މަޖީދިއްޔާ، އިސްކަންދަރު އަދި އަމީނިއްޔާ ސްކޫލް އެއް ދަންފަޅިއަށް ބަދަލުކުރަނީ

މަޖީދިއްޔާ، އިސްކަންދަރު އަދި އަމީނިއްޔާ ސްކޫލް އެއް ދަންފަޅިއަށް ބަދަލުކުރުމުގެ ވިސްނުން ގެންގުޅުއްވާ ކަމަށް އެޑިއުކޭޝަން މިނިސްޓަރު ޑރ. އައިޝަތު އަލީ ވިދާޅުވެއްޖެއެވެ.

މިނިސްޓަރު މިހެން ވިދާޅުވީ ރައްޔިތުންގެ މަޖިލީހުގެ ވަޒީރުންނާއި ސުވާލު ކުރުމުގެ ބައިގައި ސްކޫލްތައް އެއް ދަންފަޅިއަށް ބަދަލުކުރުމާއި ގުޅޭ ގޮތުން ވާހަކަފުޅު ދައްކަވަމުންނެވެ. މިނިސްޓަރާއި ކުރެވުނު ސުވާލަކީ މާލޭގެ ސްކޫލްތައް އެއް ދަންފަޅިއަށް ބަދަލުކުރެވޭނީ ކޮން އިރަކުތޯއެވެ.

Advertisement

މި ސުވާލުގެ ޖަވާބުގައި މިނިސްޓަރު ވިދާޅުވީ ސްކޫލްތައް އެއް ދަންފަޅިއަށް ބަދަލުކުރުމަކީ އެމްޑީޕީގެ ސިޔާސަތެއް ކަމަށެވެ. އަދި މާލޭގައި ދިމާވާ ގޮންޖެހުމަކީ ޖާގައިގެ ދަތިކަން ކަމަށާއި، ނަމަވެސް މަސައްކަތްތަކެއް ފަށައިގެން ކުރިއަށްގެންދާ ކަމަށް މިނިސްޓަރު ވިދާޅުވިއެވެ.

މިނިސްޓަރު ވިދާޅުވީ މާލޭގެ އިއްޒުއްދީން ސްކޫލް އެއް ދަންފަޅީގެ ސްކޫލެއްގެ ގޮތުގައި ގާއިމްކުރެވިފާ ކަމަށާއި، މިހާރު މަސައްކަތް ކުރަނީ އިތުރު 4 ސްކޫލެއް ހުޅުމާލޭގައި އެޅުމަށްޓަކައި ކަމަށެވެ.

ވެލިދޫ ދާއިރާގެ މެންބަރު މުހައްމަދު އަބްދުﷲ ޝަފީގު ކުރެއްވި ސުވާލަކަށް ޖަވާބު ދެއްވަމުން މިނިސްޓަރު ވަނީ ތައުލީމީ ދާއިރާގެ އުމްރާނީ ތަރައްގީގެ މަސައްކަތްތައް ތަފްސީލުކޮށްދެއްވާފައެވެ.

މިނިސްޓަރު ވިދާޅުވީ އާބާދީ އިތުރުވާ ވަރަކަށް ސްކޫލްތަކުގެ ޖާގަ ބޭނުންވާނެ ކަމަށެވެ. އަދި ބައެއް ސްކޫލްތަކަށް، ރަށުގެ އާބާދީއާއި އެއްވަރަށް ޖާގަ ނުބާއްވާ މީގެ ކުރިން ބިން ދީފައިވާ ކަމަށެވެ. ނަމަވެސް ބައެއް ރަށްރަށުގައި އެކަން ކޮށްފައިވަނީ ވަރަށް ރަނގަޅަށް ކަމަށާއި، އަދި ސްކޫލްތައް ރަނގަޅަށް ޑިވެލޮޕްވަމުންދާ ވަރަކަށް މާލޭގައި ތިބި ފަރާތްތައް ވެސް ރަށްރަށަށް ހިޖުރަކުރަމުންދާ ކަމަށެވެ.

އެހެންކަމުން ރަށްރަށަށް އިތުރު ޖާގަވެސް ބޭނުންވާ ކަމަށް މިނިސްޓަރު ވިދާޅުވިއެވެ. މިނިސްޓަރު ވިދާޅުވީ ތައުލީމީ ދާއިރާގެ އުމްރާނީ ތަރައްގީގެ ކަންކަމުގައި 2018 ނޮވެމްބަރުގެ ކުރިއަށް މާ ބޮޑަށް އަޅާލެވިފައި ނުވާ ކަމަށެވެ. އެހެންނަމަވެސް މި ސަރުކާރުން ތައުލީމީ ދާއިރާގެ އުމްރާނީ ތަރައްގީއަށް ވަރަށް ގިނަ ކަންކަން ކުރެވިއްޖެ ކަމަށް މިނިސްޓަރު ވިދާޅުވިއެވެ.

ތަފްސީލުތައް ހިއްސާ ކުރައްވަމުން މިނިސްޓަރު ވިދާޅުވީ ސްކޫލަތަކުގެ އުމްރާނީ ތަރައްގީއަށް މުޅި ޖުމްލަ 202 ޕީއެސްއައިޕީގެ މަސައްކަތް ހިނގަމުންދާ ކަމަށެވެ. އޭގެ ތެރެއިން ހުރިހާ މަސައްކަތެއް ފުރިހަމަކޮށް 30 ޕްރޮޖެކްޓެއް ނިންމާ އެތަންތަނުގައި ކިޔެވުމުވެ ކަންކަން ކުރިއަށްދާ ކަމަށެވެ. އަދި 89 ޕްރޮޖެކްޓެއްގެ މަސައްކަތް މިހާރު ވެސް ކުރިއަށްދާ ކަމަށާއި، 33 ޕްރޮޖެކްޓެއް ޓެންޑަރ ކުރުމުގެ މަސައްކަތް ކުރިއަށް ގެންދެވޭނެ ކަމަށެވެ.

މީގެ އިތުރުން ޓެންޑަރ ބޯޑުގައި 15 ޕްރޮޖެކްޓެއް އެބައޮތް ކަމަށާއި، އިތުރަށް މިއަހަރު 45 ޕްރޮޖެކްޓްގެ މަސައްކަތް ފަށައިގެން ކުރިއަށްދާ ކަމަށް މިނިސްޓަރު ވިދާޅުވިއެވެ. އަދި މިދިޔަ 3 އަހަރުގެ ތެރޭގައި އުމްރާނީ ތަރައްގީއަށް ގިނަ މަސައްކަތް ކުރެވިފައިވާއިރު، 2019 ވަނަ އަހަރު 246 މިލިއަން ރުފިޔާގެ މަސައްކަތް ކުރެވި، 2020 ވަނަ އަހަރު 514 މިލިއަން ރުފިޔާގެ އުމްރާނީ ތަރައްގީގެ މަސައްކަތް ކުރެވިފައިވާ ކަމަށް މިނިސްޓަރު ވިދާޅުވިއެވެ.

މިނިސްޓަރު ވިދާޅުވީ ނިމިގެންދިޔަ 2021 ވަނަ އަހަރު ވެސް 340 މިލިއަން ރުފިޔާ އުމްރާނީ ތަރައްގީގެ މަޝްރޫއަށް ހޭދަކޮށްފައިވާ އިރު، މިއަހަރުގެ މިހާތަނަށް 2015 މިލިއަން ރުފިޔާގެ މަޝްރޫއު ކުރިއަށްދާ ކަމަށެވެ.