ފެރީ ނެޓްވޯކުގެ ފޭސް 2 އަދި 3 ގެ މަސައްކަތް މަޑުޖައްސާލުމުގެ ވިސްނުމެއް ނެތް: ޕްލޭނިން މިނިސްޓްރީ
13 ޖޫން 2022 | ހޯމަ 02:11މިއީ ގިނަ ރަށްތަކަކަށް ފައިދާވާނެ ޕްރޮޖެކްޓަކަށްވާތީ މަޑުޖައްސާލަން ނުވިސްނާ
ހައި ސްޕީޑް ފެރީ
ދުނިޔޭގެ އިގްތިސާދަށް އައި ބަދަލުތަކާއެކުވެސް އިންޓަގްރޭޓެޑް ނޭޝަނަލް ޕަބްލިކް ފެރީން ނެޓްވޯކުގެ 2ވަނަ ފިޔަވަހި އަދި 3 ވަނަ ފިޔަވަހީގެ މަސައްކަތް މަޑުޖައްސާލުމުގެ ވިސްނުމެއް އަދި ނުގެންގުޅޭ ކަމަށް މިނިސްޓްރީ އޮފް ނޭޝަނަލް ޕްލޭނިން، ހައުސިން އެންޑް އިންފްރާސްޓްރަކްޗާއިން ބުނެފިއެވެ.
ރާއްޖެ ޓީވީގެ ފަލަ ސުރުޚީގައި ވާހަކަދައްކަވަމުން އެމިނިސްޓްރީގެ ޑެޕިއުޓީ ޑިރެކްޓަރ ޖެނެރަލް އައިޝަތު ސާދު ވިދާޅުވީ ފެރީ ނިޒާމަކީ އޭގެ ސަބަބުން ހުރިހާ ރަށަކަށް ވެސް ގިނަ ފައިދާތަކެއް ވާނެ މަޝްރޫއެއް ކަމުން އެ މަސައްކަތް މަޑު ޖައްސަން ނިންމާފައި ނުވާ ކަމަށާއި އެއްބަސްވުމާ އެއްގޮތަށް ފޭސް 2 އަދި 3 ގެ މަސައްކަތް ކުރިއަށްދާނެ ކަމަށެވެ. އަދި މިއީ ސަރުކާރުން ވަރަށް އިސްކަމެއް ދީގެން ކުރާ ކަމެއް ކަން ވެސް އޭނާ ފާހަގަ ކުރެއްވިއެވެ.
ސާދު ވިދާޅުވި ގޮތުގައި ފުރަތަމަ ފިޔވަހީގެ ދަށުން ހދ. ގައި ދަތުރުތައް ފަށާފައިވާއިރު އޭގެ ސަބަބުން އަތޮޅުގެ ރައްޔިތުންނަށް ގިނަ ފައިދާތަކެއް ލިބެމުން އެބަދެއެވެ. އެގޮތުން، ސިއްޙީ ކަންކަމާއި ވިޔަފާރިއާއި އެއާޕޯޓަށާއި އާއިލާއާ ބައްދަލުކުރަން ކުރާ ދަތުރުތައް ވަރަށް ބޮޑަށް ލުއިވެގެން ގޮސްފައިވާކަން އޭނާ ފާހަގަކުރެއްވިއެވެ.
ފެރީ ނެޓްވޯކުގެ ފުރަތަމަ ފިޔަވަހީގެ މަސައްކަތްތައް ނިމުމަކާ ގާތްވެފައިވާއިރު 2ވަނަ ފިޔަވަހި އަދި 3ވަނަ ފިޔަވަހީގެ މަސައްކަތް ވެސް ޕްލޭނިން މިނިސްޓްރީން ވަނީ އެމްޓީސީސީއާ ހަވާލުކޮށްފައެވެ. އެގޮތުން، 2ވަނަ ފިޔަވަހީގެ ދަށުން ދެކުނުގެ ފެރީ ނެޓްވޯކުގެ މަސައްކަތް ކުރިއަށްދާނެ ކަމަށް އެމްޓީސީސީން ބުންޏެވެ.
އެމްޓީސީސީގެ ޖެނެރަލް މެނޭޖަރު އިސްމާއިލް ފާރިގު ވިދާޅުވީ އިގްތިސާދީ ގޮތުން ދިމާވާ ގޮންޖެހުންތަކުގެ އަސަރު ޕްރޮޖެކްޓަށް ވެސް ކުރާ ކަމަށެވެ. އެގޮތުން، ފުރަތަމަ ފިޔަވަހީގެ މަސައްކަތްތަކުގެ ތެރޭގައި ހިމެނޭ ބައެއް ކަންކަން މުދާ ނުލިބި ލަސްވިކަން އޭނާ ފާހަގަކުރެއްވިއެވެ.
ފާރިގު ވިދާޅުވީ އިގްތިސާދަށް އަންނަ ބަދަލުތަކާއެކުވެސް އެމްޓީސީސީ އޮތީ ސަރުކާރުގެ ނިންމުމާ އެއްގޮތަށް މި މަޝްރޫއުގެ މަސައްކަތްތައް ކުރިއަށް ގެންދިއުމަށް ކަމަށެވެ.
މި މަޝްރޫއު ހިންގުމަށް ހަމަޖެހިފައިވަނީ ތިން ފިޔަވައްސަކަށް ބަހާލައިގެންނެވެ. ފުރަތަމަ ފިޔަވަހީގައި ހއ. ހދ. އަދި ށ. ހިމެނޭއިރު ދެވަނަ ފިޔަވަހީގައި ނ، ރ، ބ، ޅ، ގއ، ގދ، ޏ، އަދި ސ ގުޅާލާނެއެވެ. އަދި ތިންވަނަ ފިޔަވަހީގައި ކ، އއ، އދ، ވ، މ، ފ، ދ، ތ އަދި ލ ގުޅާލުމަށް ވަނީ ނިންމާފައެވެ. މި މަޝްރޫއުގެ ދަށުން ޖުމްލަ 188 ރަށް ގުޅާލުމަށް ވަނީ ހަމަޖެހިފައެވެ.
