އެހެން ރައީސްއަކު ނުވިސްނަވާ ވަރަށް ކުދި އާބާދީތަކާމެދު ވިސްނެވި ހަމައެކަނި ބޭފުޅަކީ ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ކަމަށް އެމްޑީއޭގެ ނައިބު ރައީސް ޑރ. އާއިޝަތު ރަފިއްޔާ ވިދާޅުވެއްޖެއެވެ.
ގދ. ގައްދޫގައި އަންގާރަ ދުވަހުގެ ރޭ ބޭއްވި "އުފާވެރި އަމާން ރާއްޖެ" ޖަލްސާގައި ވާހަކަފުޅު ދައްކަވަމުން ރަފިއްޔާ ވިދާޅުވީ ރައީސް ކޮށްދެއްވާ ކަންތައްތައް ހުވަދޫ އަތޮޅުގެ ރައްޔިތުން ބަލައިގެންފި ކަމަށެވެ. އަދި އެކަން ފެނިގެން ހިނގައްޖެ ކަމަށާއި އެއްބުރުން ރައީސް އިންތިޚާބު ކުރައްވާނެ ކަމަށެވެ.
ކެމްޕޭންގެ ތެރެއިން ރައީސްގެ ހިތްވަރާ ޖޯޝު ފެނިވަޑައިގަންނަވާ ކަމަށް ވިދާޅުވެ ރަފިއްޔާ ވަނީ ރައީސަށް ތައުރީފު ކުރައްވާފައެވެ. އަދި ރައީސްގެ ހިތްވަރާ ހިކުމަތަށް ބަދަލު ނާންނަކަމަށް ވިދާޅުވިއެވެ.
ފުރަތަމަ ފަހަރަށް ކޯލިޝަނަކާއެކު، ދައުރެއް ފުރިހަމަ ކުރެއްވުމަށްފަހު ރިޔާސީ އިންތިޚާބަކަށް ނިކުމެވަޑައިގެންނެވި ހަމައެކަނި ރައީސް އަކީ، ރައީސް ޞާލިހު ކަމަށް ރަފިއްޔާ ވިދާޅުވިއެވެ. އަދި އެމަނިކުފާނު ރާއްޖޭގެ ތާރިހު ބަދަލު ކުރައްވާނެ ކަމަށް ވިދާޅުވިއެވެ.
ރައްޔިތުން ގުނބޯ ހެއްދި ޒަމާން ފާއިތުވެ ހިނގައްޖެކަން ފާހަގަކުރައްވާ ރަފިއްޔާ ވިދާޅުވީ މި ސަރުކާރުން ގެނެސްދޭ ތަރައްޤީގެ މަޝްރޫއުތައް ހުރިހާ ރައްޔިތުންނަށް ވެސް ފެންނަމުންދާ ކަމަށެވެ.
އަންހެނުން ބާރުވެރިކުރުވުމަށްޓަކައި މި ސަރުކާރުން ގިނަ މަސައްކަތްތަކެއް ކުރި ކަމަށާއި އެކަން ޤާނޫނުން ވެސް ފެންނަން އެބައޮތް ކަމަށް ވެސް ރަފިއްޔާ ވިދާޅުވިއެވެ.
