަރަފުށީގައި ހަރަކާތްތެރިވެފައިވާ މީހުންގެ ތެރޭގައި އަބްދުﷲ ޝަރީފްވެސް ހިމެނޭ ކަމަށެވެ.

އެއީ 2020 ވަނަ އަހަރުގެ ނޮވެމްބަރު މަހުގެ 11 ވަނަ ދުވަހު ތިމަރަފުއްޓާއި މާލޭގެ އިތުރުން ކަނޑުމަތީގައި ފުލުހުންގެ ފަރާތުން ހިންގި އޮޕަރޭޝަން ތަކެކެވެ.

އެ މައްސަލައިގައި އޭނާގެ މައްޗަށް 3 ދައުވާއެއް ދައުލަތުން ކުރެއެވެ. އެއް ދައުވާއަކީ ޓެރަރިޒަމްގެ އަމަލެއް ކުރުމަށް ރޭވުމުގެ ކުށުގެ ދައުވާއެވެ. އެ ދައުވާއަށް އަބްދުﷲ ޝަރީފް އިންކާރު ކުރެއެވެ. ވުމާއެކު، ދައުލަތުން ވަނީ ހެކި ހާމަކޮށްފައެވެ.

އޭނާގެ މައްޗަށް ކުރާ ދެވަނަ ދައުވާއަކީ ޓެރަރިސްޓް ޖަމާއަތަކަށް ތާއީދުކުރާފަދަ ލިއުމެއް ގެންގުޅުމުގެ ކުށުގެ ދައުވާއެވެ. އެ ދައުވާއަށްވެސް އޭނާ ވަނީ އިންކާރުކޮށްފައެވެ.

އަބްދުﷲ ޝަރީފްގެ މައްޗަށް ކުރާ 3 ވަނަ ދައުވާއަކީ ޓެރަރިސްޓް ޖަމާއަތުގެ މެމްބަރަކަށްވުމުގެ ކުށުގެ ދައުވާއެވެ.

އެ ދައުވާތަކަށް އަބްދުﷲ ޝަރީފް އިންކާރު ކުރެއެވެ. ވުމާއެކު، ދައުލަތުން ވަނީ ހެކި ހާމަކޮށްފައެވެ.

ގާޒީ ވަނީ މިއީ މަދަނީ މިންގަނޑުން ކުރިއަށް ގެންދެވޭނެ ދައުވާތަކެއްކަމަށް ކަނޑައަޅުއްވާފައެވެ. އަދި ޝަރީއަތުގެ ކުރީގެ ހުށައެޅުންތަކަށް ވަނީ ފުރުސަތު ދެއްވާފައެވެ. އެގޮތުން ޖުލައި މަހުގެ 18 ވަނަ ދުވަހުގެ ކުރިން ޝަރީއަތުގެ ކުރީގެ ހުށައެޅުންތައް ހުށައެޅުމަށް ވަނީ ފުރުސަތު ދެއްވާފައެވެ.