ގައްދޫ ސިއްޙީ މަރުކަޒުގައި ޚާއްސަ ބަލިތަކުގެ ޑޮކްޓަރުން ޚިދުމަތްދޭން ފަށައިފި
ޚާއްސަ ބަލިތަކުގެ 3 ޑޮކްޓަރަކު ގައްދޫ ސިއްޙީ މަރުކަޒުގައި ޚިދުމަތް ދޭނެ
ގައްދުއަށް ދިޔަ ޑޮކްޓަރުންނަށް ރަށުން މަރުހަބާ ކިޔަނީ
ގދ. ގައްދޫ ސިއްޙީ މަރުކަޒުގައި ޚާއްސަ ބަލިތަކުގެ ޑޮކްޓަރުން ގާއިމުވެ ތިބެ ޚިދުމަތް ދޭން ފަށައިފިއެވެ.
ގދ. ތިނަދޫގައި ހުންނަ ޑރ. އަބްދުއްސަމަދު މެމޯރިއަލް ހޮސްޕިޓަލުން އަންގާރަ ދުވަހު ނެރުނު ބަޔާނެއްގައި ބުނީ ގައްދޫ ސިއްޙީ މަރުކަޒުގައި މި ޚިދުމަތް ދޭން ފަށާނީ ބުދަ ދުވަހުން ފެށިގެން ކަމަށެވެ. އެގޮތުން، ޚާއްސަ ބަލިތަކުގެ ޑޮކްޓަރުން މިހާރު އެ ރަށަށް ގޮސްފައިވާ ކަމަށް ވެސް އެ ބަޔާނުގައި ވަނީ ބުނެފައެވެ.
ޑރ. އަބްދުއްސަމަދު މެމޮރިއަލް ހޮސްޕިޓަލުން ބުނި ގޮތުގައި މިއީ މާލެއިން ދެކުނުގެ އަތޮޅުގެ ސިއްޙީ މަރުކަޒެއްގައި ޚާއްސަ ބަލިތަކުގެ ޑޮކްޓަރުން ގާއިމުވެ ތިބެ ޚިދުމަތް ދޭ ފުރަތަމަ ފަހަރު ކަމަށެވެ. މި ތާރީޚީ ބަދަލާއެކު ގައްދޫގެ އިތުރުން އެ ސަރަހައްދުގެ ރަށްތަކުގައި ދިރިއުޅޭ ފަރާތްތަކަށް ސިއްޙީ ޚިދުމަތް ހޯދުމުގައި އިތުރު ފަސޭހަތަކެއް ވާނެ ކަމަށް ވެސް ވަނީ ބުނެފައެވެ. އެގޮތުން، އެއަތޮޅުގެ މައި ހޮސްޕިޓަލަށް ދާން ކުރަން ޖެހޭ ދަތުރުގެ ޚަރަދާއި ވަގުތު ސަލާމަތް ވާނެ ކަމަށް އެ ހޮސްޕިޓަލުން ވަނީ ފާހަގަކޮށްފައެވެ.
ގައްދޫ ސިއްޙީ މަރުކަޒަކީ ހެލްތު މިނިސްޓްރީން 4 ވަނަ ގިންތީގައި ހިމަނާފައިވާ ސިއްޙީ މަރުކަޒެކެވެ. އެ ހޮސްޕިޓަލުގައި 24 ގަޑިއިރު ޚިދުމަތްދޭއިރު 1 އާއްމު ގިނަ ބަލިތައް ތަހުލީލު ކުރަން ބޭނުންވާ ލެބޯޓްރީ ޓެސްޓުތައް ރަށުގައި ތިބެގެން ހެދުމުގެ ފުރުސަތު ފަހިވެފައިވާއިރު އިތުރު ޓެސްޓުތައް ސާމްޕަލް ފޮނުވައިގެން ތިނަދޫއިން ހެދޭގޮތް ވެސް ފަހިވެފައިވާ ކަމަށް ޑރ. އަބްދުއްސަމަދު މެމޯރިއަލް ހޮސްޕިޓަލުން ބުނެއެވެ.
ބުދަ ދުވަހުން ފެށިގެން ގައްދޫ ސިއްޙީ މަރުކަޒުގައި ޚާއްސަ އެހީގެ ބަލިތަކުގެ 3 ޑޮކްޓަރުން ޚިދުމަތް ދޭނެއެވެ. އެއީ އަންހެނުންގެ ބަލިތަކަށް ޚާއްސަ ޑޮކްޓަރާއި ކުޑަކުދިންގެ ބަލިތަކަށް ޚާއްސަ ޑޮކްޓަރު އަދި މެޑިކަލް އޮފިސަރެކެވެ.
ތިނަދޫ ހޮސްޕިޓަލުގެ ޑެޕިއުޓީ ސީސީއޯ އަބްދުލް އަޒީޒް ރިފާއު ވިދާޅުވީ، މިދިޔަ އަހަރު އެކި ސަބަބުތަކާ ހުރެ އެ ހޮސްޕިޓަލުގައި މަސައްކަތްކުރާނެ ޑޮކްޓަރުން ލިބުން ދަތިވެ، އެ އަތޮޅުގެ ބައެއް ރަށްރަށުގެ ސިއްހީ މަރުކަޒުތައް ހިންގަން ދަތިވުމުން، އެ ހޮސްޕިޓަލުގެ އާ ގަވަނިން ބޯޑުގެ އެންމެ ބޮޑު އަމާޒަކަށްވީ އެކި ޑިޕާޓްމަންޓްތަކަށް މަދުވާ ޑޮކްޓަރުން ހަމަކުރުން ކަމަށެވެ. ވަކި ބައިތަކަކަށް ބަހާލައިގެން ކުރަމުން އައި މި މަސައްކަތުގެ 90 އިންސައްތަ ހާސިލް ކުރެވިފައިވާއިރު ގައްދުށްއަށް ފޮނުވި ޑޮކްޓަރުންނަކީ ވެސް އެ މަސައްކަތުގެ ދަށުން ފޮނުވި ޑޮކްޓަރުން ކަމަށް އޭނާ ވިދާޅުވިއެވެ.
ރާއްޖޭގެ 5 ރަށެއްގެ ސިއްހީ މަރުކަޒު ހޮސްޕިޓަލް ފެންވަރަށް ތަރައްގީ ކުރަން ސަރުކާރުން ނިންމާފައިވާއިރު، އޭގެ ތެރޭގައި ގައްދޫ ސިއްހީ މަރުކަޒު ވެސް ހިމެނެއެވެ. އެ މަރުކަޒު، ހޮސްޕިޓަލަކަށް ބަދަލުކުރަން އަޅަން ޖެހޭ އިމާރާތް ޑިޒައިންކޮށް އަދި ބީއޯކިއު ހަދައިދޭނެ ބަޔަކު ހޯދަން ހެލްތު މިނިސްޓްރީން އިއުލާންކޮށްފައިވާ ކަމަށް ވެސް ޑރ. އަބްދުއްސަމަދު މެމޯރިއަލް ހޮސްޕިޓަލުން ބުނެއެވެ.
