ޝަމީމް ވަކިކުރުމަށް އެމްޑީޕީން ހުށަހެޅުމާމެދު އެ ޕާޓީގެ ޕީޖީ ގްރޫޕުގެ އިއުތިރާޒެއް ނެތް
ޕީޖީ ގްރޫޕުގެ އިއުތިރާޒެއް ނެތްކަމަށް ޕީޖީ ގްރޫޕުގެ އަޢުލަބިއްޔަތުން ވަނީ ފާސްކޮށްފައި
ޕީޖީ ހުސައިން ޝަމީމް ނޫސްވެރިންގެ ބައްދަލުވުމެއްގައި ވާހަކަ ދައްކަވަނީ
ޕްރޮސެކިއުޓަރ ޖެނެރަލް ހުސައިން ޝަމީމް އެ މަޤާމުން ވަކި ކުރެއްވުމަށް ވެރިކަން ކުރާ މައި ޕާޓީ އެމްޑީޕީން ހުށަހެޅުމާމެދު އެ ޕާޓީގެ ޕީޖީ ގްރޫޕުގެ އިއުތިރާޒެއް ނެތްކަމަށް ފާސްކޮށްފިއެވެ.
އެގޮތަށް ފާސްކޮށްފައިވަނީ ހޯމަ ދުވަހުއެވެ. އެގޮތުން ޝަމީމް މަޤާމުން ވަކި ކުރެއްވުމަށް އެމްޑީޕީގެ ތެރެއިން މަޖިލީހަށް މައްސަލަ ހުށައެޅުމާމެދު އެ ޕާޓީގެ ޕީޖީ ގްރޫޕުގެ އިއުތިރާޒެއް ނެތްކަމަށް ޕީޖީ ގްރޫޕުގެ އަޢުލަބިއްޔަތުން ވަނީ ފާސްކޮށްފައެވެ.
އެމްޑީޕީ ޕީޖީ ގްރޫޕުން ބޭއްވި ބައްދަލުވުމެއްގައި ޕީޖީ ޝަމީމް ވަކިކުރަން މީގެ ކުރިން މަޝްވަރާ ކުރެވިފައިވެއެވެ. 1 ޖޫން 2022 ގައި ބޭއްވި ބައްދަލުވުމުގައި ޕީޖީ ޝަމީމް ވަކިކުރަން ހުށައެޅީ ޤާނޫނު ތަންފީޒު ކުރުމުގައި އޭނާ ގޯސްތައް ހައްދަވާ ކަމަށް ބުނެއެވެ. އެގޮތުން ޤާނޫނީ އިމުގެ ތެރެއިން ޕީޖީ ވަކިކުރަން ކުރަންޖެހޭ ކަންކަން ކުރެއްވުމަށް ގިނަ މެމްބަރުން ވަނީ ތާއީދުކުރައްވާފައެވެ.
އެހެންނަމަވެސް އެ ދުވަހު އެކަމަށް މަޝްވަރާކުރުމަށް އިތުރު ބައްދަލުވުމެއް ބޭއްވުމަށް ނިންމައި ބައްދަލުވުން ކުރުކޮށްލީއެވެ.
ޕްރޮސެކިއުޓަރ ޖެނެރަލްގެ މަޤާމަށް ޙުސައިން ޝަމީމު އައްޔަނުކުރުމަށް ރައްޔިތުންގެ މަޖިލީހުން ފާސްކުރީ 7 ޑިސެމްބަރު 2019 ގައެވެ. އޭރު ޕީޖީގެ މަޤާމަށް ޝަމީމު އައްޔަނުކުރުމަށް ވޯޓު ދެއްވީ 74 މެމްބަރުންނެވެ.
