2023 ތަފާތު، ފެނިގެން މިދަނީ ވެރިކަން ބަދަލުކުރަން ކޯލިޝަން ހެދުމުގެ ބަދަލުގައި ވެރިކަމުގައި ތިބި މީހުންނާއެކު ކޯލިޝަން ހެދިތަން
މި ފެންނަނީ ޑިމޮކްރަސީއަށް ފައްކާވަމުން އަންނަކަން، އެކަމަށްޓަކައި ސިޔާސީ ޕާޓީތަކަށް ޝުކުރުވެސް އަދާކުރަންޖެހޭ -ރައީސް-
ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު، ގައްދޫގައި ވާހަކަފުޅުދައްކަވަނީ
ރާއްޖޭގައި ބޭއްވުނު ރިޔާސީ އިންތިޚާބުތަކާ މިއަހަރު ބޭއްވޭ ރިޔާސީ އިންތިޚާބު ތަފާތުކަމަށާއި، އެ ތަފާތަކީ ވެރިކަން ބަދަލުކުރަން ކޯލިޝަން ހެދުމުގެ ބަދަލުގައި ވެރިކަމުގައި ތިބި މީހުންނާއެކު ކޯލިޝަން ހަދައި، ރިޔާސީ އިންތިޚާބާ ކުރިމަތިލަމުންދާކަން ކަމަށް، އެމްޑީޕީއާއި ގުޅިފައިވާ ސިޔާސީ ޕާޓީތަކުގެ ކޯލިޝަންގެ ކެންޑިޑޭޓް، ރައީސުލްޖުމްހޫރިއްޔާ އިބްރާހީމް މުހައްމަދު ސާލިހް ވިދާޅުވެއްޖެއެވެ.
"އުފާވެރި އަމާން ރާއްޖެ" ކެމްޕޭން ޖަލްސާގައި، ގދ. ގައްދޫގައި ވާހަކަފުޅުދައްކަވަމުން ރައީސް ސާލިހް ވިދާޅުވީ، 2008 ވަނަ އަހަރުން ފެށިގެން މިހާތަނަށް ބޭއްވުނު އިންތިޚާބުތަކުގައި ޕާޓީތަކުން އަމަލުކުރަމުން އައީ ވެރިޔަކަށް ހުންނަ މީހަކު ބަދަލުކުރުމަށް ކަމަށެވެ. 2008ގައި ވެސް އެކަން ހިނގައިދިޔައީ އެހެން ކަމަށާއި، 2013ގައި ވަކި މީހަކު ގެނަޔަނުދޭން މަސައްކަތްކުރި ކަމަށެވެ. އަދި 2018ގައި ވެސް އެމްޑީޕީން ނުކުތީ އެ ވިސްނުމުގައި ކަމަށެވެ. އެކަމަކު 2023ގައި ތަފާތު ފެނިވަޑައިގަންނަވާ ކަމަށް ރައީސް ވިދާޅުވިއެވެ.
ރައީސް ވިދާޅުވީ 2008ގައި ވެރިކަމަށް އަންނަން އެމްޑީޕީން ވައުދުތަކެއް ވީކަމަށެވެ. އަދި 2013ގައި ވެސް، 2018ގައި ވެސް ވައުދުތަކާއި މެނިފެސްޓޯއަކާއެކު އައިކަމަށެވެ. މިއަހަރުވެސް މެނިފެސްޓޯއަކާއެކު އައިސް ތިބިކަމަށެވެ.
ރައީސް ވިދާޅުވީ 2018 ވަނަ އަހަރު ޖަޒީރާ ރާއްޖޭގެ މެނިފެސްޓޯއާއެކު ނުކުމެވަޑައިގަތުމުން، ވާދަވެރި ބޭފުޅުންގެ މެނިފެސްޓޯއަކަށްވީ "ނުވާނޭ" ކަމަށެވެ. "ނުވާނޭ"އަކީ ވާދަވެރިންގެ މެނިފެސްޓޯގައި އޮތް ހަމައެކަނި ވާހަކަކަމަށް ރައީސް ވިދާޅުވިއެވެ.
ރައީސް ވިދާޅުވީ ހިލޭ ޑިގްރީ ތައާރަފް ކުރައްވާނަމޭ ވިދާޅުވުމުން، ވާދަވެރިން ބުނީ ނުވާނޭ ކަމަށެވެ. ނަމަވެސް މިއަދު 18،000 ދަރިވަރުންނަށް އެ ފުރުސަތު ދެވިއްޖެކަމަށާއި، 7000 ދަރިވަރުން ޑިގްރީ ހާސިލްކޮށްގެން ނުކުމެއްޖެ ކަމަށެވެ. ހަމައެކަނި ގައްދޫއަށް ބަލާއިރު 146 ދަރިވަރުން ހިލޭ ޑިގްރީ ޕްރޮގްރާމުގައި ބައިވެރިވެ ކުރިއަށްދިޔަ ކަމަށާއި، އޭގެ ތެރެއިން 76 ދަރިވަރަކު ކިޔަވައި ނިމިއްޖެކަމަށެވެ. މުޅި އަތޮޅަށް ބަލާއިރު 1252 ފުރުސަތުގެ ބޭނުން ދަރިވަރުން ހިފަމުންދާއިރު، އޭގެ ތެރެއިން 600 އެއްހާ ދަރިވަރުން ޕްރޮގްރާމް ނިންމާ މަސައްކަތުގެ ތެރެއަށް ނުކުމެއްޖެކަމަށް ރައީސް ވިދާޅުވިއެވެ.
ރައީސް ވިދާޅުވީ ކުރިއަށް އޮތް ރިޔާސީ އިންތިޚާބުގައި ރައްޔިތުން ގޮތެއް ނިންމާއިރު، 2 ސަރުކާރުގައި ހުރި ތަފާތުތައް ދެނެގަންނަންޖެހޭ ކަމަށެވެ. ރައީސް ވަނީ ސެޕްޓެމްބަރު 9 ވަނަ ދުވަހު އޮންނަ ރިޔާސީ އިންތިޚާބުގައި ރައްޔިތުން ވިސްނާ ވަޑައިގެން ވޯޓުދެއްވުމަށް އެދިވަޑައިގަންނަވާފައެވެ.
