ޓެކްސީ ކުރުމުގައިވެސް ބިދޭސީން !!

ބިދޭސީން ރާއްޖެ ގެންނަނީ އެކިމަސައްކަތްތަކަށް ދިވެހިން ނުލިބޭކަމަށް ބުނެއެވެ. ބައެއް މަސައްކަތްތައް ކުރަން ދިވެހިން ފަސްޖެހޭތީ އެމަސައްކަތްތައް ކުރުމަށް ބިދޭސީން އެތެރެކޮށް ރާއްޖޭގައި އުޅޭ ބިދޭސީންގެ އަދަދު ވަނީ އަތްނުފޯރާ ފަށަށް އަރާފައެވެ. ގަވާއިދާ ޚިލާފަށް އެތެރެވެގެން އުޅޭ ބިދޭސީން އިންތިހާއަށް ގިނައެވެ. އޭގެ ސީދާ އަދަދު އެނގޭ ފަރާތެއް ނުވެސްނެތެވެ. އެއާއެކު ބިދޭސީން ވަނީ ރާއްޖޭގެ ހުރިހާ ކަމެއްގެ ތެރޭގައި ވަކި ހިތްޕާލާފައެވެ. ގޭތެރެއިން ފެށިގެން މަގުމައްޗާއި އެކި ވަރުގެ އޮފީސްތަކާއި ރިސޯޓްތަކާއި މަސް ދޯނި ފަހަރާއި ސަފާރީތަކުންވެސް ފެންނަނީ ބިދޭސީންނެވެ. އެމީހުން ނޫޅޭ ވިޔަފާރިއެއް ރާއްޖެއަކު ނެތެވެ.

އޭގެތެރޭގައި ދިވެހިން އެންމެ ގިނައިން ކުރަމުން އަންނަ މަސައްކަތްތައްވެސް ހިމެނެއެވެ. މިފަދަ އެއް މަސައްކަތަކަށް ޓެކްސީ ކުރުން ވާނެއެވެ. ޒަމާނުއްސުރެވެސް ޓެކްސީ ކުރުމަކީ ދިވެހިން ކުރަމުން އައި މަސައްކަތެކެވެ. ޓެކްސީ ސެންޓަރުތަކުން އެކަން ކުރަމުން އައި ނަމަވެސް ޒަމާނަށް އައި ބަދަލާއެކު ޓެކްސީ ކުރުމުގެ ޚިދުމަތް އަމިއްލަ ފަރާތްތަކަށްވެސް ވަނީ ހުޅުވާލާފައެވެ. އެޕްލިކޭޝަން މެދުވެރިކޮށް އަމިއްލަ ފަރާތްތަކަށް ޓެކްސީ ކުރުމުގެ ފުރުސަތު މިއަދު ވަނީ ފަހިވެފައެވެ. އެއާއެކު ގިނަ އަދަދެއްގެ ދިވެހިން ޓެކްސީގެ ޚިދުމަތް ދޭތަން ފެނެއެވެ.

ދެން ފެނިގެންދިޔައީ މިކަމުގެ ތެރެއަށްވެސް ބިދޭސީން ވަތް މަންޒަރެވެ. ޓެކްސީ ގަވާއިދުގައި ބުނެފައިވަނީ ބިދޭސީ ޑްރައިވަރުންގެ ތެރެއިން ޓެކްސީ ކުރުމުގެ ލައިސަންސް ދޫކުރެވޭނީ، ދިވެހި ދައުލަތުގެ ރެޒިޑެންޓްވީޒާ ލިބިފައިވާ، ދިވެހިރައްޔިތަކާ ކައިވެނިކޮށްގެންއުޅޭ ބިދޭސީއަކަށްކަމަށެވެ. ބިދޭސީންނަށް ވިޔަފާރި ކުރެވެން އޮންނަ އުސޫލަކީ މިއެވެ. ދިވެހި ދައުލަތުގެ ރެޒިޑެންޓް ވީޒާ ލިބިފައިވާ ދިވެހި ރައްޔިތަކާ ކައިވެނިކޮށްގެން އުޅުމެވެ. މާރުކޭޓް ގޮޅިތަކުގައިވެސް ގިނައީ ބިދޭސީންނެވެ. އެތަންތަނަށް ވެރިވެގަނެފައިވަނީ ބިދޭސީންނެވެ. ކޮންސްޓްރަކްޝަން ދާއިރާގައިވެސް ގިނަވަމުން އަންނަނީ ބިދޭސީންނެވެ. ތަންތަން ކުއްޔަށް ދޫކުރާ މީހުންނަށް ބިދޭސީން ވެއްޖެއެވެ. މިހާރު އޮތީ ޓެކްސީ ކުރުމެވެ.

އަމިއްލަ ޓެކްސީތަކުގައި ބިދޭސީން ޓެކްސީ ކުރުން މިހާރު ވަނީ އާންމުވާން ފަށާފައެވެ. ޓެކްސީ އަރާއިރު އެއީ ބިދޭސީ އެއްކަމެއް ދޭސީއެއްކަމެއް ސާފެއް ނުވެއެވެ. އެކަން ތަޖުރިބާ ކުރި ބައެއް މީހުން ބުނި ގޮތުގައި ޑްރައިވަރެއްގެ ގޮތުގައި އިނީ ބިދޭސީއެއްކަން އެނގެނީ ދާންވީ ތަން ބުނުމުން އެތަން ނޭންގިގެން އުޅެން ފެށުމުންނެވެ. ޓެކްސީ ކުރަނީ ކީއްކުރަންހޭ އެހުމުން ބޮސް ބުނެގެން ޓެކްސީ ކުރަން އެރީކަމަށް ބުނެއެވެ. މާނައަކީ އަމިއްލަ ކާރު ތަކުގައި ޓެކްސީ ކުރާ އެންމެންނަކީ ގަވާއިދުގައި ބުނާ ގޮތުގެ މަތިން ދިވެހި ރައްޔިތަކާ ކައިވެނިކޮށްގެން އުޅޭ ބިދޭސީއެއް ނޫނެވެ.

ރާއްޖޭގައި ލާރި ލިބޭ ކޮންމެ ކަމެއްގައި ބިދޭސީންނަށް ހަރަކާތްތެރިވެވުމަކީ ނުހަނު ފަސޭހަކަމެކެވެ. އެއީ ކިތަންމެ ގިނަ ދިވެހިން ހަރަކާތްތެރިވާ ވިޔަފާރިއެއްނަމަވެސް އެފުރުސަތު އޮންނަނީ ފަހިވެފައެވެ. އޭގެ ފައިދާ ބިދޭސީން އަންނަނީ ނަގަމުންނެވެ. އެކަން މިއަންނަނީ ހުރިހާ ދާއިރާތަކެއްގައިވެސް ފެންނަމުންނެވެ. އެކަން ބަލާ މޮނިޓަރ ކުރަން ހުންނަ އިދާރާތަކުން އެކަން ނުބަލާނަމަ ޓެކްސީ ކުރުމުގެ ޚިދުމަތްވެސް ދާނީ މަޑުމަޑުން ބިދޭސީންގެ އަތްމައްޗަށެވެ. އެމީހުންގެ ބާރު ދާނީ ގަދަވަމުންނެވެ. ޓެކްސީތަކުން ހުރިހާ ވަގުތެއްގައިވެސް އެކި އުމުރުފުރާގެ މީހުން ޚިދުމަތް ހޯދައެވެ. އެހެންކަމަށްވާއިރު މިކަމަކީ ސީރިއަސް ކަމެއްގެ ގޮތުގައި މޮނިޓަރ ކުރެވެންވާނެ ކަމެކެވެ. އަމިއްލަ ޓެކްސީ ތަކުގައި ޓެކްސީ ކުރުމުގެ ހުއްދަ ދީފައިވާ މީހާ ނޫން އެހެން މީހުން އެޚިދުމަތް ދޭއިރު އެކަން ބެލޭނެ ގޮތެއް އެޅޭނެ ފިޔަވަޅެއް އޮންނަންވާނެއެވެ.