ކުދިންގެ ރައްކާތެރިކަމަށް، ކިޔަވައިދޭ ވަގުތުތަކުގައި ސްކޫލްތަކުގެ ގޭޓުތައް ތަޅުލާފައި ބަހައްޓަން އަންގައިފި
މިއީ ޖަމާލުއްދީން ސްކޫލަށް ވަދެ މީހަކު މާރާމާރީ ހިންގަން އުޅުނު މައްސަލަ ފެންމަތިވެފައި ވަނިކޮށް ފޮނުވި އެންގުމެއް
ޖަމާލުއްދީން ސްކޫލް
ދަރިވަރުންގެ ރައްކާތެރިކަން ކަށަވަރު ކުރުމަށް، ސްކޫލްތަކުގައި ކިޔަވައިދޭ ގަޑިތަކުގައި ގޭޓުތައް ތަޅުލާފައި ބަހައްޓަން އެޑިއުކޭޝަން މިނިސްޓްރީން އަންގައިފިއެވެ.
އެޑިއުކޭޝަން މިނިސްޓްރީން ސްކޫލްތަކަށް ފޮނުވި އެންގުމުގައި ބުނެފައިވަނީ ސްކޫލް މާހައުލަކީ ދަރިވަރުންނާއި މުވައްޒަފުންނަށް ހުރިހާ ގޮތަކުން ވެސް ރައްކާތެރި މާހައުލަކަށް ހެދުމަށް މަސައްކަތް ކުރަމުން އަންނަކަމަށެވެ. އެގޮތުން ކިޔަވައިދޭ ވަގުތުތަކުގައި އަބަދުވެސް ގޭޓުތައް ތަޅުލާފައި ބަހައްޓަން ވަނީ އަންގާފައެވެ.
މި އެންގުމުގައި ދަރިވަރުންނާއި ބެލެނިވެރިންނާއި ޓީޗަރުން ސްކޫލަށް ވަދެ ނުކުމެ ހެދުމުގައި އަމަލު ކުރާނެ ގޮތްތައް ވެސް ވަނީ ކިޔައިދީފައެވެ. އެގޮތުން، ކިޔެވުން ކުރިއަށްދާ ވަގުތު ހުރިހާ ސްކޫލެއްގެ ހުރިހާ ގޭޓެއްގައި ސެކިއުރިޓީ ބެލެހެއްޓުމަށް ސަމާލުކަން ދިނުމަށާއި ކިޔެވުން ފެށުމަށްފަހު އޭގެ ފަހުން ޓިޗަރުންނާއި ދަރިވަރުން ސްކޫލަށް ވަދެ ނިކުތުމުގެ ޚާއްސަ އިންތިޒާމުތަކެއް ސްކޫލުން ހަމަޖެއްސުމަށާއި ބެލެނިވެރިންގެ ކާޑު އޮތްކަން ޔަޤީން ކުރުމަށް ސަމާލުކަން ދިނުމަށް ވަނީ އަންގާފައެވެ.
އެޑިއުކޭޝަން މިނިސްޓްރީން ސްކޫލްތަކުގެ ސެކިއުރިޓީ އިތުރަށް ވަރުގަދަ ކުރުމަށް އަންގާފައި މިވަނީ މެއި މަހުގެ 24 ވަނަ ދުވަހު ޖަމާލުއްދީން ސްކޫލަށް މީހަކު ވަދެ މާރާމާރީ ހިންގަން އުޅެފައިވާ މައްސަލައެއް ފެންމަތިވެފައި ވަނިކޮށެވެ. ސްކޫލުގެ ޓީޗަރަކު ބޭރަށް ނުކުތް ވަގުތާ ދިމާކޮށް ސްކޫލް ތެރެއަށް ވަދެ އޭނާ އަޑުގަދަކޮށް ސްކޫލުގެ ޕްރިންސިޕަލަށް އިންޒާރު ދީފައިވާ ކަމަށް މައުލޫމާތު ލިބެއެވެ. މި މައްސަލާގައި 37 އަހަރުގެ ފިރިހެނަކު ހައްޔަރުކޮށްފައިވާ ކަމަށް ފުލުހުން ބުނެއެވެ.
